Fəl i

Leeter masa Pawl ma wuzlalatara a

Fəlepi hay

Mey da ray

Leeter ŋgada Fəlepi hay

Egəliz daa berney ŋga Fəlepi na, ara Pawl ma pa. A pa daa masa aŋga fa pəkey ŋga dey cew ŋga wuzey Mey-maaya-mawiya (SNM 16.6-40). Pawl a wuzlalatara leeter keɗe a Fəlepi hay na, daa masa aŋga daa fərsəne. A wuɗey ŋga katar suse maja mejəney ata (1.13).

Har-gədaŋ ŋga ndəhay a wulkam Pawl aa daa fərsəne da Rawm, siya a ləvam aa daa fərsəne da Sezere, siya hay saya a ləvam aa daa fərsəne da Efez.

Fəlepi hay a, a cəndamara Pawl aa daa fərsəne. Da ray ŋgene ta’, a cakalam dala, a slərdamara Epafərawdit ŋga handara a Pawl. Asaya, a ləvmar a Epafərawdit e ŋga njamawa ta Pawl amba a jəna daa sləra (4.10-20). Feteɗe vaw ta car la ga a Epafərawdit. Aŋga ma key ŋgama la na, ta’, Pawl a ləvar ŋga vəhwa fa Fəlepi hay ŋga katar suse.

Mey mahura ŋga Pawl daa leeter e keɗe na, ara mey da ray Yesu (2.6-11). Yesu ta mbəkdərwa bay aŋga ta meweɗey aŋga sem da vaɗ amba a nar ray a Gazlavay, a key cek anda Gazlavay ma wuɗey. Maja ŋgene, Gazlavay ta’, a pa ŋga ndaw mahura da ray cek hay tabiya. Maja ŋgene, Pawl a ləvtar a Fəlepi hay ŋga ɓəsmara banay amba a hətam cek maaya ma fəna.

Kwa Pawl aŋga daa fərsəne, ta sərey banay la ga maja Yesu, ama ta ŋgene he cəpa, a ləvey aŋga ta meesəmey maja aa ma pa Yesu ŋga ndaw aŋga fara fara. Meesəmey a ŋgene daha da wuzlah ndəhay masa macəmkaya ta Bay Mahura, kwa ata daa banay kwa ata ta gədaŋ pəreh.

Daa leeter e keɗe na, mey mekele mekele daha ŋga vəley gədaŋ a ndəhay:

Mey da ray menjey ŋga Yesu (2.5-11)

Mey da ray menjey ŋga ndəhay ŋga Yesu (2.14-15)

Mey da ray ma daw fa mey fa mey daa mey ŋga Gazlavay (3.12-14)

Mey da ray meesəmey mandaw mandaw (4.4)

Ka da wulkam ba səlak (4.6, 19)