Márịkọ̃
Õfú Losó Márịkọ̃ Ã Sĩlé Rĩi
1
Yõánã Bãtị́sịtã ká lẹ́tị ãriꞌdị́pị ní idé
1 Õfú losó Yẹ́sụ̃ ãriꞌdị́pị ni Rũbãngã ã Ngwâ dị̃ gá rĩi iꞌdó ꞌdíni. 2 Tịluza Rũbãngã dí zị̃tị ã sĩjó ãtị́ rĩ áni:
“Rũbãngã ọꞌjọ, ‘Nyĩnde, má mâ õfúre ni zẹ atị lẹ́tị idére bábá nyíní.’a
3 Õfúre uzáre kwésí-kwesĩ ꞌa rĩ ọꞌjọ,
‘Ãnyidé lẹ́tị Ópí ní, ãnyedũ ándá.’”b
4 ꞌDĩsĩdú Yõánã Bãtị́sịtã ịtẹꞌdẹ̃ru kwésí-kwesĩ ꞌa, ká bãtị́sịmụ̃ kẽ oko ká õfú ꞌdĩ nze, “Ãnyĩru ãnyã enzĩ ni oko ãnyĩko bãtị́sịmụ̃ Rũbãngã ní ãnyã enzĩ eꞌbejó rá.” 5 ꞌBá lọgọ mgbị̂mgbị Yụ̃dẹ́ị̃ ꞌa rĩi, táụnị̃ Yẹ̃rụ́sãlẹ́mẹ̃ ꞌa rĩ trõ kwící ovũkî anídí. Orukî ãꞌiã enzĩ ni ꞌdĩ, okẽ ãꞌiní bãtị́sịmụ̃ mẽri Jọ̃rọ̃dánọ̃ ꞌa. 6 Yõánã ni ká bõngú idélé nãkãnáká éní sĩ rĩ usú áwu, ká gọbị uꞌi áwu oko anâ lonya umbí lãngụ́ trõ. 7 Anâ õfú ni ꞌdíni: “Mãꞌdị́ zị̃ mãndẽre rá rĩ ká mâ vú ekó rá oko mẹ́sị̃ ku wọlé anâ mvũka ni ĩbá ayụre gá. 8 Má ãnyiní bãtị́sịmụ̃ kẽ ẹ̃yị́ sĩ, kí ani lê kệmụ́ ká ãnyiní bãtị́sịmụ̃ kẽ Éndí Rũbãngã dí rĩ sĩ.”
Bãtị́sịmụ̃ oko litá Yẹ́sụ̃ dî ꞌi
9 Sáã nã sĩ, Yẹ́sụ̃ engá táụnị̃ Nãzãrẹ́tị̃ ni Gãlĩléã ꞌa rĩ ní gá Yõánã okẽ láka bãtị́sịmụ̃ mẽri Jọ̃rọ̃dánọ̃ ní ꞌa. 10 Yẹ́sụ̃ ã ekwíre ẹ̃yị́ ꞌa sĩ rĩi, onde ꞌbụ̃ ká rawị́ oko Éndí Rũbãngã dí rĩ kệsị́ dị̃arụ́ ãmámũ ẹsị́jó rĩ áni. 11 Ụ́ꞌdụ́kụ́ engá ꞌbụ̃ ꞌa sĩ ọꞌjọ, “Nyi mâ Ngwâ ni mâ lẽlé ndõ rĩi. Ásị́ ẹꞌbwẹ̃ oko ma nyí sĩ cí.
12 Éndí Rũbãngã dí rĩ ọnị̃ ani zẹ fọ́rọ́rụ́ ꞌa. 13 Yẹ́sụ̃ olú láka ọꞌdụ́ mụ̃dịsụ, Sĩtánĩ orĩ ani itáre. Náꞌa kákî olú nyãrãga trõ ãlu, kí mãláikã orĩ tã na mbare.
Mãju ãtịjóa rĩ ụngwẹka
14 Yõánã ni óꞌbe mãbụ́sị̃ ꞌa. Nã ã vúgá, Yẹ́sụ̃ ọmụ Gãlĩléã ꞌa õfú losó Rũbãngã dî njere. 15 Anâ õfú njere rĩ ọꞌjọ, “Sáã ecá rá opĩ Rũbãngã dî ní. Ãnyĩru ãnyã enzĩ ni, ãnya’ị̃ õfú losó rĩi!”
16 Yẹ́sụ̃ ã acị́re mẽri Gãlĩléã tị sĩ rĩi, onde Sị̃mọ́nẹ̃ tị adụ́pị̂ ni Ãndẽréã trõ, kákî ãꞌiã vóyí ꞌbe mẽri ꞌa, ãꞌdusĩku ãꞌi ꞌbá ẹ̃ꞌbị okoka rĩi. 17 Yẹ́sụ̃ ọꞌjọ ãꞌiní, “Ãnyekó mâ vú, má ꞌbãa ãnyi ꞌbá ꞌbe áwu.” 18 Mgbesâ eꞌbekî ãꞌiã vóyí, okokî Yẹ́sụ̃ ã vú áwu.
19 Yẹ́sụ̃ oca andagá ꞌdĩ, onde Zẹ̃bẹ̃dẹ́ọ̃ ã ꞌbõrõnzi Yãkọ́ꞌbọ̃ tị adụ́pị̂ ni Yõánã trõ ị́ꞌbọ́ ꞌa, kákî ãꞌiã vóyí oꞌbwĩ. 20 Ụngwẹ ãꞌi ꞌdĩ, eꞌbekî ãꞌiã átâ Zẹ̃bẹ̃dẹ́ọ̃ ni ị́ꞌbọ́ ꞌa ẹꞌbụ̃ꞌbá anídî trõ, okokî anâ vú.
Yẹ́sụ̃ odo orí ũnzí pí
Lụ́kã 4:31-37
21 Ovukî táụnị̃ Kãpẹ̃rẹ̃nẹ́ọ̃ ní gá. Sãbátũ sĩ, Yẹ́sụ̃ okwi jó lemú dî ní ꞌa, iꞌdó ꞌbá ịnị̃ka. 22 ꞌBá a’ụ̃ cí tã anâ ịnị̃lé rĩ sĩ, ãꞌdusĩku orĩ ãꞌi ịnị̃re okpõ trõ, lãpõnyiã cárá Mũzê dí ịnị̃jó rĩ áni ku. 23 Sáã nã sĩ, ẹsụ́ ágó zị̃ jó lemú dí nãí ꞌa orí ũnzí trõ rĩ oko iꞌdó uzáka. 24 “Yẹ́sụ̃ Nãzãrẹ́tị̃gọ́ ꞌdĩ, nyílẽ ãmadí ãꞌdu? Nyẹ́ẹmụ́ ãma ꞌdịre yã? Mánị̃ nyi ọ̃tẹ, nyi mãꞌdị́ ọlẹ Rũbãngã dî ꞌi. 25 Kí Yẹ́sụ̃ ọꞌjọ aníní, “Nyĩvụ̃ círí, nyĩnga rụ arụ́ sĩ pí!” 26 Orí ꞌdĩ uꞌja ágó ꞌdĩ mọ́rị́ sĩ oko efũ rụ arụ́ sĩ pí ũzãza trõ. 27 ꞌBá kwící a’ụ̃ dú cí, iꞌdókî rụ̃zịka ãꞌi-ãꞌi ni, “Tã ridére ꞌdĩ ã ékwí ni ãꞌdu? Ani lịnị̃ úꞌdí rĩ oko mọ́rị́ Rũbãngã dí sĩ! Ká cárá sâ kẽ orí ũnzí ní, oko kákî ani ru.” 28 Anâ õfú acá ẽmí-ẽmí lọgọ Gãlĩléã dí ꞌa sĩ mgbí.
Yẹ́sụ̃ ijá ꞌbá ũꞌbí
29 Yẹ́sụ̃ tị eꞌbe jó lemú dí ꞌdĩ, ovũkî Yãkọ́ꞌbọ̃ tị trõ Yõánã tị trõ, oko otõkî ẹ́’ị́ Sị̃mọ́nẹ̃ tị dí Ãndẽréã trõ rĩ ní gá. 30 Ẹsụ́ Sị̃mọ́nẹ̃ ã andị̃nzị́ã ã rụ ãcí oꞌde vụ̃rụ́, oko onzekî anâ dị̃bá Yẹ́sụ̃ ní rá. 31 Yẹ́sụ̃ ọmụ láka, inga ani ọrụ. Rụ ãcí ꞌdĩ ọnị̃ ẹꞌbwẹ, oko ọmụ lonya idére ãꞌiní. 32 Ũndwélãga nã sĩ ị̃tụ́ oꞌde kpá, ejíkî ꞌbá rụ unzi rĩ ꞌbâtị ꞌbá orí ũnzí trõ rĩ trõ Yẹ́sụ̃ dí. 33 ꞌBá ganyi nã ní ꞌa rĩ kpôdú otarukî tụ́mị̃ nã ní gá, 34 oko Yẹ́sụ̃ ijá ꞌbá ãmgbụ́ ricandĩka lãzá dị̃lé mgbị̂mgbị trõ rĩ rá. Ongo odo orí ũnzí ãmgbụ́ pí, kí ogã orí ní tã ꞌjọka ĩmgbé, ãꞌdusĩku ọnị̃kî ani ọ̃tẹ.
Yẹ́sụ̃ ilegĩ kãré ꞌbá ãkó rĩ ní gá.
Lụ́kã 4:42-44
35 Yẹ́sụ̃ epĩ ꞌbụ̃zẽlé sĩ, oko ọmụ ilegĩre kãré ꞌbá ãkó rĩ ní gá. 36 Sị̃mọ́nẹ̃ tị ꞌbá anâ vú koka rĩ trõ rĩ ovũkî ani ndụ̃ sĩ, 37 Ẹsụ́kî ani ꞌdĩ, ọꞌjọkî aníní, “ꞌBá kwící ká nyindụ̃!” 38 Yẹ́sụ̃ a’ị̃, “Ãnyĩꞌbã óvũkî ganyi ĩré-ĩré rĩ ní gá sĩ, áwusĩ ní mãnze dú õfú losó rĩ ãꞌiní sâ trõ, ãꞌdusĩku ꞌdĩ tã mệmụ́jó vũ dị gá rĩi.” 39 ꞌDĩsĩdú ovũkî Gãlĩléã ní ꞌa õfú losó rĩ nze sĩ jó lemú dî ꞌa sĩ oko orí ũnzí ꞌbá rụ rĩ udó sĩ.
Yẹ́sụ̃ ijá ágó dõꞌbó trõ rĩi
40 Sáã zị̃ sĩ, mãꞌdị́ dõꞌbó trõ rĩ ẹmụ́ Yẹ́sụ̃ dí, ọwọ vụ̃rụ́ anâ andagá, a’ị́ ani oko ọꞌjọ, “Jõ nyá’ị̃a rá, nyí mâ rụ ijá wã.” 41 Kizã oko Yẹ́sụ̃ ni aní sĩ cí ꞌdĩ, ijũ dí eló ágó ꞌdĩ ni oko ọꞌjọ, “Má lẽ rá, nyâ rụ kõja!” 42 Mgbesâ dõꞌbó ꞌdĩ oja rá eꞌbedú mãꞌdị́ ꞌdĩ ã rụ engwí pẹ́lẹ́rẹ́. 43 Yẹ́sụ̃ ọzẹ ani pí oko icarã ani kĩlí-kĩlí: 44 “Kwá ộꞌjọ tã ridére ꞌdĩ mãꞌdị́ zị̃ ní ku. Rárĩ nyĩmụ nyịtẹꞌdẹ̃ru mãꞌdị́ lazĩ dî dí oko nyazĩ tã Mũzê ã ꞌjọka rĩ áni sãdínĩ du, áwusĩ ní ꞌbá kọ̃nị̃ dú ọ̃tẹ nyâ dõꞌbó oja rá. 45 Kí ágó ꞌdĩ ucí tã icarãlé aníní ꞌdĩ kurũ, iꞌdó õfú ꞌdĩ icáka. Eꞌbedú Yẹ́sụ̃ omã acị́lé ganyi ꞌa sĩ gbọ-gbọ ni kurũ. ꞌDĩsĩdú orĩ olúre kãré ꞌbá ãkó rĩ ní gá sĩ. Kí rụsâ ꞌbá kóvũ kãré ani láka rĩ ní gá.