2
Ini Sa Egoh I Dabid Migkedatù Diyà Sa Uwang Tanà Huda
(2 Samuwél 2:1-7)
1 Na, egoh di neubus dé iya wé nebaelan,a mig-igsà Dabid i diyà si Datù Nemula, guwaen di, “Enù di ya amuk mangay a umugpà diyà sa sebaen menuwa diyà sa uwang tanà Huda?”
Migsagbì Datù Nemula i, guwaen di, “Hoò, ipanaw ka dé.”
Mig-igsà dema Dabid i, guwaen di, “Ngadan tayu di menuwa sa angayan ku?”
Migsagbì Nemula i, guwaen di, “Sa menuwa Hibelon.” 2 Huenan di, mig-angay da diyà sa menuwa Hibelon Dabid i owoy sa duwa sawa di, si Ahinoam tegeHéslil owoy si Abigal sa nebalu diyà si Nabal tegeKalmél. 3 Inuwit di ma sa medoo etaw di lapeg sa medoo malayan da, owoy mig-ugpà da diyà sa uwang menuwa Hibelon. 4 Agulé mig-angay sa medoo etaw tegeHuda diyà sa menuwa Hibelon. Egoh da migtebow, hinududan da lana sa ulu i Dabid anì tandaan da kagdi sa datù diyà sa uwang tanà Huda.
Na, egoh i Dabid migdineg denu sa medoo etaw tegeHabis diyà uwang tanà Galaad sa miglebeng si Saulo, 5 migpeuwit kagi Dabid i diyà kenagda, guwaen di, “Ungayà ku metabangan i Datù Nemula kiyu danà yu migpehaa sa kehidu yu sa datù yu si Saulo egoh yu miglebeng kenagdi. 6 Owoy ungayà ku ma hiduwan i Datù Nemula kiyu owoy ipetuu di ma sa igpasad di diyà keniyu. Na, mael a ma sa mepion diyà keniyu danà iya wé binaelan yu. 7 Huenan di, pebagel yu dé sa pedu yu owoy petegas yu ma. Nematay dé Saulo i sa tapay datù yu, owoy hinududan sa medoo tegeHuda aken lana enù ka tinandaan da aken dé sa datù da.”