Surano
Yahya
da ko'otolu
1
1 Die sura mebinta hai aku kamotu'ano jema'a, nta dungku hai Gayus da telou ronga da to'u-to'u nilolarongku.2 Ku'amalaakoko petila nilouku, kau daasi e'elengua moroso ronga moico luwu tora-torau, kanapo pelaroau. 3 Mohende to'uaku hi daa opia petila pe'asa imaninto da leu mo'awaakuo dadaano torau, hiu daa nunu'o pompotisu da menona. 4 Nahina pengkenano mohende larongku hicu podeahira raro anaku da nunu'o da menona.
Tulumihira miano da sisimbu leleako haratia
5 Petilaku da telou, konianto'uko tulumihira raro mpetila da leleako haratia, mau ki sami da'apo mekakonea. 6 Arihiramo mo'awaakondo jema'a na'ai dadaano pololarou. Moicoomo kiu pokolako'ira moi-moico, kana da po'eheno Apu Alla. 7 Nangkua neeno Apu Yesus kando melako, nahina hapa-hapa da inawando mebinta hai ira miano da sai da'apo to'orio Apu Alla. 8 Nangkuamo koie, paraluu'o kato petokahira miano da kana ko'ira, kato tewali simbau mpohedondo hindo daa leleako pompotisu da menona.
9 Ariaku moburi sura dungku hai jema'a, sawali i Diotrefes, da mokea tewali ponggawando, nai padulicami. 10 Kaku teleupo, kaku sabahako pera niweweuno, yahoo sangkeli ngkabariakami. Koie na'iaapo perano, sawali nai pontarima ko'ira petila da leu. Deenapo tabe'ira miano da ehe tarimahira, ronga luarakohira mebinta hai jema'a.
11 Petilaku da telou, osie monunu da mosa'o, te'iaasi da moico. Inai da moweweu da moico, koiemo mianono Apu Alla. Ronga miano da moweweu da mosa'o, nai da'apo to'orio Apu Alla.
12 Luwu miano reree'o i Demetrius. Dahano nireree tendenomo hi nunu'o pompotisu da menona. Cami na'amami koreree'o, ronga dakomo to'orio hapa da pinokodungkumami menonaa.
Kompura-puraano ino'awa
13 Dahopo me'alu da paraluu kudaa nta mokodungku'akoko'o, sawali nasaku ehemo nta moburiakoko. 14 Pomperahi-rahincu nai da'amo mengkau kato mentepo'awa penda mpogau tepora'i.
15 Ehepo kai e'elengua momapu penaau. Simbau'u da meda'a na'ai mokatuko salamu. Pokodungku'akuo salamungku hai ira simbauku kokeena tee-tee'asa miano.