9 Bɛdenga.
Daar a yembre,
bɛdeng ra rɩka a sore.
A tɩ sega no-raoog t'a sok-a :
« bɛdenga,
yaa ya la f rabda »?
Tɩ bɛdeng leok-a t'a rabdame n na n tɩ ges a reem-dãmba.
Tɩ no-raoog yeele :
« M tõe n wa yãag-f lame bɩ »?
« N-ye,
f sã n dat n wa,
bɩ f wa.»
Tɩ no-raoog pʋgda.
Sẽn pa yã n zãage,
ad yũug sẽn sokd no-raoogo:
« no-raoogo,
yɛ la f rabda» ?
«Ay,
pa yell ye.
Yaa bɛdeng n dabd a reem rãmb nengẽ tɩ mam me yãagd a».
« M tõe n waame bɩ »?
« N-ye,
f sã n dat n wa,
bɩ f wa ».
B sẽn ta taoor bilfu,
b sega baaga :
«Yaa yɛ la yãmb kẽnd woto n dabda ?
Bõe yĩng tɩ yãmb tong taab woto n kẽnda »?
Yũug leokame :
« Ay,
yell kae ye.
Yaa bɛdeng n dabd a reem-rãmb nengẽ n yet tɩ d wa yãag-a».
Tɩ baag soke :
« M tõe n waáme bɩ »?
Tɩ yũug leoke :
« N-ye,
f sã n dat n wa,
bɩ f wa ».
B sẽn ta taoor bilfu,
rũmsã sẽn tongã sega m ba katre.
Tɩ katr soke :
« Yaa yɛ la yãmb rabda »?
« Ay,
yell kae ye.
Yaa bɛdeng n dabd n na n tɩ ges a reem-rãmb n yet tɩ d wa yãag-a,
» baag sẽn leoke.
Tɩ katr soke :
« La mam tõe n waame bɩ »?
« N-ye,
f sã n dat bɩ f wa».
Tɩ yẽ me pʋgda.
Sẽn yɩ bilfu,
b sega bõnyẽega :
« Yaa yɛ la yãmb dabd woto,
n tong taaba »?
« Ayo »,
katr sẽn yeele,
« bɛdeng n dabd n na n tɩ ges a reem-rãmb n yet tɩ d wa yãag-a ».
« La mam tõe n waame bɩ »?
Bõnyẽeg sẽn yeele.
« N-ye,
f sã n data,
» katr sẽn leoke,
« f tõe n waame ».
B sẽn ta taoor bilfu,
b sega wobgo.
Wobg sok-b lame :
« Yaa bõe n be tɩ yaa woto »?
Tɩ bõnyẽeg leoke :
« Ayo,
baa fʋɩ.
Yaa bɛdeng n dabd n na n tɩ ges a reem-rãmb n yet tɩ d wa yãag-a ».
Tɩ wobg soke :
« La mam me tõe n waame bɩ »?
Tɩ bõnyẽeg leoke :
« Fo sã n data,
bɩ f tũ-du ».
B sẽn tar kẽn n tar kẽna,
b wa n yãa m ba soaamba.
Soaamb sokame :
« Ya la yãmb dabd woto n tong taaba »?
Wobg leokame :
« Ayo,
baa fʋɩ.
Yaa bɛdeng n dabd n na n tɩ ges a reem-rãmb n yet tɩ d wa yãag a ».
La mam tõe n waame bɩ ?
Soaamb sẽn soke.
« F sã n data ,
f tõe n waame,
» wobg sẽn leoke.
B fãa ra tonga taab rulg n dabd n na n tɩ ges m ba bɛdeng reem-dãmbã.
Soaamb wa yeelame tɩ yẽ nao n zabde.
Tɩ wobg leoke :
« F sã n dat bɩ f zomb maam ».
A zom ba wobg tɩ b le sɩng kẽna.
Sẽn yɩ bilfu,
kẽndã maagame.
Tɩ soaamb soke :
« Ãnd n be taoor n pa kẽndã »?
Yaa bedeng la sẽn be taoorã.
« La no-raoog maanda bõe ?
a rɩ-a wɛ » !
No-raoog vela bɛdenga,
n lebg sorã taoor soaba,
la a ra ka le mi a sẽn na n kẽngẽ ye.
Tɩ kẽndã bãnege :
« Ãnd n be taoor n pa kẽndã »?
Yaa no-raoogo.
« La bõe la yũug maanda ?
A rɩ-a wɛ »!
Tɩ yũug rɩk no-raoogo.
Sẽn ta taoor bilfu,
soaamb le sokame :
« Ãnd la sẽn be taoor tɩ kẽndã pa fɩɩdã »?
Yaa yũuga.
« La baaga,
a maanda bõe ?
a rɩ-a wɛ »!
Tɩ baag rɩk yũuga.
Sẽn yɩ bilfu,
soaamb le talla sok-yendã :
« La yaa ãnd n be taoorã »?
Yaa baag bɩ ?
La katr bee be bõe yĩnga »?
Katr rɩka baag n wãbe.
« Ãnd n be taoor mosã tɩ kẽndã ket n maasa »?
Yaa katre.
« La bõnyẽega,
a maanda bõe »?
Bõnyẽeg rɩka katr n wãbe.
«Ãnd n be taoor tɩ kẽndã pa fɩɩda »?
Yaa bõnyẽega.
« La Wobgo,
a maanda bõe »?
Wobg tabga bõnyẽeg n kʋ.
Ra kella wobg ne soaamba.
La soaamb ra tara yolg sẽn pid ne moodo.
A ruka mood n sui m ba wobg tʋbrẽ.
« Yaa bõe la f maanda »?
Wobg sẽn soke.
« Ayo,
baa fʋɩ ;
Yaa bũmb n dat n kẽ f tʋbrẽ tɩ m yãkdẽ ».
La moodã sʋka,
almet biis n da be be.
M ba wobg tʋbrã yõka bugum t'a sɩng zoeese.
M ba soaamb yeel-a lame t'a kẽng zĩig ning moodã sẽn yaẽ wogd sõma wã.
Yɩɩ woto tɩ m ba wobg rɩ bugum,
tɩ m ba soaamb sẽn kʋ rũmsã sẽn geesd-b yẽ zãngã lebg naaba.