¹ Na, sa egoh di endà pa duen sa langun eghauwen, iya sa muna binaelan i Nemula, langit owoy tanà. ² Na, egoh iya, uloy pelawà sa tanà enù ka endà pa duen selepangan sa egoh-egoh di, owoy endà pa duen sa langun taman di. Nesangkep wayeg pelawà sa tanà owoy tigtu deleman ma. Agulé, eg-ipanawpanaw sa Suguy i Nemula lagà kelamag.

³ Na, eg-ikagi Nemula i, guwaen di, “Ungayà ku dumuen legdaw.” Hê, migduen dé. ⁴ Agulé, egoh di eghaa, neiyapan di temù sa legdaw enù ka tigtu mepion. Agulé, sinepeiges di sa legdaw owoy sa deleman. ⁵ Iya sa kepengadan di sa legdaw, agdaw. Pinengadanan di ma sa deleman, sigep. Agulé kumehapun owoy sumigep ma dé. Egoh di sumimag, neelut ma dé sa muna agdaw egoh i Nemula migbael.

⁶ Na, eg-ikagi Nemula i, guwaen di, “Ungayà ku dumuen awang anì meduwa sa kenà wayeg.” ⁷ Agulé, binaelan i Nemula sa awang anì sepalaken di sa wayeg. Diyà awang sa kenà sa medoo gaeb sa keduwan udan, owoy diyà tanà sa kenà sa tigtu wayeg. Hê, migduen dé. ⁸ Iya sa kepengadan di, awang. Agulé, kumehapun owoy sumigep ma dé. Egoh di sumimag, neelut ma dé sa keduwa di agdaw egoh i Nemula migbael.

⁹ Na, eg-ikagi Nemula i, guwaen di, “Ungayà ku mesetipon siini wayeg anì dumuen dagat owoy tanà ma.” Hê, tuu doo, nesetipon dé. Duen dé sa dagat owoy tanà. ¹⁰ Iya sa ngadan igbegay di diyà sa wayeg sinetipon di, dagat. Iya sa ngadan sa sebaen, tanà. Agulé, neiyapan i Nemula enù ka tigtu mepion. ¹¹ Agulé, eg-ikagi dema Nemula i, guwaen di, “Ungayà ku tumunas diyà siini tanà sa medoo balangan keluwen owoy sa medoo balangan mehemula egbunga owoy sa medoo balangan kayu egbunga. Ungayà ku ma dumuen sa dalem bunga da anì tumunas da dema. Kedu diyà siini tanà.” Hê, tuu doo, migduen dé. ¹² Migtunas da diyà tanà sa medoo balangan keluwen owoy sa medoo balangan mehemula owoy kayu. Agulé, neiyapan i Nemula enù ka tigtu mepion. ¹³ Agulé, kumehapun owoy sumigep ma dé. Egoh di sumimag, neelut ma dé sa ketelu di agdaw egoh i Nemula migbael.

¹⁴ Na, eg-ikagi Nemula i, guwaen di, “Ungayà ku dumuen lumegdaw diyà langit anì mesepalak sa sigep owoy agdaw anì dumuen ma tandà diyà langit kenà da meketiig sa etaw sa medoo egbaelan da diyà tanà, ataw ka sa agdaw di ataw ka sa bulan di ataw ka sa palay di. ¹⁵ Iya ma sa pesuwan di anì sumenang da diyà langit anì melegdawan ma sa tanà.” Hê, tuu ma doo, duen dé eglegdaw diyà langit. ¹⁶ Binaelan i Nemula sa duwa dakel legdaw. Sa sebaen temù dakel, iya sa atung eg-ipat tanà amuk agdaw. Sa sebaen dakeldakel, iya sa atung eg-ipat tanà amuk sigep. Binaelan di ma sa medoo bituen. ¹⁷ Igtagù i Nemula diyà langit sa agdaw owoy sa bulan owoy sa bituen anì melegdawan sa tanà. ¹⁸ Iya ma sa pesuwan di anì ipaten da sa tanà amuk agdaw owoy sigep anì mesepeiges sa legdaw owoy sa deleman ma. Agulé neiyapan i Nemula enù ka tigtu mepion. ¹⁹ Agulé, kumehapun owoy sumigep ma dé. Egoh di sumimag, neelut ma dé sa keepat di agdaw egoh i Nemula migbael.

²⁰ Na, eg-ikagi Nemula i, guwaen di, “Ungayà ku dumuen sa eg-ipanawpanaw diyà sa langun wayeg diyà tanà sa medoo balangan uton owoy sa medoo balangan hinagtay eghauwen dalem. Ungayà ku kumedoo da ma temù. Ungayà ku dumuen ma eglayanglayang diyà awang, sa medoo balangan manuk.” ²¹ Agulé, binaelan i Nemula sa medoo balangan dakel eg-ugpà diyà dagat owoy sa langun balangan eg-ipanawpanaw diyà dagat owoy diyà wayeg. Binaelan di ma sa langun balangan eglayanglayang diyà awang. Agulé, neiyapan i Nemula enù ka tigtu mepion. ²² Agulé, eg-ikagiyan di kagda enù ka begayan di kagda sa egkegaga da anì umanak da, guwaen di, “Anak yu anì kumedoo yu anì meseluh yu sa dagat owoy sa wayeg, anì meseluh ma sa awang sa medoo eglayanglayang.” ²³ Agulé, kumehapun owoy sumigep ma dé. Egoh di sumimag, neelut ma dé sa kelima di agdaw egoh i Nemula migbael.

²⁴ Na, eg-ikagi Nemula i, guwaen di, “Ungayà ku dumuen diyà siini tanà sa langun balangan eg-ipanawpanaw diyà tanà, sa medoo balangan hinagtay owoy sa medoo balangan uled tanà. Siini tanà sa kenà da eg-ugpà.” Hê, migduen dé. ²⁵ Binaelan i Nemula sa medoo balangan hinagtay owoy sa medoo balangan uled tanà ma. Agulé, neiyapan i Nemula enù ka tigtu mepion. ²⁶ Agulé, eg-ikagi dema Nemula i, guwaen di, “Ungayà ku mael ki etaw sumuet kenita anì dumuen sa meulu-ulu diyà sa medoo uton diyà dagat owoy diyà sa medoo manuk diyà awang owoy diyà sa medoo eg-ipanawpanaw diyà tanà, sa hinagtay owoy uled tanà ma.” ²⁷ Agulé, binaelan i Nemula sa etaw egsuet kenagdi. Si Nemula sa sinuetan da. Maama owoy bayi binaelan di. ²⁸ Agulé, eg-ikagiyan i Nemula kagda enù ka begayan di kagda sa egkegaga da anì umanak da, guwaen di, “Anak yu anì kumedoo yu anì mekeseluh yu diyà sa uwang tanà. Kiyu ulu-ulu sa langun balangan eg-ugpà diyà tanà, sa medoo uton diyà dagat owoy sa medoo manuk diyà awang owoy sa langun eg-ipanawpanaw diyà tanà.” ²⁹ Agulé, eg-ikagi dema Nemula i, guwaen di, “Taa yu, hih. Igbegay ku diyà keniyu sa langun balangan mehemula egbunga owoy sa langun balangan kayu ma egbunga anì dumuen sa mekaen yu. ³⁰ Dodoo, sa medoo keluwen owoy sa medoo daun kayu, iya sa kaenen igbegay ku diyà sa langun hinagtay eg-ugpà diyà tanà, sa langun hinagtay owoy sa langun uled tanà owoy sa langun manuk diyà awang.” Hê, neketuu iya wé. ³¹ Hinaa i Nemula sa langun binaelan di, owoy neiyapan di enù ka anan tigtu mepion. Agulé, kumehapun owoy sumigep ma dé. Egoh di sumimag, neelut ma dé sa keenem di agdaw egoh i Nemula migbael.