Solem-kãngã gomda ninsaal ne rũms sʋk vɩɩm sẽn ya to yelle.

Ninsaal yamã yɩɩda rũmsã fãa rẽnda,

rẽ yĩnga,

daar a yembre,

weoogã rũms sogla taab n maan tigsga,

n na n ges b sẽn tog n zã b mens to-to ninsaal taoore,

t'a pãng pa ta bãmba,

la wakat fãa a tõogda bãmba.

Tigsgã wakato bõnyẽeg yeelame :

« Ninsaala,

ba a tar yam,

a pãng pa ta maam ye.

Rẽnd mam sã n tõog n gom ne ninsaala,

m tõe n kɩtame t'a pa a zĩigẽ ».

Daar a yembre,

ninsaal ra rabda weoog ne a peoog la a kutoaaga,

n na n tɩ bao tãmbɛgd n kõ a no-bi.

A sẽn ta weoogẽ wã,

nif kamsg pugẽ,

a yãa bõnyêega.

Bõnyẽeg sok-a lame :

« Yaa foo la a ninsaal bɩ »?

Tɩ ninsaal leoke :

« N-ye,

yaa maam la a ninsaala ».

« Tõnd tagsdame tɩ fo yamã waooga wʋsgo,

la rũndã,

yaa mam pãngã n be taoore.

Ninsaala,

rũndã,

ne m pãngã,

m na n kʋ-f-la ne f yamã fãa » !

Tɩ ninsaal leoke :

« La mam ra pa mi rẽ tiir wɛ.

M pa segl m menga,

m leb n pa zã bũmb me n wa !

Sɩd yĩnga,

m sã n da bãngẽ la tiiri,

m da na seglẽ m menga,

la woto wã ».

« Bõ »,

bõnyẽeg sẽn yeele,

" m saka-me.

Kẽng n tɩ segl f meng la f lebg n wa.

Rũndã,

sẽn be mam yamẽ yaa m na lub-fu ».

Ninsaal pa mi a sẽn na n maan bũmb ning ye,

la bõnyẽeg togsd-a lame n dɩdgdẽ mosã :

« Haya,

haya wɛ.

Kẽng n tɩ segl f meng n lebg n wa !

mam gũud-f lame ?.

La ninsaal yeela bõnyẽega :

« La mam zoeta m na n wa lebg n wa hal ka n pa mik-f ye ».

Tɩ bõnyẽeg leoke :

« Kuili,

tʋg n segl f meng n lebg n wa mik-m ka ».

Ninsaala :

« Ayo !

mam pʋg pa peel ne-f ba bilfu.

M zoeta m wa lebg n wa ka n pa mik-f ye ».

A ra zãada wĩiri,

n yeel-a :

« Fo sã n da na n sakẽ lame,

mam da sẽbdẽ-la foom ne wĩ-kãngã,

rẽ m kõtẽ-la sɩd tɩ m mikd-f lame ».

« Mam sẽn dat tɩ f mik-ma yĩnga,

m sakame tɩ f sẽb-ma ».

Ninsaal manegame n sẽb-a kãnkãe ne tɩɩga.

A sẽn sẽb-a n sa,

bõnyẽeg yeelame :

« Kuil la f wa».

Tɩ ninsaal yeele :

« Mam pa le baood n na n kuil n tɩ segl m meng la m wa ye».

A rɩka kutoaagã a sẽn da tar n na n fiu tãmbɛgdã n pãb bõnyẽegã zugu.

Bõnyẽeg pa tar tẽeb ne a meng fãagr ye,

yẽ la b sẽn sẽbã la.

Bõnyẽeg sẽn wa n sobge,

ninsaal loka wĩyã la a rʋ tɩɩgã.

Woto mosã,

bõnyẽeg wa n vʋʋgame,

n baood ninsaal n pa ne-a ye.

Ninsaal sẽn be yĩngrã,

a kaooga willa,

t'a sẽn kaoog willã maan bʋrga.

Rabeem kẽe bõnyẽeg t'a zoe n kẽ weoogã.

Daar-n-kãng tɛka,

rũmsã kɩsa sɩd tɩ ninsaal yamã yɩɩda bãmba.

Rẽ daar tɛka,

rũng sã n yã ninsaala,

sẽn be ne-a yaa a sɩng zoeese.