Ini Sa Igsulat I
NIHIMIYAS
1
Ini Sa Egoh I Nihimiyas Migsimbà Denu Sa Menuwa Hélusalém
1 Na, ini sa tinulon i Nihimiyas anak i Hakaliya. Diyà a sa menuwa Susa, egoh sa bulan pinengadanan da Kisléba diyà sa keduwa di pulù gepalay sa lugay i Altahilis migkedatù diyà sa tanà Pélsiya. 2 Hê, migtebow Hanani i sa duma telahadi ku owoy sa medoo duma di kedu Huda dò. Agulé inigsaan ku kagda denu sa medoo etaw Hudiyu tapay eg-ugpà diyà sa tanà Huda sa endà nekeunut diyà sa medoo etaw nesigkemb owoy denu sa medoo egkebaelan ma diyà sa menuwa Hélusalém.
3 Sinagbian da aken, guwaen da, “Siedò medoo etaw migpelikù kedu diyà sa neangayan da egoh da nesigkem,c egkelikutan da temù diyà sa menuwa da owoy kagda ma sa egpeumàumaan sa medoo etaw beken Hudiyu eg-ugpà medapag diyà kenagda. Owoy tapay ma doo nelukat sa kutà diyà sa menuwa Hélusalém owoy endà ma mepelumanan sa medoo pintù di edung sa egoh di neulow.”
4 Na, egoh ku migdineg iya wé, migpenuu a owoy migsinegaw a ma. Agulé nelugaylugay a nebukul. Pineulan ku sa kekaen ku danà ku tigtu nebukul owoy migsimbà a ma diyà si Nemula, sa Nemula diyà langit. 5 Migsimbà a, guwaen ku, “O Datù Nemula, sa Nemula diyà langit, kuna sa épê dakel egkegaga owoy egkelimedangan ké diyà keniko. Kesaligan ka egpetuu sa nesepasadan yu sa medoo etaw eghidu keniko owoy egpangunut ma diyà sa medoo igsugù ko. 6 Hahaa ko aken i egsugùsuguen ko, owoy dinegdineg ko ma sa kesimbà ku diyà keniko, enù ka isimbà ku sigep owoy agdaw sa medoo etaw ko tegeIslaél. Egtulonen ku sa egoh ké nesalà diyà keniko, kami i medoo tegeIslaél. Nesalà sa medoo tupù ku owoy aken ma. 7 Tigtu medaet sa binaelan ké diyà keniko danà ké endà egpangunut diyà sa medoo igsugù ko owoy diyà sa medoo uledin igbegay ko diyà kenami sa igpesugkow ko diyà si Mosis sa egsugùsuguen ko egoh anay.
8 “Ketulengi ko sa inikagi ko diyà si Mosis, guwaen ko, ‘Amuk endà tigtu yu mangunut diyà kenak, sepalaken ku kiyu diyà sa medoo balangan tanà. 9 Dodoo amuk pelikù yu diyà kenak owoy amuk pangunutan yu dema sa medoo igsugù ku, setiponen ku dema kiyu pelikù diyà sa tanà hinemilì ku sa kenà yu sumimbà diyà kenak, apiya di pa nesepalak yu dé dutu mediyù dò.’
10 “O Datù Nemula, isimbà ku sa medoo egsuguen ko sa etaw inalukan ko danà sa dakel tunung ko owoy sa egkegaga ko ma. 11 Dinegdineg ko sa kesimbà ku owoy sa kesimbà sa medoo liyu egsuguen ko egkeiyap egpedakel keniko. Begayi ko aken mepion ini egoh di anì metuuwan sa datù diyà kenak anì ipetuu di sa ungayà ku.”
Na, egoh iya, aken sa atung eg-itis sa wain eg-inemen sa datù.