34
Ini Sa Egoh I Mosis Nematay
1 Agulé kedu diyà sa sugud Moab Mosis i owoy migtekedeg diyà sa getan Nibo taman diyà sa pulu tuduk Pisga sa denu tebowon agdaw amuk diyà ki sa menuwa Héliko. Dutu igpesugpayal i Datù Nemula diyà kenagdi sa uwang tanà Kanan, edung diyà sa uwang tanà Galaad taman sa uwang tanà denu belabagan sa mekuwa sa medoo tugod i Dan, 2 owoy sa uwang tanà mekuwa sa medoo tugod i Naptali owoy sa uwang tanà mekuwa sa medoo tugod i Ipelaim owoy sa medoo tugod i Manasa. Hinaa di ma sa uwang tanà mekuwa sa medoo tugod i Huda taman sa Dagat Méditeliya denu eledan agdaw, 3 owoy sa tanà Negeb denu kimataan, owoy sa sugud nekeedung diyà sa menuwa Sowal taman sa menuwa Héliko kenà di duen medoo éhê lawa’t palas lepò. 4 Agulé mig-ikagi Datù Nemula i diyà si Mosis, guwaen di, “Iya sa tanà igpasad ku diyà sa medoo tupù yu, si Ablaham owoy si Isak owoy si Hakob, sa tanà ibegay ku diyà sa medoo tugod da. Igpehaa ku daa diyà keniko, dodoo endà mekeangay ka dutu.”
5 Na, nematay Mosis i sa sinaligan i Datù Nemula dutu siedò tanà Moab, enù ka neketuu sa inikagi i Datù Nemula. 6,7 Melatuh duwa pulù gepalay sa kelukes di egoh di nematay, dodoo tapay doo mebagel sa lawa di owoy tapay ma doo meilag. Agulé iglebeng i Datù Nemula diyà sa sebaen sugud diyà sa tanà Moab denu dibaluy sa menuwa Bétpiyol. Dodoo taman ini egoh di endà duen etaw neketiig sa tigtu kenà sa lebeng di. 8 Agulé neulaanan sa medoo tegeIslaél Mosis i owoy egdelawit da taman telu pulù agdaw diyà sa sugud diyà sa tanà Moab.
9 Na, tigtu migkilantek Hosuwa i anak i Nun danà i Mosis migtenà sa belad di diyà sa ulu di anì egtandaan di si Hosuwa sa mekesambì kenagdi. Huenan di, pinangunutan sa medoo tegeIslaél Hosuwa i owoy pinigtuu da ma sa medoo uledin i Datù Nemula igsugkow i Mosis diyà kenagda.
10 Na, edung egoh iya, endà dé duen sa liyu tegesugkow i Nemula diyà sa medoo tegeIslaél nekeiling si Mosis sa sinetawit i Datù Nemula. 11 Endà ma duen sa liyu tegesugkow i Nemula egpekebael panduan éhê sa igpebael i Datù Nemula diyà si Mosis dutu Igiptu dò egoh di migbael panduan diyà si Datù Palo owoy diyà sa medoo salu di owoy diyà sa uwang tanà Igiptu. 12 Owoy endà ma duen sa liyu tegesugkow i Nemula egpekebael sa panduan egkegaipan etaw éhê sa binaelan i Mosis diyà sa taengan sa medoo tegeIslaél.