Jisɔs kɔ ɔshɔwa ko obo
24
1 Igwu tsi ititso kɨ ngwu nsenaffa, ke ekpewa irɨng-irɨnga, upanɨng ataga akwongtɔng pa aba alew irɨg pa abɛ ka adda, aba atɨma apfona ga ke eppekwur. 2 Aba ase ɛta tsa aba abuw ke eppekwur, abɛ ka atsɛ anuna atsog ɔkanɔkan, 3 ibe ra aba anwa ke epekwur, abɛ ekpakpa tsɔ Ɔvaar Jisɔs adag nassa. 4 Masɛ akwɛ okkon bɛ, adwunɨng affa aba akwa ayɨn, anɔma apyupyɛ pyɛ ɛnna dambɛ ekpon zɔ, aba akwa abe abanga abubɛ. 5 Ozora ɔtɔw bɛ, aba ataga ntitiga ra abɛ akuwa ki iseg, anang mbo aben bɛ abɛ, “Bugudɨg gwɔ kwa abanga ana aror ɔnang kwu unɨng ka akpen ki iwang ra apfuranang? 6 Mama ɔdag kode, kɔ ɔshɔwa, zɨma otse kwo oteg banga, ibe rɛ utɨm unɨng banga abubɛ ga Galili. 7 ‘Unwa kwu Udwunɨng abɛ na ataga anang aluloma kɨ mbɔg, abɛ ammɨn-ɛ kɛ ɛkpaaga, sɔ ɔgba ngwu nttan nɔkɔrɔ ɔshɔwa ɔmanga unɨnga ka akpen.’ ” 8 Aba azɨma itɔnga rɛ.9 Sa aba akwɨn ke epekwur, aba akwa ateg atɔmɔtɔm pɛ Jisɔs zowazan idɨg ra aba ase, ɔttara ka anang ɔdwag. 10 Upanɨng mba ode Meri Magdalin ɔttara Johana ɔttara Meri ɔkka kwɛ Jems, ɔttara upanɨng ɔdwag pa attar pa abɛ na ateg atɔmɔtɔm pɛ Jisɔs idɨg ndo. 11 Itɔnga ra aba awang iker bɛ idɨg azaga, abɛ na tsera abubɛ. 12 Pitɛ ubɨna obe, ɔraw opfona ga ke epekwur, owowowa umyɨnga kɛ ɛtanga, ose ivara kpa wur mɨntsen, ɛma ɔmanga innam, akwɛ nokkon-ɛ abɛ bugudɨg gwɔ akwɛ ku uyɨna.
Jisɔs ɔkɔga ɛma oyen ɔnang abuwinnam affa
13 Igwu nzo zan, abuwinnam affa pa Jisɔs abɛ na pfona ko ofon kwo okpen Ɛmaɔs, ɔttɔg fa ammal asenaffa sa abɨn ka Jɛrusɛlɛm. 14 Abɛ na atɔnga anang ayog ki idɨg nda ra arɛ ki iyɨna. 15 Masɛ abɛ na atɔnga, atsera anang ayog, Jisɔs ukwu ofor bɛ, osenga abubɛ. 16 Ubɨnɔkpaabyi ussi bɛ abɛ anang-ɛ atɨn. 17 Jisɔs ɔbɔw bɛ abɛ, “Bigidɨg dɔ ra abanga na atɔnga ayog abɛ sa abanga na asenga?”
Aba abe ɔwang gwan ititiga ikwosisi, ikwosisi. 18 Oyog wan kwo okpen Klopas ɔbɔw-ɛ abɛ, “Ɔma wɔ ade ukuken wan mɨntsen ma ka Jɛrusɛlɛm sa kwa ana idɨg nda ra arɛ kiyina asong?” 19 Ɔbɔw-ɛ abɛ, “Bigidɨg?” Aba ateg-ɛ, “Idɨg nda ri ibang Jisɔs Kwɛ Nazarɛt, kwo ode otegɛkkawa kwu Ubɨnɔkpaabyi, kwɔ ɔkam ɛffa kɔ ɔtɔnga ɔttara ki idɨg ri ititam ussa ki ititiga tsu Ubɨnɔkpaabyi ɔttara ka ayoganang ibɨng. 20 Ɔttara otsekwɛ avaar pa affɔnɛzza pa amana ɔttara atsonang aba ataga anang bɛ, aba ata ammɨn-ɛ kɛ ɛkpaaga. 21 Abba antsog itsen abɛ ɛma wɔ mɔ ode ɔkkana kwi Izɨrɛl, so oyong ngwa, tsemma no ode ngwu nttan ri idɨg nda iyɨn. 22 Sɔ ɔjag muma, upanɨng ban pa atar mana ki ikana. Abɛ assi idɨg ri ikkon mana, sa aba akwɨn ge epekwur ma ke ekpewa irɨng irɨng, 23 abɛ aba upfura kpakpa nassa. Sa aba ammang, abɛ akwa ateg mana abɛ abɛma ase atɔmɔtɔm pu Ubɨnɔkpaabyi pa ateg bɛ abɛ Jisɔs kɔ ɔshowa unɨnga ka akpen. 24 Ayog pa amana ban aba ayɨn attara ase ke epekwur, aba ase ku udɨg ɔkka tsekwɛ upanɨng mbo aba ateg bɛ, udɨg gwan, abɛ Jisɔs nassa.”
25 Jisɔs oben bɛ abɛ, “Abangama agwungkpa, abanga itɔnga ɛwɛrɛwɛrɛ kana atsera ra ategnkkawa pu Ubɨnɔkpaabyi atɔng. 26 Abanga ka asong abɛ Krais nuse irem nda ibɨng pɛrɛ aba anang-ɛ abarada pɛ?” 27 Jisɔs utitso okwonga oteg bɛ ɔbanga ɛma oyen otse kwa aba akker ka anwɛr pa Mosis ɔttara ka anwɛr pa ategnkkawa pu Ubɨnɔkpaabyi ibɨng.
28 Masɛ abɛ ka afora ko ofon kwa abɛ na ayɨn, Jisɔs ussi dambɛ ɛma mo oyong ofon ngwo. 29 Aba atsɨn-ɛ abɛ “Nɨnga mama abbabɛ, ɛtsɔga zɔ ma, igwu ɛnamɛ ɛra.” Jisɔs ɔtwan abubɛ utu uwung.
30 Sa abɛ ata atsi utsapfɛ, Jisɔs ɔtaga brɛd, ɔzɔm atɨm, omeg ɔnang bɛ. 31 Atsen pa abɛ akwonga, aba atɨn-ɛ, ɛma ɔfara urɨg bɛ. 32 Aba awag atɔnga abɛma oyen abubɛ abɛ, “Ettem amana nelewa sɛ ɔnɔ ogwonga itɔnga nda ra aba akkɛr kɨ nnwɛr kwu Ubɨnɔkpaabyi ɔnang mana?” 33 Aba abɨna ma kɛ ɛtwak aba akwuna ka Jɛrusɛlɛm, aba kwa ase atɔmɔtɔm pɛ Jisɔs zowazan, aba anɨnga ɔwang gwan ɔttara ka anang pa anɨng abubɛ. 34 Abɛ na atɔnga, “Ku udɨg ɔkka, Ɔvaar kɔ ɔshɔwa ko obo, kɛ ɛma oyen ɔtaga ɔkɔga Saimɔn.” 35 Anang mbo affa aba ateg idɨg ri iyin bɛ ke eden, otsekwɛ aba atɨn Ɔvaar Jisɔs ibe rɛ omeg brɛd ɔnang bɛ.
Jisɔs uyɨn ɔkɔga abuwinnam pɛ
36 Masɛ abɛ na ateg ayog idɨg ndo, Jisɔs ukwu uyɨn obɛ ma abubɛ, oben bɛ, “Ɔkpakpa dɨr unɨnga abangama abubɛ.”
37 Ozora ussi bɛ, ɛkpakpa eppe bɛ, abɛ atan abɛ abɛma ase upfuranang. 38 Oben bɛ abɛ, “Bugudɨg gwɔ no ozor banga, ode yan kwa abanga na akkara ɛmma kɨ nttem? 39 Akker-m ma kɨ mbɔg ɔttara kɨ nfogkpatwak na ase abɛ amma oyen wɔ, addan-m abanga ase, ɔkpakpa ɛkpakpa ɔttara ka akaw kɔ ɔkam tsekwɛ amma nkam.”
40 Su ukkɨm ɔtɔnga ngwo, ɔkɔg bɛ mbɔg rɛ ɔttara kɨ nfogkpatwak. 41 Ɔkwɔn ode abɛ aba ataga atsera, ukwur olew ɔttara so okkon bɛ, ɔbɔw bɛ abɛ, “Abanga akam utsapfɛ ma pfa abanga ma atsi?” 42 Aba anang-ɛ etten tsa abɛ kawawa. 43 Ɔtaga utsi ma ki ititiga tsa abɛ.
44 Oteg bɛ abɛ, “Mama wɔ ode itɔnga ram rɛ wɛrɛ nteg banga, idɨg ndo ibɨng arɛ ni iyɨn tsekwɛ aba akkɛr kɨ inyɨna tsɛ Mosis ɔttara ka anwɛr pya ategnkkawa pu Ubɨnɔkpaabyi ɔttara anwɛr pyɛ Mmang.”
45 Ogwong bɛ nttem fasɛ ɔttan bɛ ku nnwɛr kwu Ubɨnɔkpaabyi. 46 Oteg bɛ abɛ, “Abɛ ka akkɛra abɛ Krais nɔ ɔdɔw irem ɔttara mɔ ɔshɔwa ko obo sɔ ɔgba ngwu nttan. 47 Anang ateg ɔnang kwidede abɛ awag akpen fasɛ Ubɨnɔkpaabyi ubɨna ɔnang bɛ, ke etse tsɛ, abɛ atitso ma ka Jɛrusɛlɛm. 48 Abanga ade attɛnsɛ ki idɨg nda, abanga ateg ayog. 49 Amma nɨntɔm ɔttog pfa Adere oben abɛ mɔ ɔnang banga ntsen banga, abanga anɨnga abɨn ma ko ofon tar ɛffa ikwu ekew banga.”
Jisɔs opfona kɛ ɛrang
50 Jisɔs utɨma abɛ aba apfona ga Betani, ɔtaga mbɔg ɔtɔga kɛ ɛrang ɔkwɔ ɔzɔm atɨm zuwa ɔnang bɛ. 51 Masɛ ɔnɔ ɔzɔm atɨm ɔnang bɛ, ubɨna urɨg bɛ, Ubɨnɔkpaabyi udɨr-ɛ opfona kɛ ɛrang. 52 Aba akpɨg-ɛ, aba ammanga akwɨna ka Jɛrusɛlɛm olew pfi ititam apfupfɛ. 53 Aba atɨma ibe ra abɛ ibɨng abɛ na attag Ubɨnɔkpaabyi kɔ ɔtsɔm kwa atɨm pɛ.