Zonase 3

Zonase ke na kulonga na Ninive mpe bantu ke na kusoba nkadulu

Na mbala ya zole Yave pesaka lutumu yayi na Zonase: 2 «Telama, kwenda na Ninive yina kele mbanza ya nene mpe zabisa bawu mambu yayi mu ke na kutubila nge.» 3 Na mbala yayi, Zonase telamaka samu na kukwenda na Ninive mutindu kele lutumu ya Yave. Ninive vwandaka mbanza ya kulutila nene. Ba vwandaka sala bilumbu tatu samu na kumanisa na kuluta mbanza yina na makulu. 4 Zonase bandaka na kutambula na mbanza mpe salaka kilumbu ya muvimba na kuzabisa na bantu mambu yayi: «Kaka bilumbu makumi yiya me bikana, mbanza Ninive ke vwanda dyaka ve.» 5 Bantu ya Ninive kwikilaka na mambu ya Nzambi yina. Bawu bakaka lukanu ya kumanga na kudya samu na Nzambi mpe vwataka *kilele ya saki, kubanda na bantu ya mfunu tii bantu ya mpamba. 6 Ntangu ntinu ya Ninive kuwaka mambu yina vwandaka luta, yandi katukaka na kiti ya kintinu, katulaka kiyunga ya kintinu, lwataka kilele ya saki mpe *vwandaka na zulu ya bombi. 7 Na manima, yandi tumisaka na kuzabisa bantu ya Ninive mutindu yayi: «Beno kuwa lutumu ya ntinu mpe ya bantu ya yandi ya ndwenga: ata muntu mpe ata kibulu ya nene na ya fyoti fwana kudya mpe kunwa kima. 8 Bantu mpe bibulu fwana kulwata kilele ya saki. Konso muntu fwana kulomba na ngolo nyonso lusalusu na sika ya Nzambi. Konso muntu fwana kubika mavanga ya yimbi mpe mambu ya myangu yina yandi ke sadilaka. 9 Nani zaba! Ya lenda kuvwanda ti Nzambi katula nzengolo ya yandi, soba mabanza ya yandi, mpe manisa nkele ya yandi ya kulutila samu ti beto kufwa ve.»

10 Nzambi talaka wapi mutindu bantu ya Ninive vwandaka sala: yandi talaka ti bawu vwandaka bika mavanga ya yimbi. Na yina, yandi sobaka mabanza na lukanu ya yandi ya kupesa bawu kitumbu yina yandi zabisaka, mpe yandi salaka yawu ve.