Gwaslay ahay tə bəbay a tinen ahay
6
1 Kwanay gwaslay ahay,
bənen anan à 'am wa anà bəbay a kwanay ahay tə may a kwanay ahay,
kawa ana Bahay a mənuko sa gan may ata awan.
Wita nà,
way aday təɗe a zla apan ɗo a Yesu ahay tâ ga anan ata awan.
2 'Am a Mbərom a ja nà:
«Ɗəfan apan anà bəbay anak tə may anak.
ª» Wita nà,
nga sa 'am mama'am a mbala a Mbərom sa var ta sə zlapak uko apan tə way inde ata awan.
3 'Am anahan a sə zlapak uko anan ata nà,
natiya:
«Kak kə ɗəfak atan apan nà,
ngama i tərak,
ki ga zile pə daliyugo.»
4 Kwanay bəbay ahay ite,
kâ si gen way sə cəɓan anà gwaslay a kwanay ahay bay,
əna jen atan pə akəta,
aday tətiken atan anan way nà,
kawa sa zlan à nga anà Bahay a mənuko ata awan.
Ɓile ahay tə bahay a tinen ahay
5 Kwanay ɓile ahay,
ɗəfen anan apan anà bahay a kwanay ahay həna pə daliyugo ata awan,
bənen atan à 'am wa tə ajəjar a kosl kosl jiga awan,
kawa kə ɗəfen anan apan nə anà zek ana Almasihu awan.
6 Ɗəfen atan apan wanahan anga sa jəka ti ɗəfak ikwen iɗe ata bay,
kabay anga sa zlan atan à nga ata bay.
Əna gen mer su way a kwanay nà,
anga sa zlan à nga à Mbərom aday tə mivel kərtek aya awan,
anga kwanay nə ɓile ana Almasihu ahay.
7 Gen mer su way nà,
tə ataslay mivel a,
kawa ki gen anan mer su way nə anà Bahay a mənuko,
bina anà ɗo zənzen a bay.
8 Sənen apan lele:
Kwa iken ɓile,
kwa iken ɓile bay fok nà,
ka gak mer su way lele aya cəna,
Bahay a mənuko i varak apan magwagway anahan a way anahan.
9 Kwanay bahay ahay ite,
gen anan nga anà ɓile a kwanay ahay tə cəveɗ awan.
Mbəsiken 'am sə kətəɓar atan à alay wa re.
Anga kə sənen apan zle,
kwanay tə tinen a təke fok nà,
ɗo sə lavak ikwen nga inde kərtek à mburom.
Winen nà,
a ca pikwen fok hərro à alay kərtek a wa.
Way sə alay su ɗo a Yesu ahay
10 Həna kutok nà,
təren ɗo gədan aya njənnjan,
mə tavay aya lele tə məgala ana Bahay a mənuko.
11 Təmihen way sə alay a Mbərom sə varak ikwen ataya à alay inde,
anga aday sə tavan pa 'am anà wurwer ana Fakalaw.
12 Anga vəram a nuko saa ga ata nà,
ɗi ga nə tu ɗo zənzen aya bay.
Ɗi ga vəram ata nà,
tə apasay lelibay aya aday tə bahay a tinen aya təke re.
Tinen tə lavan nga anà daliyugo a anan həna mi nes ata awan.
Aday vəram a mənuko asa nà,
tə way lelibay aya à wulen ata ana bagəbaga mburom tə daliyugo ata awan.
13 Anga nan kutok,
ren way sə alay a Mbərom sə varak ikwen ata à alay inde,
anga luvon a maniɗe ata kà nak ahay pikwen sa naa pa kwanay.
Təren pa 'am nà,
ɗo mungol aya awan.
Husen anan vəram a kwanay,
ki men anan wa bay jiga awan.
14 Matanan,
həna nà,
liven zek,
tiven nà,
mungol mungol a kutok.
Ɗiɗek a Mbərom i təra kawa zana ma ɓan a à zar kutov dərkat ata kutok.
Way lele aya pa 'am a Mbərom ti tərak ikwen kawa palalam sə njamde pə dəginegine.
15 Alavay zek a kwanay sə ɗakay anan ləbara mugom a sə varan zay anà ɗo ahay fok ata i tərak ikwen kawa təkarak à saray a kwanay ahay inde.
16 Kwa siwa fok,
ɗəfen nga pə Yesu tə mivel kərtek awan.
Ata i tərak ikwen mbaray sə kəcaw pikwen wa gadam ana Fakalaw sə mbalay kwanay ataya awan.
Kwa gadam ataya tinen tə uko aya dəp nà,
mbaray ata i mbacay anan.
17 Mbərom kə̀ təmak kwanay.
Ɗəfen apan nga aday i tərak ikwen dugwala à nga a kwanay inde.
Bənen anan 'Am a Mbərom nə lele,
i tərak ikwen kawa maslalam ana Apasay sə varak ikwen ata awan.
18 Gen anan amboh à Mbərom tə mivel kərtek a kwa siwa siwa fok,
kawa ana Apasay anahan a sa taa ɗakak ikwen anan ata awan.
Gen anan amboh à Mbərom sə cəce panan wa way ahay cara cara.
Kâ sa njəken anan ahan sa ga amboh matanan ataya bay,
liven zek lele.
Matanan gen amboh anga ɗo a Yesu ahay fok re.
19 Gen amboh anà Mbərom anga nen,
aday â vuro cəveɗ sa ja anan 'am anahan,
aday nə̂ ɗakay anan ləbara anahan mugom a mənjəna ajəjar.
Əna nə̂ ɗakay a nà,
way a Mbərom mi ɗer aya sə ɗuko anan ata fok.
20 Nen à dangay nà,
anga Yesu kə̀ slənak nen sə ɗakay anan ləbara mugom a pə winen awan.
Matanan,
gen anan amboh à Mbərom anga aday nə̂ ɗakay anan 'am anahan ata cərah mənjəna zlawan,
kawa təɗe abay nə̂ ɗakay anan ata awan.
Pol a jan 'am anà ɗo ahay
21 Na gan may həna nà,
kə̂ sənen anjahay uno ti mer su way uno à man a anan ata ite.
Tikikus nà,
mərak uno,
car uno re,
aday winen ɗo sa ga mer su way ana Bahay a mənuko tə mivel kərtek awan.
I mak ikwen anan ləbara uno ahay fok.
22 Anga nan,
həna nen apan ni slənak anan ayak à man a kwanay,
saa ɗakak ikwen anan ləbara a manay ahay fok.
Ata aday i mak ikwen a mivel ù doh lele kutok.
23 Atə Bəbay Mbərom tə Yesu Almasihu Bahay a mənuko,
tə̂ varan anà mərak ahay nə zay,
asan zek,
tə məgala sə aɗaf nga a tinen pə Yesu.
24 Sumor a Mbərom â təran anà ɗo sə pəlay Bahay a mənuko Yesu Almasihu tə asan zek a sa ndav kulibay ataya fok.