Yesu aa hokoka kwirongwa yenthzi
21
Munyima thzeyi, Yesu wa hokokire karo kwirongwa yenthzi ku Diviya dya Tiberiya. Kuma a cihokorire kenge: 2 Simoni Peturu, Tomasi (oyu wethsiwire o Marambia), Natanaele o mu Kana o mu Galilea, ana Zebedea, namweya aidi kwirongwa yenthzi kuma ekarire pofoci. 3 Simoni Peturu wa wa amberire ci: “Naa thza mu kuyamba.” A mu amberire ci: “Natwe twaa thza noe.” Ngou a thzire no ku ka yomama mu wato, unone uya othsiku kwithsa ethsi a wanine.4 Mu ruura, Yesu wemanine pa dikambo, unone erongwa ka ya dimukire ci Yesu. 5 Yesu wa i amberire ci: “Andengenu, ene ka mu diko no thsi nji?” Ya mu tawire ci: “Kwithsa.” 6 Wa i amberire ci: “Mu kuhere dituwa ku rudyo ro wato, kenge mwipaa!” Ngou ya kuherire dituwa, unone ka ya twethsire ku di koka mukaci ko thsi ongi.
7 Thsiya thsirongwa a shimine nene Yesu, thsa amberire Peturu ci: “Fumu!” Simoni Peturu ou a yuvire ci Fumu, wa vatire thsikoveyo thso peuru pakuninga ci kuma a thsi cishupurire, wa reerire mu meyu no ku thza pa dikambo. 8 Unone erongwa imweya ayo ya thsiarire mu wato o ku i koka dituwa dyo ku yara dyo thsi, inene ka yekarire kokure no dikambo, nedi manambo o ku fota ku kwana makumi o dikumi. 9 Ou ya kumine pa dikambo, ya monine mudiro o pa makara no thsi po no dikende ku mbadi. 10 Yesu wa i amberire ci: “Mu rete ku thsi ethzi mu nepaa ñanyiñanyi.”
11 Simoni Peturu ngou a shamukerire mu wato no ku kokera dituwa pa dikambo, edi dya yarire ethsi thzothzikuru thzo ku kwana 153. Shaanga ci kuma pa rwire ethsi thzothzingi kengeyo, edyo dituwa ka dya yatukire. 12 Yesu wa i amberire ci: “Mu keye na mu dye.” Kwithsa kweyo erongwa ethsi thsa keshukire ku mwipura ci: “Yowe o dye?” Inene ya dimukire ci nedi yodiyo Fumu. 13 Yesu ngou a keyire no ku shimba dikende no ku i pa, wa tendire kengeyo no ku thsi. 14 Oru nedi ro muthsihatu oru a hokokire Yesu kwirongwa yenthzi munyima thzo ku pinduriwa kwafu.
Yesu na Peturu
15 Ou a manine ku dya, Yesu wa amberire Simoni Peturu ci: “Simoni mwana Johani, ene o mukwa ku ni shima kupita eyi nji?”
Wa tawire ci: “Ii, Fumu, o na dimuka ci no mukwa ku ku shima.”
Yesu wa mu amberire ci: “O korere manguana ange.”
16 Yesu wa hukerire ku mwipura ci: “Simoni mwana Johani, ene o mukwa ku ni shima?”
Peturu wa tawire ci: “Ii, Fumu, o na dimuka ci no mukwa ku ku shima.”
Yesu wa mu amberire ci: “O dithse mangu ange.” 17 Yesu wa mu amberire ro muthsihatu ci: “Simoni mwana Johani, ene o mukwa ku ni shima?”
Peturu wa ciyuvire omango ku mucima, inene Yesu wa mwipurire ethzo ngudi ro muthsihatu. Wa mu tawire ci: “Fumu, o na dimuka enu yoihe, o na dimuka ci no mukwa ku ku shima.”
Yesu wa mu amberire ci: “O korere mangu ange.
18 “Naa ku tongwera yoshemwa ci: o ku di oshumba, no civatekanga othsinda no ku thza kokuhe oku wa fotire. Uno honi ou wa ku kurupara kenge wa ku vapura moko oe anuawo no ku ku vateka ku ku twara oku o na kana ku fota ku thza.” 19 Yesu wa ambire eyi ku monithsa ci kufa ko ngepi a ku pa Nyambi kutethzima. Ou a manine ku amba eyi wa mu amberire ci: “O ni shupwere.”
Yesu nothsiya thsirongwa a shimine nene
20 Peturu wa cithsetukire no ku mona thsiya thsirongwa a shimine nene Yesu o ku thsi wa shupwera. Ethsi thsirongwa thsodiyo thsiya thsa yendamenine Yesu pa murarero o mahurerero, thsiya thsa mwipurire ci: “Fumu, edye oyu wa ku ku omba?”
21 Peturu ou a thsi monine, wepurire Yesu ci: “Fumu, oyu aye ne ngepi?” 22 Yesu wa tawire ci: “Ngeci naa fota ci a yoye shime apa na ku ka hukera ne, eyo ne ine ku koe? Owe po o ni shupwere pohuma.”
23 Mweyo, ao mapurwatwi a yukire mu kaci kakwakutawa ci ethso thsirongwa ka thsa ku fa. Uno honi eyo ka di yodiyo a ambire Yesu, unone kuma a ambire pohuma ci: “Ngeci naa fota ci a yoye shime ku ka kuma apa na ku ka hukera ne, eyo ne ine ku koe?”
24 Ethsi thsodiyo thsirongwa ethsi thsi pa ombangi weyi enu eyi karo thsodiyo na thsi i ñoro. Karo tu na dimuka ci ombangi wathso wa shemwa.
25 Yesu wa kwamine enu yoingi imweya. Nga ci i ñoriwe yoihe, naa anekera ci ao mavuka nga a ñoriwa tumba nga a kwanamo mu kaye kokahe.