9
Ini Sa Egoh I Samuwél Migtandà Si Saulo Sa Datù Da
(1 Samuwél 9:1-2,15-17; 10:1)
1 Na, diyà sa umpungan tugod i Bénhamin, duen sa mapulù etaw kawasà, si Kis. Kagdi sa anak i Abiyél owoy sa bébê i Siyol owoy sa bébê lulud i Bikolat owoy sa bébê siku i Apiya. 2 Na, duen sa anak i Kis, si Saulo. Nepasad dé melaud owoy tigtu mepion sa palas di. Uman pa mehagtaw diyà sa langun tegeIslaél enù ka taman da daa diyà sa pelula di, owoy uman pa sa hagdi ketolol diyà kenagda langun.
9:3-14 Na, si Saulo sa sinugù sa emà di anì lagbeten di sa duma hinagtay da asnu netelas. Egoh di egtemù eglagbet, nekeangay diyà sa menuwa Lama kenà i Samuwél eg-ugpà.
15 Na, agdaw simag sa egoh i Saulo tumebow diyà Lama, inikagiyan i Datù Nemula Samuwél i. 16 Guwaen di, “Simag éhê ini mendaa sa ulas, peangayen ku diyà keniko sa etaw kedu diyà sa umpungan tugod i Bénhamin. Hududi ko lana sa ulu di anì metandaan ko kagdi sa kumedatù diyà sa medoo etaw ku tegeIslaél. Alukan di kagda kedu diyà sa medoo tegePilistiya kuntelà da, enù ka hinaa ku sa lihay sa medoo etaw ku owoy dinineg ku ma sa kepegeni da tabang.”
17 Agulé egoh di sumimag egoh i Samuwél mighaa si Saulo, mig-ikagi Datù Nemula i diyà kenagdi, guwaen di, “Ini sa maama tinulon ku diyà keniko. Kagdi sa kumedatù diyà sa medoo etaw ku.”