Kingana ya bisadi na kati ya bilanga ya vinu
20
"Ya tsyelika,
Kimfumu ya Mazulu* kele mutindu yayi:
Muntu mosi basikaka na suka-suka na yinzo ya yandi samu na kubaka bisadi yina ke sala na bilanga ya yandi ya vinu.
2 Yandi wisanaka na bisadi yina na kufuta bawu difuta ya kufwanana na kisalu ya kilumbu mosi,
mpe fidisaka bawu na kwenda kusala na bilanga ya yandi ya vinu.
3 Na ngunga ya yivwa ya suka,
yandi basikaka dyaka na yinzo,
mpe talaka na kisika yina bantu ya nkaka ya kutelama yina vwandaka sala kima ve.
4 Yandi zabisaka bawu:
'Beno mpe,
beno kwenda kusala na bilanga ya munu ya vinu,
mpe mu ke futa beno difuta yina me fwanana.'
5 Bawu kwendaka.
Mfumu ya bilanga basikaka dyaka na yinzo na ngunga ya midi,
mpe na ngunga ya tatu na manima ya midi.
Yandi talaka bantu ya nkaka,
mpe zabisaka bawu mutindu mosi.
6 Pene-pene na kukuma na ngunga ya tanu ya nkokila,
yandi basikaka na yinzo mpe talaka na kisika yina bantu ya nkaka dyaka ya kutelama yina vwandaka sala kima ve.
Yandi yufulaka bawu:
'Samu na yinki beno me vwanda awa kilumbu ya muvimba ata kusala kima?'
7 Bawu vutulaka:
'Ata muntu me baka beto na kisalu.
' Na yina,
mfumu ya bilanga zabisaka bawu:
'Beno mpe,
beno kwenda kusala na bilanga ya munu ya vinu.'
8 "Ntangu nkokila kumaka,
mfumu ya bilanga ya vinu tubaka na ntwadisi ya yandi ya bisalu:
'Bokila bisadi,
mpe futa bawu.
Banda na kufuta bayina mu bakaka ya nsuka,
mpe manisa na bayina mu bakaka ntete.'
9 Bisadi yina bandaka na kusala na ngunga ya tanu ya nkokila kwizaka,
mpe konso muntu kuzwaka difuta ya kisalu ya kilumbu mosi.
10 Ntangu bisadi yina bandaka ntete kisalu kwizaka,
bawu vwandaka banza ti bawu zolaka kuzwa difuta ya kulutila bampangi.
Kasi bawu mpe kuzwaka difuta ya kisalu ya kilumbu mosi.
11 Na kuzwa yawu,
bawu dasukilaka mfumu ya bilanga,
12 mpe tubaka:
'Bisadi yina nge me baka ya nsuka me sala kaka ngunga mosi,
mpe bawu me kuzwa difuta mosi na beto yina me tala mpasi na kusala kilumbu ya muvimba na kati ya ntangu ya ngolo.'
13 Kasi mfumu ya bilanga ya vinu tubaka na mosi na kati ya bawu:
'Nkundi ya munu,
mu me vuna nge ve.
Ya tsyelika,
beto wisanaka ti mu ke futa nge difuta ya kisalu ya kilumbu mosi.
14 Baka difuta ya nge,
mpe kwenda.
Mu ke pesa mpe na kisadi yina me sala kaka ngunga mosi difuta ya mutindu mosi na nge.
15 Mu kele ve na muswa ya kusala mambu ni mambu yina mu zola na mbongo ya munu?
To nge kele na musoki samu ti mu kele muntu ya mbote?' "
16 Na yina,
Yesu bwelaka dyaka:
"Bayina kele bantu ya nsuka ke vwanda bantu ya ntete,
mpe bayina kele bantu ya ntete ke vwanda bantu ya nsuka."
Yesu zabisaka na mbala ya tatu lufwa mpe mvumbukulu ya yandi
17 Yesu na bilandi* ya yandi vwandaka kwenda na Yelusalemi.
Ntangu bawu vwandaka na nzila,
yandi nataka bilandi kumi na zole na lweka,
mpe zabisaka bawu:
18 "Beno kuwa!
Beto ke na kukwenda na Yelusalemi sika ba ke yekula Mwana ya Muntu* na maboko ya bamfumu ya banganga-Nzambi* mpe milongisi ya Misiku*.
Bawu ke zengila yandi lufwa,
19 mpe ke yekula yandi na sika ya bayina kele ve ba-Zwife,
samu ti bawu seka yandi,
bula yandi bikoti,
mpe koma yandi na kulunsi.
Kasi yandi ke vumbuka na lufwa na kilumbu ya tatu."
Ndombolo ya mama ya Zaki mpe Za
20 Na ntangu yina,
kento ya Zebede kwendaka na bana zole ya yandi ya babakala pene-pene ya Yesu.
Yandi fukamaka na ntwala ya Yesu samu na kulomba yandi dyambu mosi.
21 Yesu yufulaka yandi:
"Yinki nge zola?"
Kento ya Zebede vutulaka:
"Sala ti bana zole yayi ya munu vwanda mosi na lweka ya nge ya bakala mpe ya nkaka na lweka ya nge ya kento ntangu nge ke vwanda ntinu."
22 Yesu tubaka:
"Beno zaba ve yinki beno ke na kulomba.
Beno lenda kunwa mbungu ya bampasia yina me ke kunwa?"
Bawu vutulaka:
"Ee,
beto lenda."
23 Yesu zabisaka bawu:
"Ya tsyelika,
beno ke kunwa mbungu ya munu.
Kasi samu na kuvwanda na lweka ya munu ya bakala to ya kento,
ni munu ve lenda kutuba yawu.
Bisika yina kele ya bayina Tata ya munu me kubikila yawu."
24 Ntangu bilandi* kumi ya nkaka kuwaka mutindu yina,
bawu dasukilaka bampangi zole yina.
25 Na yina,
Yesu bokilaka bawu nyonso,
mpe zabisaka bawu:
"Beno zaba ti bantwadisi ya bayinsi ke yalaka bantu ya bawu na ngolo nyonso,
mpe bamfumu ke talisaka bantu mpasi mingi.
26 Kasi ya fwana kuvwanda ve mutindu yina na kati ya beno.
Kana mosi na kati ya beno zola kuvwanda mfumu,
yandi fwana kuvwanda kisadi ya beno.
27 Muntu yina zola kuvwanda muntu ya ntete,
yandi fwana kuvwanda mundongo ya beno.
28 Mutindu mosi mpe,
Mwana ya Muntu* me kwiza na yinza,
samu ti bantu sadila yandi ve,
kasi samu ti yandi sadila bantu,
mpe pesa luzingu ya yandi mutindu munkayulu samu na kukuula bantu mingi."
Yesu belusaka bampofo zole
29 Ntangu Yesu mpe bilandi* ya yandi basikaka na mbanza Yeliko,
nkonga ya nene ya bantu landaka Yesu.
30 Bampofo zole vwandaka ya kuvwanda pene-pene na nzila.
Bawu kuwaka ti Yesu vwandaka luta kuna,
mpe bandaka na kulooka:
"Mfumu,
mwana ya Davidi!
Tala beto kyadi!"
31 Bantu vwandaka semba bawu,
samu ti bawu vwanda swi.
Kasi bawu lutilaka dyaka na kulooka na ngolo:
"Mfumu,
mwana ya Davidi!
Tala beto kyadi!"
32 Yesu kangamaka,
bokilaka bawu,
mpe yufulaka:
"Yinki beno zola ti mu sala samu na beno?"
33 Bawu vutulaka:
"Mfumu,
zibula beto meso."
34 Yesu talaka bawu kyadi,
mpe simbaka bawu meso.
Kaka na ntangu yina,
bampofo zole bandaka na kutala,
mpe bawu landaka Yesu.