Ɗo sa san way ahay ta nay saa ca pə Yesu
2
1 Yesu nà,
winen mə wahay a à Baytilama pə daliyugo sə Yahudiya.
À alay ata nà,
bahay sə Yahudiya a nə Hiridus.
Pə dəɓa sə wahay anan Yesu wa nà,
kəlire ahay ta nay ahay kwa ta day sə dara wa,
à Urəsalima.
Tinen aday nà,
ta san way pə cəveɗ sə mawuzlawazl ahay zle.
Anga nan tə cəce pə ɗo ahay wa,
ta wa:
2 «Wan a mə wahay a,
aday i sa təra bahay sə Yahuda ahay ata nà,
winen ahaw?
Mə canak anan anà mawuzlawazl anahan a kə̀ slabakak ahay à dəlon wa.
Ma nay sa naa həran ayak nga.»
3 Bahay Hiridus a sləne cəna,
'am ata kə̀ wusek atan nga,
winen tu ɗo sə Urəsalima ahay fok.
4 Hiridus a halan nga anà bahay sə gəɗan dungo anà way ahay anga Mbərom,
pi zek tə miter sə Tawrita ahay fok.
A cəce patan wa,
a wa:
«Ti wahay Almasihu nà,
ahaw?»
5 Tə mbəɗahan apan,
ta wa:
«Ti wahay Almasihu nà,
à Baytilama,
pə daliyugo sə Yahudiya.
Anga ɗo maja'am a Mbərom kə̀ vindek kwakwa,
a wa:
6 “Iken Baytilama,
wulen su doh pə daliyugo sə Yahudiya,
kə kəcak à mamasl sə wulen su doh sə Yahudiya ahay bay jiga awan.
Anga bahay i sləray ahay nà,
ì iken wa,
aday i gan nga anà Isəra'ila ɗo uno ahay kawa ɗo sə jugwar təman ahay.ª”»
7 Natiya kutok,
Hiridus a ngaman atan ayak anà kəlire ahay ù doh pə cakay anahan.
A ngaman atan ayak mənjəna ɗo ahay sa san apan,
aday a cəce patan wa,
a wa:
«Kə cinen anan anà mawuzlawazl ata a slabak nà,
à alay wuraw?»
Tə ɗakan anan kutok.
8 Pə dəɓa anahan a wa a jan atan asa,
a wa:
«Zlen à Baytilama,
pəlen anan wan ata lele.
Ki ten anan à nga cəna,
ka naa jen uno,
aday nen ni zla saa həran ahay nga a cite.»
9 Tinen ite,
tə sləne anan 'am a bahay ata cəna,
ta zla kutok.
Mawuzlawazl a,
tinen a sə canan kurre a ata,
a njahan atan pa 'am wa.
A dəzle pa nga su doh a aday wan a à man ata ata nà,
mawuzlawazl ata a tavay dek.
10 Tə canan anà mawuzlawazl sə tavay dek ata cəna,
ta njaɗ ataslay mivel məduwen awan.
11 Ta zla ù doh a aday wan a winen à man ata ata awan.
Ta tan à nga anà Yesu,
tinen maya tə may anahan Mariyama.
Tə dukwen gərmec ù vo,
tə həran nga anà wan ata awan.
Tə pəsak anan mbulo a tinen ahay,
aday tə varan magwagway ahay cara cara:
gura ahay,
mətətok sə ləluway sə rəbas lele ataya awan,
pi zek tə wurde sə ngaman mira ataya awan.
12 Pə dəɓa anahan a wa nà,
Mbərom a ɗakan atan anan ì cœn sə zuɓay inde nà,
tâ ma ta man ana Hiridus sabay.
Natiya ta zla agay tə cəveɗ hinen kutok.
Atə Yusufu tə Mariyama ta zla à Misra
13 Ɗo a ataya ta zla way a tinen cəna,
maslay a Mbərom a kan zek anà Yusufu ì cœn sə zuɓay inde,
a jan,
a wa:
«Slabak!
Zla anan wan tə may anahan a təke à Misra,
bina Hiridus i pəlay wan a anan,
anga a nan sə lize anan.
Njihen à man ata hus pə luvon a azanan ni jak,
hayak ikwen ahay wa ata awan.»
14 Matanan kutok Yusufu a slabak sə luvon,
a zla anan Yesu tə Mariyama a təke à Misra.
15 Tə njahay à man ata hus pə amac ana Hiridus.
Natiya,
way ana Mbərom Ba Məduwen sa ja tə dungo ana ɗo maja'am anahan ata a təra.
A wa:
«Ni ngaman anà wan uno kwa pə daliyugo sə Misra wa.ª»
Hiridus a vaɗ anan gwaslay ahay
16 Hiridus a ca apan nə ɗo ataya ta gak kawa ananahan sa jan atan ata sabay cəna,
a ga mivel.
A jan anà suje anahan ahay nà,
tâ vaɗ anan gwaslay ahay à Baytilama wa fok,
pi zek tu kon aya sa van nga ataya awan,
a ban pa wan ma va a bay a wa,
hus pa wan ma va cew ataya awan.
Anga kawa ana kəlire ataya sə ɗakan anan alay a ana mawuzlawazl a sə sləray ahay ata nà,
a baslay ava awan,
i ga nə matanan.
A vaɗ atan fok.
17 A təra kawa ana ɗo maja'am a Mbərom Yeremiya sa ja,
a wa:
18 «Zliyzloy kà gak à Rama,
ayam tə aja mawa kə̀ zalak.
Rahilu winen apan i yam gwaslay anahan ahay.
A nan ɗowan â bənan mbac bay,
anga gwaslay anahan ahay tə məcak fok.ª»
Atə Yusufu tə Mariyama ta may agay à Misra wa
19 Hiridus a mac cəna,
maslay a Mbərom a kan zek anà Yusufu ì cœn sə zuɓay inde à Misra,
20 a jan,
a wa:
«Slabak!
Zla anan wan tə may anahan a təke pə daliyugo sə Misra wa,
ma pə daliyugo sə Isəra'ila,
anga ɗo sa gan may sa vaɗ anan wan ataya tə məcak.»
21 Yusufu a slabak,
a gəɓa anan wan tə Mariyama a təke,
ta ma pə daliyugo sə Isəra'ila kutok.
22 Aya əna,
a sləne sa jəka sa pa 'am ana Hiridus nà,
wan anahan sə ngaman Arkilawus ata nà,
kə̀ jəjarak sə njahay à man anahan pə daliyugo sə Yahudiya.
Anga nan Mbərom a kan anan ahay ì cœn sə zuɓay inde way anahan təɗe saa ga ata awan.
Ta zla à Galile kutok,
23 tə njahay way a tinen à wulen su doh a sə ngaman Nazaratu ata awan.
A təra matanan ata ɗukwen,
anga ɗo maja'am a Mbərom ahay ta jak,
ta wa:
«Ti ngaman Nazaratu ahay.»