Bay Herawt a sərdata banay ta ndəhay ma təɓa mey ŋga Yesu
12
Daa ŋgene,
Bay *Herawt a zlar ma sərdata banay ta ndəhay mekele mekele daa *mecəmey-ray ŋga ndəhay ŋga Yesu.
2 A kəɗa *Jak ta dəlaw vagay.
Jak a na,
ara məlmaŋ ŋga *Jaŋ.
3 Bay Herawt a nəka na,
*Jəwif hay faa səmam maja aŋga ma kəɗa Jak vagay.
Ta’,
a kərza *Piyer saya,
a kəzla aa fərsəne.
A kərza Piyer na,
daa ɗar hay ŋga gwagway mezəley «*Gwagway ŋga peŋ manjar cek ma həsla da hwaɗ a.»
4 Ta’,
a ləvtar a sewje hay ŋga jəɗmara.
Sewje hay a,
ata məfaɗ,
məfaɗ dey məfaɗ a.
Bay Herawt a,
a wuɗey ŋga kar sariya a Piyer meedey ndəhay tabiya fa dəɓa ŋga gwagway ŋga *Pak. *
5 Anda keɗe,
Piyer magərcakaya daa fərsəne,
ama ndəhay daa mecəmey-ray ŋga ndəhay ŋga Yesu heyey fa dəram daŋgay a Gazlavay mandaw mandaw ta mevel pal maja aŋga. *
Maslaŋ ŋga Gazlavay da vaɗ a badərwa Piyer daa fərsəne
6 Slam ma da wurwa amba Bay *Herawt a kar sariya a *Piyer na,
ta tavaɗ a ŋgene,
Piyer majəwkaya ta calalaw hay cew manakaya da wuzlah sewje hay cew ma jəɗmara heyey.
Sewje hay mekele fa jəɗmara mey-slam ŋga fərsəne he saya.
7 Ta’,
*maslaŋ ŋga Bay Gazlavay da vaɗ a sawa,
slam daa way a,
a weɗey pəray!
Maslaŋ a,
a wusa Piyer aa cakay,
a sləkɗada,
a ləvar:
«Sləkɗey fiyaw!»
Masa maslaŋ a faa guzlar na,
calalaw hay heyey a kwiyam da har Piyer. *
8 Maslaŋ a,
a ləvar:
«Ɗiya vaw akah,
pata tarak akah hay a salay.»
Piyer,
ta’,
a ka anda maslaŋ a ma ləvar.
Maslaŋ a ləvar saya:
«Sləlha zana akah fa vaw,
səpya.»
9 Piyer aa da siya,
a bamawa daa fərsəne kasl ambaw.
Ama Piyer ta səra cek masa maslaŋ a ma kara ŋgene ara cek fara fara na,
daa ba.
A wulkey ara mesəfney ma kar.
10 Masa ata fa diyam na,
a mbəkdamatərwa sewje hay ŋgeeme,
a mbəkdamatərwa sewje hay ŋga dey cew e,
a wusam fa mey-mbew ŋga ɓərey ŋga fərsəne masa ma bawa ŋgadaa berney.
Mey-mbew e a wurey taava aŋga.
Ta’,
a bamawa daa fərsəne he.
A diyam taa cəveɗ ma daw taa berney a.
Fa dəɓa ha nekəɗey na,
maslaŋ ŋga Gazlavay a sem,
a daw,
a mbəkda Piyer feteɗe.
11 Daa slam aha ŋgene,
Piyer,
a səra cek masa ma key ta aŋga na,
ara cek fara fara.
A ləvey:
«Wure keɗe,
ya səra fara fara ara Bay Gazlavay ma slərwa maslaŋ aŋga,
ŋga ləhdaya dasi har ŋga Herawt,
asaya,
daa cek maaya ba tabiya masa ndəhay *Jəwif hay ma wuɗam ŋga kamaya.»
12 Masa Piyer ma səra cek aha ma key anda keɗe la na,
ta’,
a daw a way *Mari,
mamaŋ ŋga Jaŋ-Mark.
Ndəhay ga makustakaya feteɗe,
fa dəram daŋgay a Gazlavay. *
13 Piyer a zəley fa mey-mbew,
a kəɗa kweteŋ ª.
Dam ma key sləra da wuzlah ata feteɗe daha mezəley Rawde.
Ta’,
a sawa ŋga nəka ma kəɗa kweteŋ e na,
ara wa.
14 A wusey fa mey-mbew.
Masa aa ma cənda ara ɗay ŋga Piyer na,
aa səmey ga ara mey ba.
Kwa ŋga wura mey-mbew e na,
ta wura daa ba,
ama a hway ta ray ŋgada way fa ndəhay da way a heyey,
a ləvtar:
«Piyer malacakaya fa mey-mbew.»
15 Ndəhay kaa a mbəɗdamara ŋgada dam aha,
a ləvmar:
«Malula fa kaka daw?»
Ama aŋga fa ləvtar,
fa ləvtar:
«Fara fara ara aŋga.»
Ndəhay a,
a ləvam:
«Da ara maslaŋ aŋga kwa ª.»
16 Ama Piyer,
fa zəley,
fa kəɗa kweteŋ ŋga mey-mbew cəŋga,
kwa ta mbəkda daa ba.
Ta’,
a wurmara mey-mbew heyey.
Masa ata ma hətmar ara aŋga na,
a rəzlam ga.
17 Piyer heyey,
ta’,
a baŋgaɗatar har ŋga njam teete,
ta’,
a kadatara mey da ray cek masa Bay Gazlavay ma ka ŋga badərwa daa fərsəne.
A ləvtar:
«Kadamara mey keɗe ŋgada *Jak ta ŋgada məlmaŋ hay mekele daa *mecəmey-ray ŋga ndəhay ŋga Yesu.»
Ta’,
a mbəkdata,
a daw aa slam mekele.
18 Cay,
slam ta’,
a wurey,
sewje hay heyey a wuram mey həɓak a həɓak a,
a sərmara ŋga key kwara ba.
A ləvam:
«Piyer a key na,
kwara?» *
19 Bay Herawt heyey,
ta’,
a slərey ndəhay aa wura aa wura ŋga səpmərwa Piyer e,
ama ta hətmərwa daa ba.
Da ray ŋgene,
Bay Herawt aa cəfɗata sewje hay ma jəɗmara Piyer heyey,
ta’,
a ləvtar a ndəhay mekele ŋga kəɗmata vagay.
Fa dəɓa ha,
ta’,
Bay Herawt a,
a sləkɗey daa hwayak ŋga *Jude,
a daw aa berney ŋga Sezere,
a njawa feteɗe ɗar nekəɗey.
Meməcey ŋga Bay Herawt
20 Daa ŋgene,
Bay *Herawt mevel aŋga fa cey a ray ndəhay daa berney ŋga Tir ta ndəhay daa berney ŋga Sidaŋw.
Ndəhay daa berney hay a,
a həɗkam cek mezəmey na,
daa hwayak ŋga Bay Herawt a.
Da ray ŋgene,
a cəmdamara ɗay ata,
a səpam cəveɗ ŋga daw fa vəɗa.
Maja ŋgene,
a vəlam dala a Bəlastus,
madərlam mahura ŋga Bay Herawt amba a hətam cəveɗ ŋga wusey fa Herawt ŋga kar ambahw.
21 Masa pas ŋga key ambahw a Bay Herawt a heyey ma wuswa cay na,
Herawt a pawa zana ŋga bay fa vaw,
a daw,
a njey aa jaŋga aŋga fa mey ŋga ndəhay a,
a zlar meeguzley.
22 Aa faa guzley na,
ndəhay tabiya feteɗe a wudam,
a ləvam:
«Maa guzley kaa na,
ara Gazlavay,
ba na,
ndaw ba.» *
23 Wure wure ŋgene,
maslaŋ ŋga Gazlavay da vaɗ a kəɗa Herawt a,
maja aŋga ma təɓa ndəhay a ma həslmar ray,
a pa ray aŋga ŋga Gazlavay.
Ta’,
mətal hay a zəmamara,
fa dəɓa ha,
a məcey.
24 Yaw,
mey ŋga Gazlavay na,
fa daw fa mey,
fa mey.
Ndəhay masa ma təɓa mey ŋga Gazlavay a,
fa səkmawa,
a dey a,
a dey a. *
25 Fa dəɓa ha ata *Barnabas ta *Sawl ma ndəvdamara sləra ata da *Jeruzelem la na,
a vəham aa berney ŋga Antiyaws.
A diyam bama ta ata Jaŋ-Mark. *