Pilemon
Pilemonkoloːpé Polké Adnam Doːjíg
1
Ngo Jisu Kiristoké légangé makana:lok du:né Polbí odokké ngoluk bíro Timoti:bí séː doːjíksém,ngoluk mé:bomsunam ajon odokké agergerjon Pilemonkolo:pé, 2 odokké nok okumdok gíkumsuné méngkésunékídíːdoːpé, odokké ngoluk bírmé Appia, odokké ngoluk gerjon ajon Arkipaskoloːpé adlígdung:
3 Ngoluk Abu Ru:né odokké Ru:tum Jisubí nolum aséngémnaː asin-ansíngém bika:langka.
Aipai Binamélaː Kumnam
4 Édíloi ngo nom ngok kumdom mé:pa:doji, ngo lo:dísém ngok Ru:némé aipai bido. 5 Kapila:né Ru:tum Jisukolo nok méːjíksunamémna angunné taniː légaːpé nok ayangém ngo tatpaːsudung. 6 Nok méːjígdém lubinamno no ardakaːlang émna ngo kumbido, odo Kiristokolo ngoluk kanam ainé appíngém no kinjígla kinyé. 7 Nok aya:dé ngom bojérungko mé:pom bitag odokké ngok a:ngém pítamotag, kapila:né bírra no, angunné taniːkídíːdok asiném méːpomotag.
Onesimaské Légangé Kumpaːbinam
8 Odok légaːpé no okkom ipénammén édém idopé ngo kumpaːla ludung. Kiristokolo nok bíro kísapé ngo kínggípé torra nom édém idopé lulíglaːdagai. 9 Émpigeːla ngo nom aipé-méːnamé, ngo nom kumna ludung. Ngo Polbí, míjíngkobo odokké suːsin Kiristo Jisuk légaːpé makanaːlo dung. 10 Ngo ngok ao Onesimaské légangé nom kumdanna ludung, ngok makanaːdok duːdagdo bí ngok aoːpé ikang. 11 Po:pélo bí nokképé agerkamanékkai, émpige:la su:pag bí ngonyík annyiképé nokképélaː ngokképé ageré-kakangku.
12 Ngo bím nokkoloːpé méladlígdungku, ngok aíarké asiném nokkoloːpé mélígdung. 13 Tatpon lutaddok légaːpé ngok makanaːsok duːdagdo, ngo bím sido ngok lédílo du:molí:tagai, nok idumsupékodo bí ngom idumsubilaːyai. 14 Émpigeːla nom tausupoːmaːpé ngo okkomsin ilímang. No ayaːla okkoméi ibidoji édé nok asin araːbokké lenpé lagidag nom bolbodapé imolíːmang.
15 Méngkí, no Onesimasmé appíng ayír légaːpé paːladdokupé émna bí nokkolokké longkoloːnyi légaːpé dukpagla dungngapé. 16 Odokké suːpag bí pagbongkomaːbo, émpige:la pagbokonémyaːsin aiyaːnéko, bí méːbomsunam bírokobo. Bí taniːkísapélaː Ruːtumkolo bíro kísapé, ngokképé airuːpé méːbomsunamko émpigeːla nokképé méːbomsuyangoːyanamko.
17 Kiristoké légaːpé no ngom ajon kísapé sabduːmílo, ngom boríksukampé Onesimasmé boríksulang. 18 Bí nom oːkaiko imurtagaːmílo émmanggom nom o:kaiko bikupénamé kaːduːmílo, édém ngokkolok laːlangku. 19 Ngo, Polbí, sém aíké alakki addungː Ngo édém biladbikupé. Émpigeːla nok turra duːnamdém ngom bilatkupénammé édém no mitpanyok. 20 Édémpila, ngok ajona, ngok asiném méːpomotei, Kiristokolo bíro kísapé ayaːla édém ngom ibilangǃ
21 Ngo kindagrung ngok lunam appíːdém no ibiruːyé, odokké ngok lunamdémyaːsin no ibadbiye. 22 Odokké abangkoda: Ngok léga:pé soyarko moninsunoːlang, kapila:né noluk appíngké kumnamém Ruːnébí tadbila bí ngom nolum biladyéku émna ngo akasula dung.
Bitérnam Asin-aséng
23 Kiristo Jisuk légaːpé ngok makana:sok du:jon Epaparsbí, nokkolo:pé asin-aséngém séglígdung. 24 Odokké édémí:pé ngok gerjon Margbí, Aristarkasbí, Demasbíːla Lugbí asin-aséngém séglígdung.
25 Noluk appíngké lédílo Ruːtum Jisuké aséngé dungkaːlangka.