Tegekukum 2

Ini Sa Pesuwan I Nemula Endà Dé Migtabang Sa Medoo TegeIslaél

¹ Na, mig-angay sa Egsugùsuguen i Datù Nemula diyà sa menuwa Bokim kedu diyà Gilgal, enù ka duen sa ikagiyen di diyà sa medoo tegeIslaél. Guwaen di, “Linaun ku kiyu kedu Igiptu dò, owoy inuwit ku ma kiyu dahini diyà siini tanà igpasad ku ibegay diyà sa medoo tupù yu. Owoy mig-ikagi a endà tipayen ku duu sa nesepasadan ta. ² Hinawidan ku kiyu anì endà mesepasad yu sa medoo tapay etaw eg-ugpà diyà siini tanà. Igsugù ku polo keniyu ipelukat sa medoo atung kenà da eg-ulow sa ibegay da diyà sa medoo egpenemulawen da. Dodoo endà egpangunutan yu duu iya wé igsugù ku keniyu. Maen di ya endà egpigtuuwen yu duu aken? ³ Huenan di, ini sa ikagiyen ku diyà keniyu ini egoh di. Endà dé tabangan ku duu kiyu humemaga sa medoo tegeKanan amuk sumeilud-ilud yu. Dodoo edung ini egoh di, kuntelaen da dé kiyu lagà da sa dugi diyà sa kabigan yu. Owoy lagà katal ma diyà keniyu sa medoo egpenemulawen da.”

⁴ Na, egoh sa medoo tegeIslaél migdineg iya wé inikagi sa Egsugùsuguen i Datù Nemula, migsinegaw da temù. ⁵ Huenan di, pinengadanan da Bokim iya wé kenà da. Agulé inulow da sa medoo hinagtay inimatayan da enù ka egpegeniyen da sa kepeuloy i Datù Nemula diyà kenagda.

Ini Sa Egoh I Hosuwa Nematay

⁶ Na, pineipanaw i Hosuwa sa medoo tegeIslaél owoy eg-angay sa uman segeumpung egkuwa sa hagda baed tanà diyà sa tanà Kanan. ⁷ Na, egoh i Hosuwa nehagtay pelawà, egpangunutan doo sa medoo tegeIslaél Datù Nemula i. Owoy egpangunutan da ma taman sa egoh da nehagtay pelawà sa medoo ulu-ulu mighaa sa langun egkegaipan etaw binaelan i Datù Nemula diyà sa medoo tegeIslaél. ⁸ Agulé nematay Hosuwa i anak i Nun sa sinaligan i Datù Nemula. Melatuh sepulù gepalay sa kelukes di egoh di nematay. ⁹ Iglebeng da diyà sa hagdi baed tanà dutu Timnat-Silah diyà sa getan-getan diyà sa uwang tanà sa medoo tugod i Ipelaim, denu belabagan sa Getan Gaas.

Ini Sa Egoh Da Migsabuh Egpenemula Si Datù Nemula

¹⁰ Na, egoh da i Hosuwa nematay owoy sa medoo duma di nesetepengtepeng kelukes, iya daen sa nesamà sa medoo batàbatà endà neketiig da si Datù Nemula owoy endà ma netiigan da duu sa medoo mepion binaelan di diyà sa medoo tegeIslaél. ¹¹ Huenan di, binaelan sa medoo tegeIslaél sa medaet diyà sa kehaa i Datù Nemula owoy pinenemula da polo sa Baal. ¹² Migsabuh da dé egpenemula si Datù Nemula, sa Nemula egpigtuuwen sa medoo tupù da owoy sa mig-uwit kenagda kedu Igiptu dò. Mig-edung da polo egpenemula sa medoo egpenemulawen sa medoo liyu balangan etaw eg-ugpà medapag diyà kenagda owoy migligkued da diyà sa taengan da. Huenan di, tigtu egpebuliten da Datù Nemula i ¹³ enù ka ininiyugan da kagdi i owoy egpenemulawen da polo sa Baal owoy sa Astalot. ¹⁴ Na, danà sa kebulit i Datù Nemula sa medoo tegeIslaél, huenan di pinandayà di dé kagda anì tumaban sa medoo kuntelà da tegepengayaw owoy anì mepeka da ma sa medoo langun taman da. Tigtu endà duen megaga sa medoo tegeIslaél sumegumalang. ¹⁵ Uman mangay da gumila, egkuntelaen i Datù Nemula dema kagda anì tabanan da, lagà mendaa sa inikagi di diyà kenagda egoh di migpasad diyà kenagda. Huenan di, egkepasangan da temù.

¹⁶ Na, apiya di pa eg-indawen i Datù Nemula sa medoo tegeIslaél, duen doo sa medoo ulu-ulu ginelal di anì umaluk kenagda kedu diyà sa egkegaga sa medoo tegepengayaw. ¹⁷ Dodoo tapay doo endà egdinegdineg sa medoo tegeIslaél diyà sa medoo ulu-ulu da. Ininiyugan da Datù Nemula i enù ka egkeiyapan da polo egpenemula sa medoo liyu egpenemulawen da owoy pineulan da ma sa kepangunut da diyà sa medoo uledin i Nemula pinangunutan sa medoo tupù da. ¹⁸ Uman dumuen sa ulu-ulu da gelalen i Datù Nemula, tabangan di anì mealukan sa medoo tegeIslaél kedu diyà sa medoo kuntelà da taman sa egoh di mehagtay pelawà sa ulu-ulu da. Enù ka eghiduwan i Datù Nemula doo kagda danà da migdolongdolong egoh da nepasangan danà sa dakel lihay da. ¹⁹ Dodoo amuk mematay dé sa ulu-ulu da ginelal i Nemula, pelikù dema sa medoo tegeIslaél diyà sa tapay adat da owoy uman pa dema medaet sa egbaelan da diyà sa kedaet binaelan sa medoo tupù da. Egpenemulawen da dema sa medoo liyu egpenemulawen da owoy eg-uman da egbael medaet enù ka metegas sa ulu da.

²⁰ Na, danà iya wé binaelan da, egkeumanan sa kebulit i Datù Nemula diyà sa medoo tegeIslaél. Guwaen di, “Tigtu migtipay siini medoo etaw diyà sa nesepasadan ké sa medoo tupù da, owoy endà ma egpangunutan da duu sa igsugù ku. ²¹ Huenan di, endà dé hemagawan ku duu sa medoo nesamà tegeKanan eg-ugpà pelawà diyà siini tanà egoh i Hosuwa nematay. ²² Enù ka ipeukit ku diyà kenagda sa ketepeng ku sa medoo tegeIslaél anì mehaa amuk tuu sa kepangunut da diyà sa uledin ku amuk éhê mendaa sa kepangunut sa medoo tupù da.” ²³ Huenan di, pinandayà i Datù Nemula sa keugpà sa medoo tapay etaw nesamà dahiya sa endà pa tinabanan i Hosuwa duu owoy endà ma eghemagawan di duu kagda mapes.