Mukanda ya Ntete ya Polo na baklisto ya
TESALONIKA
Bambote
1
Ni munu Polo kintwadi na Silase mpe Timote,
ke na kufidisa mukanda yayi na sika ya dibuundu ya mbanza Tesalonika yina kele dibuundu ya Tata Nzambi mpe ya Mfumu* Yesu-Klisto*.
Bika Nzambi kusakumuna beno,
mpe kupesa beno kizunu.
Kiminu ya bantu ya mbanza Tesalonika
2 Beto ke na kubika ve na kutonda Nzambi samu na beno nyonso,
mpe na kusambidila beno.
3 Beto ke bambukaka moyo na ntwala ya Tata ya beto Nzambi wapi mutindu beno ke salaka bisalu samu na kiminu ya beno,
wapi mutindu beno ke salaka bisalu ya mpasi samu na luzolo ya beno,
mpe wapi mutindu beno kele na kivuvu na kuvwanda ya kukwikama na Yesu-Klisto,
Mfumu* ya beto.
4 Bampangi!
Beto zaba ti Nzambi ke zolaka beno mpe soolaka beno samu ti beno vwanda bantu ya yandi.
5 Ya tsyelika,
ntangu beto zabisaka beno Nsangu ya Mbote*,
beto salaka yawu kaka ve na bampova,
kasi beto salaka yawu mpe na ngolo mpe lusalusu ya Mpeve ya Longo,
mpe na kivuvu nyonso.
Beno zaba wapi mutindu beto zingaka na kati ya beno samu na mbote ya beno.
6 Beno me landa kifwanusu ya beto mpe ya Mfumu.
Beno me tala mpasi mingi,
kasi beno me ndima Mambu ya Nzambi na kilengi yina Mpeve ya Longo ke pesaka.
7 Na yina,
beno me kuma kifwanusu yina fwana kulanda bandimi nyonso ya kizunga ya Masedwane mpe ya Akayi.
8 Ya tsyelika kubanda na sika ya beno,
mambu ya Mfumu me wakana tii na Masedwane mpe na Akayi.
Kasi dyaka nsangu ya kiminu ya beno na Nzambi me zabana na bisika nyonso.
Na yina,
beto kele ve na nsatu ya kuzonzila yawu.
9 Bantu nyonso ke na kuzonzila wapi mutindu beno yambaka beto,
mpe wapi mutindu beno me bika na kusambila banzambi ya biteki samu na kubaluka na sika ya Nzambi ya moyo mpe ya tsyelika samu na kusadila yandi.
10 Beno ke na kuvingila ti Mwana ya yandi,
Yesu,
katuka na mazulu mpe kwiza.
Ni yandi Nzambi vumbulaka na lufwa.
Yandi ke kuula beto na lufundusu ya Nzambi yina me kuma pene-pene.