Zek a Yesu a mbəɗa pə iɗe ana njavar anahan ahay
17
1 Pə dəɓa anahan a wa kutok,
a ga luvon ahay mbərka nà,
Yesu a gəɓa pə azar Piyer,
Yakuba tə apan Yuhana mərak ana Yakuba,
ta ján taayak à ɓəzlom a inde zəbor awan.
2 Tə dəzle cəna,
zek a Yesu a mbəɗahan atan pə iɗe.
Tə canan anà jœr anahan nà,
kawa sə kwakwa sabay,
a wuteɗen atan kawa pac.
Zana anahan pi zek ɗukwen,
a dav nə herre kawa jiyjay sə uko ma dav awan.
3 Njavar anahan ataya tə canan anà atə Musa tə Eliya ɗo maja'am a Mbərom ahay kwakwa,
tinen apan ti ja 'am tatə Yesu.
4 Piyer a dazlan sa jan anà Yesu,
a wa:
«Bahay uno,
mənuko à man a anan nə sumor awan.
Kà zlak anak à nga nà,
ni ngaray jawjawa ahay maakan,
kərtek awan anga Musa,
kərtek a ite anga Eliya,
aday mədakwidok a nà,
anga iken awan.»
5 Winen apan i ja 'am ata mba,
mugudongudon a dazay,
a van atan nga sərdədek.
Aday 'am a ndəray ahay à mugudongudon ata wa,
a wa:
«Həna a anan nà,
wan uno ləliwe uno awan.
Tə winen nà,
nen ni taslay anan mivel bayak awan.
Slənen anan anan 'am anahan!»
6 Atə Piyer tə sləne 'am ata cəna,
ta ma nga sə jəjar pi zek,
tə slahay duboz.
7 Yesu a həɗəken atan ayak pə cakay,
a laman atan alay,
a wa:
«Slabiken,
kə̂ jəjiren bay.»
8 Ta sa cakaf nga asanaw nà,
ɗowan inde pə cakay ana Yesu sabay,
a mbəsak winen a kərtek coy.
9 Tinen apan ti dazay à ɓəzlom ata wa mba,
Yesu a jan atan,
a wa:
«Way a kwanay sə canan ahay à ɓəzlom wa ata nà,
kâ si jen anan à ɗowan bay,
hus pə luvon uno nen,
Wan su Ɗo,
saa slabakay à məke wa ata awan.»
10 Njavar anahan ataya tə dazlan sə cəce panan wa:
«Miter sə Tawrita ahay ta wa,
Eliya i lahan anà Almasihu aday nà,
angamaw?»
11 Yesu a ɗukwen a mbəɗahan atan apan,
a wa:
«Acəkan,
Eliya i lahay aday i ndakay anan way ahay fok.
12 Nen apan ni jak ikwen:
Eliya kà nak ahay coy,
aday ɗowan kə̀ sənak apan bay.
Ta gak anan anà Eliya way kawa a tinen sa gan may sa ga fok.
Aday ɗukwen ti gan anà Wan su Ɗo azanan nə matanan re.»
13 Atə Piyer tə sənak kwayan'a a ja 'am ata nà,
pə Yuhana ɗo sa gan baptisma anà ɗo ahay ata awan.
Yesu a mbar anan wan a inde məhərvov a taa ban anan
14 Aday tə dəzley ahay pə cakay sə ɗo ahay cəna,
ɗowan a inde a nay ahay,
a dukwen gərmec ù vo anà Yesu,
15 a jan:
«Bahay uno,
wan uno winen lelibay.
 gak ì zek wa ite.
Məhərvov a taa gan,
a bənan ɗəvac bayak awan,
a taa slahay anan ù uko inde kabay à a'am inde.
16 Na nak anan pə cakay ana njavar anak ahay,
əna ta mbak apan sə mbəro anan bay.»
17 Yesu a ja,
a wa:
«Kwanay nà,
aɗaf nga a kwanay ma kac awan kələɗaw?
Kə sənen anan cəveɗ a Mbərom bay re.
Ni njahay tə kwanay,
aday ni səmen anà way a kwanay ahay nə hus à siwaw?
Hayak ikwen uno anan ahay wan a aday!»
18 Yesu a jan 'am anà məhərvov ata tə angəraz awan:
«Hayak à wan a anan wa!»
Məhərvov ata a zləray à wan ata wa,
wan ana ɗowan ata a mbar à alay ata acəkan.
19 Pə dəɓa anahan a wa kutok,
njavar anahan ataya tə həɗəken ayak pə cakay taayak a tinen awan,
tə cəce:
«Manay ma mba apan sə rəzlay anan wa setene ata bay nà,
angama kərtek anaw?»
20 Yesu a mbəɗahan atan apan,
a wa:
«Anga aɗaf nga a kwanay a a kac ike.
Nen apan ni jak ikwen tə ɗiɗem a həna:
Kak abay aɗaf nga a kwanay â ga inde nə mənjœk kawa wan sə bəzan ɗukwen,
ki jen anan anà ɓəzlom a anan ataya:
“Zla à man a anan wa,
zla tiya!”
ɗukwen,
i ndaha,
i zla à man a kwanay sa jan “zla tiya” ata awan.
Awan saa dak ikwen 'am ibay jiga awan. [
21 Əna abay zahav sə setene həna anan nà,
kak si ta sa ga amboh tə sumaya aday bina,
a razl zek bay.]»
Yesu a ɗakay anan amac anahan tə aslabakay anahan à məke wa asa
22 Pə luvon a inde nà,
njavar a Yesu ahay mə halay nga aya pə kərtek a à Galile.
Yesu a jan atan 'am,
a wa:
«Nen Wan su Ɗo nà,
ti varan nen à alay inde anà ɗo sə daliyugo ahay.
23 Tinen ite,
ti vaɗ nen à məke,
aday pə luvon maakan anahan a cəna,
ni slabakay ahay à məke wa.»
Njavar anahan ahay tə sləne 'am ata cəna,
mbac a slahay patan wa tə mindel asa.
Yesu a var jangal
24 Tə dəzle à Kafarnahum cəna,
ɗo sə cakal jangal anga doh sə mazlaɓ a Mbərom ahay,
ta nay ahay pə cakay ana Piyer,
ta jan:
«Miter a kwanay nà,
a var jangal anga doh sə mazlaɓ a Mbərom itəbay ɗaw?»
25 Piyer a mbəɗahan atan apan,
a wa:
«A taa hamay ike!»
Aday à alay a tinen apan ti i zla ù doh mba kutok,
Yesu a lah sə cəce pə Piyer wa:
«Simon,
a ga apak nà,
bahay sə uho a anaya ti təma jangal nə pə waya wa anaw?
Pə wan su kon aya wa ɗaw,
kabay pə mədurlon ahay wa ɗaw?»
26 Piyer a mbəɗahan apan,
a wa:
«Pə mədurlon ahay wa.»
Yesu a wa:
«Kak matanan nà,
abay wan sə agay ahay nə ti hamay bay ba?
27 Aya əna,
ɗâ saa ga way sə cəɓan anà ɗo ahay bay.
Natiya,
zla à bəlay,
larak anan ayak kwaniyel anak à a'am inde.
Kəlef anak a saa bənay ahay pa 'am ata cəna,
təɓan anan 'am,
ki tan à nga uda à dala təɗe i sla anga mənumo cew ata awan.
Varan atan anan kutok.»