30 Rap a yiib ne wag-kẽenfo.

Rap a yiib n tũ taab n na n tɩ bao gɛla.

B kẽname n kaoose,

b maana daarã tõr n pa tol n yã gell a yembr meng ye.

La ned a ye wã yãa wag-kẽenf sẽn gãe a bok pʋga.

A pa yeel a zoa wã t'a yãa bũmb ye.

A sẽn wa n na n yeel-a yaa tɩ bũmb ning sẽn da são ne-b yaa b kuili,

tɩ bala b pa yã bũmb ye.

A ra tagsame t'a sa n pʋʋs a zoa wa wẽnd na taase,

a ra na n lebga a ye n tɩ kʋ waafã la a vʋk a gɛlã zãnga.

Woto la a ra tagsda,

la a zoa wã ra bãngame tɩ bũmb n da be n da yaa libsgu.

B yiibã lebgame n kuil b tẽngẽ wã.

Ned ning b sẽn da rat n wẽgã sẽn ta a zakẽ wã,

a yãka yam n na n kẽng a ye wã zakẽ n tɩ gese a beeme bɩ.

A taa a zoa wã zakẽ la wala a sẽn da tẽedã,

a ra ka be ye,

tɩ bala a ra kẽngame n na n tɩ bao wag-kẽenfã.

T'a na n pʋg a nao.

Rẽ wakat t'a ye wã,

ra taa waafã bokẽ,

la a ra pa bãng a kʋʋb ye.

Tʋg n yaa waafã n da gãd yẽ n da vuud n dabd kʋɩlgẽ wã.

A zoa wã sẽn ta wakat kãnga wã,

zĩig pʋgẽ a bãnga bũmb ning sẽn da be.

A sɩnga zoeese,

la wakat fãa a zoa wã sã n gãd moog bɩ tuugu,

a ye wã rɩkda a larã n keeg a yẽgã,

sẽn na yɩl n dok a sũurã.

Talla woto tɩ waafã tar a rɩɩb vuub n na n tɩ kẽ koomẽ wã n dɩ.

Nedã sẽn be toogã pʋgẽ wã gãda tɩɩg willa,

tɩ sẽn da pʋgd-a wã wa ta n keeg willã.

T'a gãd tuugu,

t'a ye wã keeg tuugã.

Yɩɩ woto tɩ waafã vu n ta kʋɩlgã noore.

Wakat kãnga,

rao wã bãngame tɩ waafã ra na n kẽe koomã pʋga,

tɩ rẽ ra tõe n kɩt t'a paam n kʋ a zoa wa nana-nana.

T'a rɩk a ra-teoogã n na n zab ne waafã.

La a tõogame n kʋ-a.

A zoa wã paamame n põse.

Ad yam-sõng b sẽn kõ nin-kãngã,

tɩ rẽ daar tɛka,

bɩ a pa le rnaan yel-kãensã buud ye.

A ra ratame n wẽg a zoa n paame.

A ye wã pa bas-a ye.

A kɩame tɩ rabeem kaseng kẽ-a n yaool n wa baas n fãag-a.

Yaa woto la b sẽn yet tɩ « n kõ ned vẽenmã ».