12
Bambuka moyo na Nzambi yina yidikaka nge, na ntangu yina nge kele ntete ntwenya,tekila bilumbu ya yimbi kukwizila nge.
Sala mutindu yina tekila bamvula kukwiza, yina nge ke tuba ti "Mu ke na kutala ve kyese ya luzingu".
2 Sala mutindu yina tekila ntangu, nsemo,
ngonda, na bambwetete kukuma mpimpa,
mpe ti matuti kuvutuka dyaka ntangu mvula me manisa na kunoka.
3 Ni na kilumbu yango bankebi ya yinzo ke tekitaka,
bantu ya ngolo ke vwandaka ya kukondama.
Bakento ke bikaka na kututa na bitutulu ya bawu samu ti bawu kele mingi ve.
Bakento yina ke talaka na ba nela ke vwandaka dyaka ve na kitoko ya bawu.
4 Na kilumbu yango, myelo zole yina ba ke basikilaka na balabala ke kangamaka.
Bitutulu ke kumaka swi.
Ba ke vumbukaka na ntangu yina bandeke ke bandaka na kuyimbila.
Banzimbu ya bakento ke wakanaka dyaka ve.
5 Na kilumbu yango, kuyuluka mwa mongo ya fyoti ke pesaka boma.
Kutambula na balabala ke pesaka boma.
Yinti ya mu-amande ke kumaka na bifulu ya mpembe, dikonko ke kumaka dema.
Bima yina ke pesaka nsunga ya mbote na madya ke vwandaka dyaka ve na nsunga ya yawu.
Samu ti muntu ke na kukwenda ya yandi na kivundulu ya yandi ya mankululu.
Bayina ke dilaka ke fulukaka na balabala.
6 Bambuka moyo na Nzambi yina yidikaka nge, tekila singa ya palata kunyanguka,
mbungu ya wolo kumwangana,
diyuki kupasuka kuna na yinto ya maza,
kibendolo kubwa na kati ya dibulu ya maza.
7 Bambuka moyo na Nzambi yina yidikaka nge, tekila fundu-fundu kuvutuka na ntoto mutindu yawu vwandaka ntete,
tekila mwela kuvutuka na Nzambi yina pesaka yawu.
8 Kaka mpamba na mpamba! Ni mutindu yina me tuba Kuluntu.
Bima nyonso kele kaka ya mpamba.
Na kumanisa
9 Kuluntu vwandaka kaka muntu ya ndwenga ve.
Yandi lakisaka mpe luzabu na bantu.
Yandi sosaka na kubakula, yandi fyongoninaka, mpe yandi yidikaka bingana mingi.
10 Kuluntu salaka ngolo na kuzwa mambu yina kele ya mbote.
Mambu yango kele ya kusonama na mutindu ya kufwanakana.
Yawu kele mambu ya tsyelika.
11 Mambu ya bantu ya ndwenga kele mutindu mwa bayinti ya nsongi yina ba ke twadisilaka bibulu.
Bayina ke sonikaka mabuku kele mutindu makunzi yina ba me kunda mbote.
Kaka mvungi mosi ke pesaka nyonso yina.
12 Mwana ya munu, na zulu ya nyonso yina, sala keba.
Kisalu ya kusonikaka mabuku ke sukaka ve.
Kulongoka ya mingi-mingi ke lembisaka nzutu.
13 Yayi ni nsukunu ya mambu nyonso yina me wakana:
Zitisa Nzambi, mpe tumama na bantumunu ya yandi.
Mambu nyonso yina me tadila konso muntu.
14 Samu ti Nzambi ke nata mambu nyonso na mfundusu,
na nyonso yina kele ya kubumbama.
Ya vwanda ya mbote to ya yimbi.