Cek
masa Yesu Kəriste
ma wuzar a Jaŋ
Mey da ray ɗerewel ŋga
Cek ma wuzar a Jaŋ
Jaŋ a wuzlala mey daa ɗerewel keɗe ŋgada ndəhay ŋga Gazlavay na, daa masa ata fa səram banay maja mey ŋga Yesu Kəriste. Bay Rawma zleezle a pa ray aŋga na, ŋga Gazlavay, a kəɗdata vaw ta ndəhay daa mecəmey-ray ŋga Yesu, maja a gəmam ŋga pamara anda Gazlavay ba. Anda keɗe, Jaŋ a wuɗey ŋga vəltar gədaŋ a ndəhay ŋga Gazlavay, amba a mbəkdamara Yesu ba. Asaya, Jaŋ a wuɗey ŋga ləvtar na, fara fara, Yesu Kəriste a fənta masa-gəra aŋga hay la cəpa ta gədaŋ.
Daa ɗerewel e keɗe na, Jaŋ a wuzey cek hay ga ma rəzla ndaw. Cek hay a na, Jaŋ a hətatar anda mesəfney ma kar. Ara Yesu Kəriste ma wuzdara. Fa dəɓa ha, a wuzlalatərwa cek hay a. Cek hay masa aŋga ma hətatar na, mawatakaya ta cek hay mekele mekele. Pəles mabara, da daa ba, aŋgwa mabara a wuɗey ŋga ləvey «mekey bay-gula». Pəles magaza ta kiya magaza a wuɗey ŋga ləvey «meməcey, vəram, banay». Bəlay a wuɗey ŋga ləvey, slam-menjey ŋga masa-gəra ŋga Gazlavay (13.1). Gədem a wuɗey ŋga ləvey Sataŋ, bay-malula (20.2-3). Berney ŋga Babilaŋw a wuɗey ŋga ləvey slam masa ndəhay fa kam cek hay maaya ba da hwaɗ a. Daa slam mekele mekele cek hay masa aŋga ma hətatar na, ata maasala (nəka 1.4; 1.12; 1.16; 5.1; 5.6; 8.2; 10.3; 12.3, leŋ 15.6). Fa Jəwif hay na, cek hay maasala a wuɗey ŋga ləvey cek hay a «makatakaya maaya maaya, mambəkakaya daa ba.»
Daa fasəlawal 1 haa 3 na, leeter hay maasala daha mawuzlalatakaya ŋgada ndəhay ŋga Yesu daa berney hay maasala masa daa hwayak ŋga Azi. Daa fasəlawal 4 ta 5 aa guzley da ray Yesu, Bəz-təɓaŋ ŋga Gazlavay na, ara ndaw pal taava aŋga ma wusa ŋga wura ɗerewel mapaɗakaya masa maslərɓakaya ta tebeɗ. Daa fasəlawal hay siya na, Jaŋ aa guzley da ray cek ma da key ta pas masa Yesu ma wura ɗerewel mapaɗakaya heyey sem. Ɗerewel keɗe fa wuzda ta fa Yesu Kəriste na, Gazlavay a fənta masa-gəra aŋga hay la cəpa ta gədaŋ, leŋ Sataŋ, bay ata.
Daa ɗerewel e keɗe na, mey mekele mekele daha ŋga vəley gədaŋ a ndəhay:
Yesu fa zəley fa mey-slam ŋga ndaw a, ndaw a (3.20)
Maaya ŋga Gazlavay ma da sawa a ray ndaw ma jəkey sləmay fa mey aŋga (1.3)
Ndəhay ta maslaŋ hay masa da vaɗ a həlmamara Bay Gazlavay na, kwara (fasəlawal 4 haa 5)
Da Jeruzelem mawiya ndəhay fa da səram banay daa saba (22.3-4)