24
15 Na, egoh di nelugay dé, migkelukes dé temù Hoyada i. Nekeuma melatuh telu pulù gepalay, iya pelawà nematay. 16 Agulé iglebeng da diyà sa atung lebengan datù diyà sa Menuwa i Dabid, enù ka tigtu mepion sa binaelan di diyà sa tanà Islaél danà di migpangunut diyà si Nemula owoy danà ma sa galebek di diyà sa Dalesan i Nemula.
17 Dodoo egoh di nematay dé sa tegesimbà si Hoyada, migpedapag sa medoo ulu-ulu tegeHuda diyà si Datù Howas owoy migligkued da diyà sa taengan di. Agulé pinangunutan i Howas sa medoo ungayà da. 18 Huenan di, migsabuh sa medoo etaw egsimbà diyà sa Dalesan i Nemula owoy ininiyugan da ma Nemula i sa egpigtuuwen sa medoo tupù da. Mig-edung da dema egpenemula sa inetaw Astolot owoy sa medoo liyu inetaw. Huenan di, nekeuma dema sa kebulit i Nemula diyà sa tanà Huda lapeg sa menuwa Hélusalém. 19 Pineangay i Datù Nemula sa medoo tegesugkow kagi di diyà kenagda anì mekepelikù da dema migtuu diyà kenagdi. Dodoo apiya di pa tinulonon sa tegesugkow kagi i Nemula kagda sa mebaelan da danà sa salà da, tapay da doo endà egdinegdineg.
20 Agulé linuhub sa Suguy i Nemula Sakaliyas i anak i Hoyada sa tegesimbà. Agulé migtigdeg Sakaliyas i diyà sa nekepagtaw kenà sa medoo etaw mekehaa kenagdi, owoy pinetaled di sa kagi di, guwaen di, “Inigsaan i Datù Nemula kiyu sa pesuwan yu migtipay sa medoo uledin di anì mehaa yu polo sa kepigtamay di keniyu. Ininiyugan yu kagdi, huenan di ininiyugan di ma dé kiyu.” 21 Agulé neseunut Datù Howas i sa medoo etaw egkuntelà diyà si Sakaliyas. Hê, binuung da batu Sakaliyas i danà sa igsugù i Datù Howas anì meimatayan diyà sa duwangen sa Dalesan i Nemula. 22 Nelipengan i Datù Howas sa mepion ketabang i Hoyada emà i Sakaliyas diyà kenagdi, owoy igpeimatay di polo Sakaliyas i. Na, egoh i Sakaliyas buyu dé egkematay, mig-ikagi, guwaen di, “Ungayà ku hauwen i Datù Nemula sa kebael ko kenak owoy pigtamayan di ma kuna.” 20 Agulé sebaen agdaw nesesebaen sa pedu sa medoo salu i Datù Howas egkuntelà kenagdi. Hê, inimatayan da Howas i diyà sa menuwa Milo medapag diyà sa dalan eg-angay dutu Sila dò.
24:1 - 25:30 Na, egoh di nelugaylugay dé, migpengayaw Datù Nabokonosol i tegeBabiloniya owoy sa medoo sundalu di diyà sa tanà Huda. Tinepel da sa menuwa Hélusalém. Kinuwa da sa medoo mapulù langun taman diyà sa Dalesan i Nemula owoy diyà sa dalesan sa datù, agulé inulow da sa Dalesan i Nemula owoy sa medoo liyu dalesan dahiya. Sinigkem da sa medoo etaw Hudiyu, lapeg sa datù owoy sa medoo liyu etaw épê gelal ataw ka sundalu ataw ka sa medoo metiig, owoy inuwit da kagda diyà sa tanà Babiloniya. Iya daa sa etaw nesamà diyà sa tanà Huda sa medoo tigtu pubeli etaw. Basa ko ma Hilimiyas kansad 52.