Paulu aa vumenena
16
Naa mi pa ombangi keyi ya ndumbuthzetu Febe, ngamba o kereke thzo mu Sengeria. 2 Naa mi romba ci mu mu tambure mu dithzina dya Fumu ko dikuñwa edi di na roera akwakutawa. Karo mu mu kwathse enu yoihe eyi nga a fota ku kwenu, inene naa kwathsa anu owangi, mane name kengeyo.3 Mu ni vumenenene Purisila na Akwila, awa ni na kwamena pofocino mwikwama ya Krisitu Yesu. 4 A kokire myoyo thzo pa thsaara mukaci kange. Naa kanderera kukwo, kadi ame pohuma unone no makereke oahe Anukenge aa kanderera kukwo. 5 Karo mu ni vumenenene no kereke ethzi thzi na ciwanenanga mu nthzio thzo.
Mu ni vumenenene Epeneto mushimiwa wange, oyu wa tangire ku tawa kwa Krisitu mu Asia. 6 Mu ni vumenenene Madiya oyu naa kwama nene ku mi kwathsa. 7 Mu ni vumenenene Anderonika na Junia, aenthzange Majuda awa nekara nange mu kamenga. A na dimukiwa nene mu kaci ko tunganda, karo wodiyo a tangire ku tawa kwa Krisitu ame o ku ni shime. 8 Mu ni vumenenene Ampiliatasi, oyu na shima mwa Fumu. 9 Mu ni vumenenene Uribano, muenthzetu mwikwama ya Krisitu, mofoci kengeyo na mushimiwa wange Sitakisi.
10 Mu ni vumenenene Apele, oyu naa tawethziwa mwa Krisitu. Karo mu ni vumenenene awa di mu mwanda wa Arisitobulu. 11 Mu ni vumenenene muenthzange Mujuda Herodioni. Mu ni vumenenene o mu mwanda wa Narisiso awa na tawa kwa Fumu. 12 Mu ni vumenenene Tirifena na Tirifosa awa kwamena Fumu. Mu ni vumenenene Perisisi mushimiwa wange, oyu naa kwamena nene Fumu. 13 Mu ni vumenenene Rufusi, oyu naa hanguriwa kwa Fumu, karo mu ni vumenenene no mama wenthzi oyu naa piruka mama name.
14 Mu ni vumenenene Asinkirito, Fulegoni, Heremesi, Patirobasi, Heremasi, nakwakutawa amweya wahe awa a nekarangano. 15 Mu vumenene Filologo no Julia, no Nerea na ndumbuthzenthzi, no Olimpa nakwakutawa wahe awa a dino. 16 Mu civumenenange namweya ko thsitawo. Makereke a Krisitu oahe aa mi vumenena.
Eraerera yo mamaneneno
17 Andengenu, naa mi romba honi ci mu mamere awa reta kucitepatepa no ku kuñukithsa thsitawo thsenu eyi i rwithsa erongithsa eyi na mu rongithsiwa. Mu tunde kukwo. 18 Inene anu o kengeyo ka kwamenine Fumu wetu Krisitu, unone eshima yo. Ko maywi o oawa no maywi o o ku nthzembereka a angera o woto micima. 19 Anu wahe na yuvu ci mwaa yuvera Fumu, mweyo, naa nyanyuka mukaci kenu, uno honi naa fota ci mu nyanyame kweyi yoiwa, no kupira murandu kweyi yoimango.
20 Nyambi o thsiyaro tamba kwororora Satana kushi thzedyato yenu. Thsihemo thsa Fumu wetu Yesu Krisitu thsikare nenu.
21 Timoti, aye oyu ni kwamena pofoci nenthzi, aa mi vumenena, mofoci kengeyo na Lusiusi, Jasoni na Sosipatere, aenthzange Majuda nawo aa mi vumenena.
22 Ame no Teritiusi, oyu naa ñoro edi diñoro naa mi vumenena mu dithzina dya Fumu.
23 Gayusi oyu na ni tamburanga no ku tamburanga kengeyo kereke thzothzihe aa mi vumenena. Erasito mukwakunyunga madi o mbongi, na Kwarito muenthzetu aa mi vumenena. 24 [Thsihemo thsa Fumu wetu Yesu Krisitu thsikare nenu. Ameni.]a
Thsirombero thso ku yemekera
25 Kutethzima honi kwikare kwa Nyambi, aye o ku twethsa ku mi koropithsa, eci dyodi u amba Muthzimbu Ouwa ou ni honga, ao Muthzimbu wa Yesu Krisitu, kokuthza kehokora yo diano edi dya horekiwire ko myaka na myaka. 26 Uno honi, eñora yakwakukethza na i reta ci oshemwa u hokoriwe ku matunga oahe. Nyambi o diyere naa i raerera kengeyo, ci anu nga tawe ku kwenthzi no ku mu yuvera. 27 Kutethzima kwikare diyere kwa Nyambi aye o munyanyami pohuma, mwa Yesu Krisitu! Ameni.