17
Ini Sa Egoh I Gulayat Mig-enggat Sa Medoo TegeIslaél
1 Na, nesetipon sa medoo tegePilistiya diyà sa menuwa Suko diyà sa tanà Huda anì gilawen da sa medoo tegeIslaél. Migpetigdeg da sa medoo kemalig diyà Ipes-Dammin neseteliwadaan sa menuwa Suko owoy menuwa Asikah. 2 Na, si Saulo owoy sa medoo sundalu di, nesetipon da ma migpetigdeg kemalig diyà sa sugud Éla nesetanà dutu da sa medoo tegePilistiya. 3 Egkesesugpayal da doo sa medoo tegePilistiya owoy sa medoo tegeIslaél, enù ka diyà sa sebaen getan sa medoo tegePilistiya owoy diyà sa sebaen ma getan sa medoo tegeIslaél, owoy duen ma sa sugud di teliwadà.
4 Na, egketuuwan sa medoo tegePilistiya diyà sa duma da sundalu si Gulayat kedu menuwa Gat, enù ka mebalaw sundalu owoy telu kamitelu sa kehagtaw di egtigdeg. 5 Duen sa sayap di galang, owoy lima pulù owoy pitu kakilu sa kebegat sa anit di galang. 6 Owoy galang ma sa ampis sa lisen di, owoy sinegelay di ma sa gelat di galang. 7 Duen ma sa sigpù di nekeuma pitu kakilu sa kebegat sa ebà di owoy dakel sa degdegan di éhê kedakel bugsud. Duen ma sa sebaen sundalu eghuna diyà kenagdi sa atung eg-uwit sa kelasag di.
8 Na, egtigdeg Gulayat i owoy eg-umow diyà sa medoo sundalu tegeIslaél, guwaen di, “Endà duen sa pesuwan ta langun egsegilaway. Hemilì yu daa sa sebaen etaw diyà keniyu anì telabuken di aken anì seginaluway ké enù ka aken sa tegePilistiya owoy anan yu etaw i Saulo. 9 Amuk mesebalà ké owoy amuk meimatayan di aken, peudipen ké langun diyà keniyu. Dodoo amuk kagdi sa meimatayan ku, udipenen ké ma kiyu langun. 10 Eg-enggaten ku kiyu i medoo tegeIslaél ini egoh di. Hemilì yu dé sa etaw diyà keniyu anì sebalaay ké.” 11 Na, egoh i Saulo owoy sa medoo tegeIslaél migdineg sa inikagi i Gulayat, nelimedangan da temù.
Ini Denu Si Dabid Owoy Si Gulayat
12 Na, si Dabid sa kenohonon anak i Hési tegeBétlihém pinengadanan da ma menuwa Épelat diyà sa tanà Huda. Duen sa walu anak i Hési maama, owoy tigtu dé lukes Hési i egoh i Saulo egpedatù. 13 Telu sa anak i Hési nekeunut diyà sa medoo sundalu i Saulo eg-angay eggila. Iya sa ngadan da si Iliyab sa lebì lawa di owoy si Abinadab sa keduwa di owoy si Samah sa ketelu di. 14 Nekeugpà da diyà sa kenà i Saulo, enù ka eg-unut-unut da diyà sa kegila. Dodoo si Dabid sa kenohonon anak di, 15 takà egpelikùlikù eg-angay diyà sa kenà i Saulo owoy diyà sa menuwa Bétlihém kenà di eg-ipat sa medoo kebilibili sa emà di.
16 Na, uman magtu kesimag owoy uman mahapun taman epat pulù agdaw, takaan i Gulayat eg-enggat sa medoo tegeIslaél.
17 Na, sebaen agdaw sinugù i Hési Dabid i, guwaen di, “Hatedi ko siini sepulù owoy walu kakilu teligo sinelal owoy sa sepulù getibulu epan owoy petéél ka angay diyà sa telu kakay ko dutu siedò kenà da eggila. 18 Uwit ko ma siini sepulù gebekut natek gatas owoy begayi ko diyà sa ulu-ulu sundalu. Hahaa ko ma sa keugpà sa medoo kakay ko, enù ka amuk pelikù ka dini uwit ko sumalà dé sa ibegay da anì metandaan sa egoh da endà mepasangan. 19 Dutu da sugud Éla dò enù ka eg-unut-unut da diyà si Saulo owoy sa medoo sundalu tegeIslaél eggila diyà sa medoo tegePilistiya.”
20 Agulé egoh di sumimag, miglapus Dabid i mig-enaw owoy igpeipat di sa medoo kebilibili da diyà sa sebaen ma tegeipat kebilibili. Hê, mig-ipanaw dé eg-angay diyà sa kenà da egsegilaway owoy inuwit di sa kaenen igpehated sa emà di diyà kenagdi. Egoh di migtebow, eg-angay dema eggila sa medoo tegeIslaél owoy eglukiyang da ma. 21 Agulé eg-ingat sa medoo sundalu tegeIslaél diyà sa kenà da egtigdeg, owoy hediya ma sa medoo tegePilistiya anì segilaway da. 22 Agulé tinangtang i Dabid sa kaenen inuwit di diyà sa tegebantay sangkap, enù ka migletu eglagbas diyà sa kenà sa medoo sundalu nesetipon anì saluan di sa medoo kakay di. 23 Egoh da telibubu egseolomoy, mig-angay dema Gulayat i tegeGat egtigdeg diyà sa taengan sa medoo duma di tegePilistiya owoy eg-enggaten di dema sa medoo tegeIslaél. Hê, dinineg i Dabid sa keenggat di. 24 Na, egoh sa medoo tegeIslaél mighaa dema si Gulayat, migpelaguy da langun enù ka nelimedangan da temù. 25 Egseikagiyay da, guwaen da, “Aba! Kaiya dema sa tegepelobolobo takà eg-enggat kenita uman agdaw. Amuk duen sa etaw mekeimatay kenagdi, duen gaa sa dakel untung mesakem di diyà si Datù Saulo, owoy ipesawa di ma gaa sa anak di kenogon, owoy endà ma dé mekebayad sa malayan di sa pelesintu eg-etuken sa gubilenu.”
26 Na, egoh i Dabid migdineg iya wé, eg-igsà diyà sa medoo etaw medapag diyà kenagdi. Guwaen di, “Ngadan gaa sa mesakem sa etaw mekeimatay siedò tegePilistiya endà egpigtuu diyà si Nemula anì mekedan siini mekemala diyà sa tanà Islaél? Ngadan iya wé etaw tegepelobolobo takà eg-enggat sa medoo sundalu i Nemula, sa Nemula nehagtay?”
27 Migsagbì sa medoo duma di egseolomoy, guwaen da, “Lagà doo sa dinineg ko daedò é sa mekebegay diyà sa etaw mekeimatay siedò tegePilistiya.”
28 Na, dinineg i Iliyab tigtu kakay i Dabid sa keigsà di takà diyà sa medoo etaw. Huenan di, binulitan di Dabid i, guwaen di, “Maen di ya mig-angay ka dini? Ngadan di etaw sa sinaligan ko sa medoo kebilibili ko dutu siedò melabel tanà mediyù dalesan? Netiigan ku egpeolòolò ka daa owoy medaet sa pedu ko, huenan di mig-angay ka dini anì hauwen ko daa sa kegila.”
29 Migsagbì Dabid i, guwaen di, “Ngadan sa binaelan ku, atu, enù ka eg-igsà a ma daa?” 30 Agulé mig-iniyug diyà si Iliyab, owoy mig-igsà dema diyà sa sebaen ma etaw. Dodoo uman etaw eg-igsaan di, nesetepeng doo sa sagbì da diyà sa sagbì sa anay inigsaan di.
31 Na, dinineg sa medoo etaw sa keigsà i Dabid, agulé duen sa migtulon diyà si Saulo. Hê, igpeangay i Saulo Dabid i. 32 Agulé mig-ikagi Dabid i diyà si Saulo, guwaen di, “O Datù, mepion amuk endà mebukul ki danà siedò tegePilistiya. Enù ka aken sa egsugùsuguen ko mangay mimatay kenagdi.”
33 “Endà,” guwaen i Saulo. “Endà mekegaga ka umatu diyà siedò tegePilistiya, enù ka batà ka pelawà owoy kagdi sa mebalaw sundalu edung egoh di batàbatà pelawà.”
34 Dodoo endà netepelan Dabid i. Huenan di, mig-ikagi, guwaen di, “O Datù, aken sa tegeipat sa medoo kebilibili sa emà ku. Amuk tumebow sa liyun ataw ka sa oso owoy amuk kuwaen di sa sebaen kebilibili ké, 35 lohoten ku doo malbal enù ka alukan ku sa kebilibili kinuwa di. Amuk isaluwan di aken, esoen ku sa bekeleng di owoy imatayan ku. 36 Tuu doo, inimatayan ku dé sa liyun owoy sa oso. Hediya ma sa baelan ku diyà siedò tegePilistiya endà egpigtuu diyà si Nemula, enù ka takaan di egpelobolobowon sa medoo sundalu i Nemula, sa Nemula nehagtay. 37 Inalukan i Datù Nemula aken kedu diyà sa egkegaga sa liyun owoy sa oso, huenan di kagdi dema sa umaluk kenak kedu diyà sa egkegaga siini tegePilistiya.”
Hê, guwaen i Saulo, “Na, angay ka dé diyà sa kuntelà ta owoy metabangan ka doo i Datù Nemula.” 38 Agulé igpekawal di diyà si Dabid sa hagdi ginis atung eggamiten di eggila owoy sa sayap di galang owoy sa anit di ma. 39 Agulé igseliket i Dabid sa sundang i Saulo, owoy egtukaw egbigkat. Dodoo endà egkebingbing di duu enù ka endà nelayam di. Agulé guwaen di diyà si Saulo, “Endà mekegaga a ini i, enù ka endà nelayaman ku duu.” Huenan di, linengà i Dabid iya wé. 40 Agulé kinuwa di sa tuked di owoy mig-angay eghudut sa lima tukééy batu melanih diyà sa lawa’t wayeg, owoy ig-awuh di diyà sa puyut di. Ligò di egsabà sa éhê palas pitik di, mig-angay egtelabuk diyà si Gulayat.
Ini Sa Egoh I Gulayat Tinabanan I Dabid
(1 Samuwél 17:41-54)
41 Na, eg-angay ma Gulayat i egsiegung diyà si Dabid, owoy eghuna diyà si Gulayat sa atung tegeuwit sa kelasag di. 42 Egoh di mig-inengteng si Dabid, eg-alumen di enù ka batà daa owoy metolol ma sa palas di. 43 Mig-ikagi Gulayat i, guwaen di, “Ngadan sa kehaa ko kenak, tuyang a daa? Maen di ya balbal daa sa egsabaan ko?” Agulé tinubad di Dabid i danà sa medoo egpenemulawen di. 44 Inenggat di ma, guwaen di, “Na, téél ka dé angay ka dini enù ka ipekaen ku kuna diyà sa medoo manuk owoy sa medoo uled tanà.”
45 Migsagbì Dabid i, guwaen di, “Eg-angayen ko aken eggila danà ko egsalig diyà sa sundang owoy sigpù owoy gelat. Dodoo si Datù Nemula épê dakel egkegaga polo sa naken egsaligan amuk eg-angayen ku kuna eggila. Kagdi sa Nemula egpigtuuwen sa medoo tegeIslaél sa takaan ko egpeumàumaan. 46 Ini egoh di ibegay di dé kuna diyà kenak. Tabanan ku kuna owoy tagpeden ku sa ulu ko. Owoy ipekaen ku ma kuna lapeg sa medoo duma ko diyà sa medoo manuk owoy sa medoo uled tanà ma. Huenan di, metiigan sa langun etaw duen sa Nemula épê dakel egkegaga egtabang sa medoo tegeIslaél. 47 Owoy metiigan doo sa langun etaw dahini mekegaga Datù Nemula i umaluk sa medoo etaw di, apiya di pa endà pineukit di diyà sa sundang owoy sigpù. Kagdi sa tumaban amuk gumila sa etaw di, owoy ipelugpì di doo kiyu diyà kenami ini egoh di.”
48 Agulé mig-uman Gulayat i eg-angay egdapag diyà si Dabid, owoy migletu ma Dabid i anì mesetelabuk da. 49 Eg-esoen di sa batu dalem sa puyut di owoy inasadan di sa éhê palas pitik di. Hê, pinitik di Gulayat i. Nekesugat diyà sa kilay di owoy nekelebeng ma sa batu. Hê, nekelagkeb Gulayat i. 50 Na, tinabanan i Dabid Gulayat i danà sa pitik daa, owoy neimatayan di ma apiya di pa endà duen sundang di. 51 Hê, migletu Dabid i eg-angay eg-utas si Gulayat. Migtigdeg diyà sa dapag di owoy hinugut di sa sundang i Gulayat, agulé tinagped di sa ulu di.
Na, egoh sa medoo tegePilistiya mighaa nematay dé Gulayat i sa egsaligan da, migpelaguy da langun. 52 Agulé migpetibos sa medoo tegeIslaél owoy sa medoo tegeHuda, owoy linohot da ma sa medoo tegePilistiya taman nekeuma da diyà sa menuwa Gat owoy taman sa bengawan sa kutà menuwa Ikelon. Minetelagtag sa medoo tegePilistiya inimatayan da diyà sa dalan eg-angay Salaim dò taman sa menuwa Gat owoy menuwa Ikelon. 53 Na, egoh sa medoo tegeIslaél neubus dé miglohot sa medoo tegePilistiya, migpelikù da owoy eg-atulen da sa langun taman diyà sa kenà sa medoo tegePilistiya miglawì. 54 Agulé ighated i Dabid sa ulu i Gulayat dutu menuwa Hélusalém dò, dodoo inuwit di sa medoo kinemkem i Gulayat egoh di miglikù.