Asang jhao" lhang: lo mung: yao: re akyu" mho' ge,. Ana" yao: wa ajhao" mae na: ra".Makhyang" ra" byu qe wa yao: bam: makhyang" ra" kao so' daui khyo re to" pye' mung: yao: bam myid: ra" khyo re tha" pye' vageshao:.Ngonhaung" nho: Mao"So jhao" yao: bam re lhang: lo nhao ge,.Asangwa- nga" myid: qu" khyo wa- naonhaung" myid: ru we' madau nga" khyo wa naonhaung" khyo we' jho" shai" ra". Yao: wa nhag' khyag' ru we' qobo khyad' byid: nae" phyad yaug ngad: ra". Mug: khaung wa myid gaung tho' mae myhao: ra" nho"- nga" khyo jham re nga" myid: qu" ra" khyo wa naonhaung" tho' mae myhao: ra".Nga" mungdao: wa mug:gaung mae" gyo" li" mung: myid gaung re qid sheim: byid' ra" nghin we' mug: qid we' dakhyo: ngad: ra". Aiwa qhovo: jham re yaug nhao mung: sin: nae" myug: shi: we' zo:ve re byid' ra". Ngo ta" ra" mungdao: re: ai we' dakhyo: boe" nae". Aiwa ngo yaung: to" rure kad' boe" nae" malhaui" pye' li" nae". Aiwa ngo zaui: nhao: to" ru ja: khao: ngo" re kad' li" nae".Jham: dao: ta" nug: ru wa- Mao"So: mungdao: wa nao we' te' te' mae ngad: ra"- ni" nhad' qid mae we' ni" nhag' lam: khug mae ngad: ra"- aimung dao: wa ngonhaung" kho" kyo" ra" lam khug: ra" mungdao: ngad: ra".Khristu wa Asang ngad: ra"- ga: nao lhang: yu mung: Mao"So wa yao: re shid: rumae" daui: to" li" nhao: ra"- ga" rure nao lam" ngad: re wa nao wa khyad' yu: ru qhug' li" nae".

Pe"mung:ga"re ngohaung" wa ngonhaung" lam khug: myid khyo" yang jo: ra"- ga: Mao"So: yang sun" yu byid' ru qhug' mung:- ngonhaung" nhad' dao: thoe: yang lhang: yu: ru khyo" yang khyad' yu: ru qhug' yu: ra".Jham: Mugsug' mae- yao: re lam" ra" yaug wa qam: gyug: qam: shan qhug' nae" mangad:- ga: ta" to" ra".Ceru wa yaug khao: ngo" re ta" ru ngad: ra"- pe"mung:ga"re Yuda byu qe we' Taung bug byu qe: gyo: mae pe" jho" shai" ru majo, ngad: ra". Mao"So wa alhab' mo; dao mae" dakhyo: za: Asang ngad mung: yao: re mho' yao: ra" mo, alhab' re magan: mathao" ra" shaman" jeju byid' ra".Jham: Mugsug mae- Asang re bao" thaug' mho' yao: ra" mo, yaug khao: ngo" wa khyad' yu: ru qhug' li" genae"- ga: ta" to" ra".Ngadqere: yao: bam malam" ko" ngad: re wa- yao: bam wa Asang re khoru: qo" mho' yao genae" i? Amung: yao: bam ai: mungdao: re mathe' gyo: gere wa- yao: bam khoru: lam" genae" i? Ailao"- ai: mungdao: re makho" kyo: re- yao: bam khoru: qo" the' gyo: genae" i?Mungdao: kho" kyo: nae" mo, re manhao: ke' re wa- ai: mung: dao: re khoru: qo" kho" kyo: nae" i? Jham: Mugsug' mae- lau dao: gai vin: ra" lagyo: qe joe" li" ru wa khoqhi" sho' gai: ra" i? ga: ta" to" ra". Ngadqere: ai: Lau Dao: Gai re alhab' mo, makhae: yu ko" ngad: ra". Esaia yao: yao: re:- Asang we"- ngonhaung" mungdao: re khag' lam" ko" ra" i? ga: ta" ra".Airumung: lam khug: ru wa mungdao: re the' gyo" yu: ra" khyo" yang ngad mung:- aimung dao: wa Khristu ra" khyo re kho" kyo" ra" khyo" yang the' gyo" yu: ra".