Edi mu na roera ku remeka awa di peturo
13
Munu yomuhe aa roera ku cihuthsa kushi thzowa di peturo mu kutumina, inene muendithsi yomuhe Nyambi naa mu hangura, aa endithsa kokoro wa Nyambi. 2 Mweyo, munu yomuhe o ku shwahura oendithsi aa shwahura eyi naa hangura Nyambi, karo kenge a ku piwa humbithso. 3 Inene munu o ku tenda yoiwa tumba nga a yapa aendithsi, unone o kwipithsa yodiyo o ku yapa aendithsi. Ene waa fota ku yoya ko kukana ku yapa aendithsi nji? O tende yoiwa, aendithsi kenge a ku shangara. 4 Inene aendithsi po angamba Nyambi, aa ku tangerera ku ku twara kweyi yoiwa. Unone ngeci waa tenda yoimango waa roera ku wa yapa, inene yo shemwa a di nokoro o ku ku pa humbithso. Awo po angamba Nyambi, aa wa tumena ku na pa humbithso awa tenda yoimango. 5 Mweyo, munu aa roera ku cihuthsa kushi thzaendithsi, kadi ko ku yapa pohuma humbithso, unone mukaci ko ku dimuka eyi i na roera ku tendiwa.6 Karo ngeyi mu na tereranga. Inene aendithsi aa kwamena Nyambi o kwa kwama ekwama yo. 7 Mu futwere anu wahe awa na mu korotera, mu tere ngara mutero kwanu awa a na roera ku tereriwa. Karo mu pe direma kwanu wahe awa a na roera ku remekiwa.
Eyi i na roera ku munu no munu
8 Mwekara no makongo kwa munu shime makongo edi mu na roera ku cishima oandu, inene o ku shima muenthzenthzi aa hengeka murao. 9 Inene eraerera yo ku amba ci: “Kadi o mukwa ku rembeka, kadi o mukwa kwipaa, kadi o mukwa kwithza, kadi o mukwa ku cikumbwethza,” neraerera imweya kengeyo, i na cipundeka mwethsi thsiraerera thsofoci thso ku amba ci: “O shime muenthzoe eci edi wa cishima othsinda.” 10 Thsishimo ka thsa tenda omango kwa muenthzoe. Mweyo, thsishimo thsaa yarithserera murao ouhe.
11 Mwaa roera ku tenda kengeyo, inene mu na dimuka ci thsino thsikati ne thsikati thso ngepi. Thsino po thsikati thso ku pinduka pa turo. Inene thsikati thso kuyoyithsiwa kwetu pepi thsi di kupita uya twa tangire ku tawa. 12 Othsiku u na thzi honi, diyuwa di tamba ku va. Tu thsienu ekwama yo mirema, tu shimbe erwithsa eyi twa ku rwithsa mu mwethzi. 13 Mweyo, pakuninga ci na tu henyena ku mwethzi o diyuwa, twaa roera ku yoya ko direma, kadi kedika yo kaye notakwa nji ruthziho nji ongurunde nji mandwa nji mbamba. 14 Uno honi mu cishupeke Fumu Yesu Krisitu, karo mwa tawethza ecikumbwethza yerama ku mi endithsa.