येसु मल्स जीवा अरयह्तोग़
28
1 वारमता मुनेता दिया (इतेके ऐतारम दियाते), पङ वीयतस्के मग्डला नाटेनद मरियालि ओसो ताना ऐंगेतद दुस्रा मरियालि, इव गुमयातुन ऊळलाह अताङ. 2 अस्के ऊळाट, इळ्ता बूम पका मेलियता, बाराह्क इतेके देवतुलि देवुळदीपताहि रेगिसि, अद तिळ्ह्प कीस मतद बंडातुन ओर्केडके दोबिसीता, अह कीस ताना पेटळ उदता. 3 अद देवतुलि पुसुल-उळ्मलेह्का मांजिंदु, ओसो तानाङ गेंदेङ कोंगा-बूलालेह्का पका पांड्रि मताङ. 4 तान रेयिसि, पह्रा मनवालोर दिरदिर साङतोर, हातप आतोर.5 अस्के देवतुलि अव आस्किन इता, “मीट रेयमाटु! हव्कनागुटातगा वेळ्हतोन येसुन मीट पर्ह्किह्निर, इद नाक एर्काये.
आस्किन देवतुल कलियिह्ता (28:5)
8 पया अव आस्कु रेयिस मताङ, मति पका गिर्दा आसोरे गुमयातग्डाह चट्पिट पेसिसि माक कग़यवालोरिह्कु इद कबुर वेहतलाहि वित वाताङ. 9 अस्के दोम्क्नेन येसु अविस्किन कलियिस “बेस पिसाटु!” इनजोर इतोग़. कलियतस्के अव ओना एरे अनजि ओनाङ काल्क मोळ्कताङ. 10 अस्के अविस्किन येसु इतोग़, “मीट वेग़्यिमाटु. मति मावोर कग़यवालोरके अनजि ‘गालिलते अन्ह्ट अले, मीक येसुसामि अगान कलियनोग़,’ इनजोर ओरिह्क वेहाटु.”
पह्रातोरा जोल साक्सि
11 अव अनजोर मताङ अस्के गुमयातगा पह्रा मनवालोर वेल्लाटोरे इव आताङ गोटिङ, सहरते अनजि पेर्मालोरिह्क कतम वेहतोर. 12-13 अस्के पेर्मालोर ओसो यहुदिराङ पेदल्क गूडिसि विचर कीतोर, अह कीस पया पह्रातोरिह्कु वेल्लाङे कोताङ ईसि इह वेहतोर: “ ‘माटु गोडनिद्राते मतोम अस्के येसुनाङ कग़यवालोर नग़्का वासि, ओना सेत्तातुन कलिस ओतोर,’ इद्रम इनजोर पोल्लोतुन मिळ्हचि वेहाटु. 14 ओसो इद पोल्लो गुमसिना केवदगा अरता इतेके, माट ओन माने कीसि मीवा पेटळ वाया एवोम,” इनजि पेदल्क इतोर. 15 अदिह्क ओर पह्रातोरु कोताङ एचि, पेदल्क काग़्हतपु अहे कीतोर. अद्रम आस पया इद पोल्लो यहुदि लोकुरगा आबुर अता, नेंडवने ओर अहे इन्ह्तोर.
येसुना आक्रिता उकुम
16 पया इके माट कग़यवालोरोम अक्रा मांदि गालिल पटटे, येसु बेद मेटातगा वाट इनजोर वेहच मतोग़, अगा माट अतोम. 17 अतस्के, माट ओन अगा ऊळिसि मोळ्कतोम, तेला मति ओग़ येसुये आंदोग़ा, आयोग़ा, इनजि मावोर उय्तुर उन्क-मन्क मतोर.
18 अस्के येसु मावा एरे वास इतोग़, “देवुळदीपते ओसो नेदे मनवालोर कतमतोरा पोग़ोन देवुळि नाक पूरा अदिकर ईता. 19 अदिनेनाह्क मीटु अनजि सबे जातिनोर लोकुरगा नावाङ कग़यवालोर आयिर इनजि, ओरिह्कु नावाङ पोल्लोङ वेहचि, देवुळबाबाना ओसो देवुळता मग़ना ओसो देवुळता पवित्र जीवाता पेदिरते एग़ मिहाटु. 20 अह कीसि, बेव अडोङ मीक नना माळलाह वेहतन, अव कतम अडोनु ओरिह्कु माळलाह काग़्हाटु. ओसो ऊळाटु, इद बूम मुळ्न्दनाह्जोमु नना अमेसा मीवा तोळ मह्नने!” इनजि इतोग़.