Muko anan zek ì zek ahay
6
1 Mərak uno ahay,
kə cinen anan anà ɗowan a winen apan i ga ines cəna,
kwanay aday Apasay a Mbərom a lavak ikwen nga ataya nà,
men anan pə cəveɗ lele awan asa,
əna tə mivel səkəffe awan.
Əna gen anan nga anà zek a kwanay aya awan.
Bay nà,
ki sa slihen uda re.
2 Men anan zek ì zek ahay à ɗəce a kwanay ahay inde.
Kak ka sak i gen matanan cəna,
ata kə ɗəfen anan apan anà 'am a Almasihu a kutok.
3 Kak ɗowan a kə̀ bayakak nə winen ɗo məduwen a aday winen ɗo kəriya cəna,
kə̀ sapatak anan nga anahan.
4 Kuwaya â ca pə azla anahan awan aday.
Kak winen lele nà,
ata i taslay anan mivel ti mer su way anahan a sa ga tə alay anahan awan,
bina,
anga a lavay anan mer su way anahan ta su ɗo hinen ata bay.
5 Kuwaya â tihen nga nà,
anà mer su way anahan a sa ga pa 'am a Mbərom,
aday a faɗan gugo ata awan.
6 Ɗowan a winen apan i tətakan anan way anà ɗo a Yesu ahay cəna,
ɗo a Yesu ataya tə̂ gəzla anan way a tinen ahay fok tə ɗowan ata awan.
7 Kə̂ sapiten nga a kwanay ahay bay,
ɗowan sa mba apan sə gəsle anan tə Mbərom nà,
ibay.
Kuwaya i halan nga nà,
anà way anahan a sa casl ata awan.
8 Kak a ga nə way sa zlan à nga ì zek ahay ɗəkɗek,
i mac nə tə way ataya awan.
Əna kak a ga nə way sa zlan à nga anà Apasay a Mbərom nà,
i mac itəbay,
əna Apasay a Mbərom i varan sifa sa ndav bay ata awan.
9 Kak matanan cukutok nà,
pərahuko anan azar sa ga way lele aya awan,
ɗâ ya nga bay.
Anga kak ɗa yak nga sa ga way a lele ataya bay cəna,
à alay inde nà,
ɗi saa njaɗ anan way lele aya awan.
10 Anga nan,
həna nà,
alay a inde anga aday ɗâ gan way lele aya anà ɗo ahay fok,
mə zakan a anà mərak a mənuko ɗo sa ɗaf nga pə Yesu Almasihu ahay ataya awan.
'Am mədakwidok aya awan
11 Ənga,
cen pə way uno a sə vindek ikwen ayak a anaya aday,
nə vindek ayak nə ɓərzlozlo tə alay uno awan.
12 Sa gak ikwen bəlaray sa gaɗ mədəndalas nà,
ɗo sa gan may tâ zlan à nga anà ɗo ahay fok ataya awan.
Ta ga matanan nà,
anga aday tâ njaɗ ɗəce anga sə ɗakay anan amac a Yesu Almasihu pə dədom mə zləlngaɗ ata bay cəna coy.
13 Kwa tinen aya ɗukwen,
tə ɗəfan apan anà Tawrita ana Yahuda ahay bay re.
A nan atan nə kwanay kə̂ gəɗen mədəndalas anga aday tə̂ həran nga ì zek anga kə bənen atan à 'am wa.
14 Nen ite nà,
ni həran nga anà zek nà,
si anga amac ana Bahay a mənuko Yesu Almasihu pə dədom mə zləlngaɗ ata awan.
Pi nen nà,
way sə daliyugo a anan ataya fok tə tərak kawa way kəriya aya awan anga amac anahan.
Nen a ɗukwen,
nə tərak kawa ɗo ma mac a pa 'am sə way sə daliyugo ahay re.
15 Kwa ɗowan a nə ma gaɗ mədəndalas awan,
kwa ɗowan a nə ma gaɗ mədəndalas a itəbay,
a ga awan ibay.
Way sa mak uko zek cəna,
təruko ɗo wiya aya awan.
16 Ɗo sə pərahan azar anà way uno sa ja ataya,
aday ɗo a Yesu ahay à wulen ana Isəra'ila ataya ɗukwen,
Mbərom â varan atan zay anahan,
aday tâ gan ì zek wa.