Ikamana otena kɨ ntitiga nffa
12
1 Ibe ndo ri idɨg ndo ni iyin, anang nnɔna nnɔna pa asaw-ɔsaw aba agba, aba abar ayog. Jisɔs utitso nɔtɔnga abuwinnam pɛ abɛ, “Addo akker ki yisa ra Afarisi kwo ode ntitiga nffa. 2 Udɨg kode kwakwɛ nu utsuwu tsuwa kwɔ ɔna ki iyan muyin, udɨg kode kwa abuwubuwa kwɔ ɔna mɔ ɔjag. 3 Adɛgɛ, udɨg kwa atɔng ku ugwutwar abɛ na awang kwɛ kɛ ɛya, udɨg kwa akkaw kitɔng kɨ nwur abɛ na abe ka appakɔnga aba atɔnga.4 “Nteg banga ayog pam, ɔnang banga ozor ɔbanga anang pa abɛ akema afɔ nkpakpa ra abanga, ɔtɔg abɛ dag makke assi adɛgɛ. 5 Nɨn benbɛ nkɔg banga ɔnang kwɛ abangama ma araw-ɛ ozora; abanga araw ɔnang nwo kwɛ ka abanga ɔfa, ɔkam ɛffa tsɛ mɔ ɔtag banga oke ke ekpon. Nteg banga, araw-ɛ. 6 Ɔnɔn va asen ibɨng sang pa aba akpe ka apɛni affa? Tsekwɛ apyɛ ɛkar. Ubɨnɔkpaabyi dan dan nɔ sama. 7 Kwɔ ɔyɔng muma, asisar pe etso aba akam uwuk, ɔnang banga ozor, abanga abar-m ayɔnga ɔnɔn va mbyo pɛ ɛsaw-ɔsaw.
8 “Nteg banga, ɔnang kwide kwide kwo oteg anang ki iyan abɛ ɛma ode kwam, Unwa kwu Udwunɨng no oteg atɔmɔtɔm pu Ubɨnɔkpaabyi abɛ ema ode kwam. 9 Udabɛ, ɔnang kwu ufum-m ka anang ki ititiga, Unwa kwu Udwunɨng nɔ ɔgba ufum-ɛ ki ititiga tsa atɔmɔtɔm pu Ubɨnɔkpaabyi. 10 Ɔnang kwidede kwɔ ɔtɔng ɔtɔnga pyuwa ɔnang Unwa kwu Udwunɨng, nubɨn ɔnɛg-ɛ, ɔmanga odesɛ ɔtɔng ɔtɔnga pyuwa ɔnang Ɔkpakpa kwu Ubɨnɔkpaabyi mubɨna ɔnang-ɛ.
11 “Odesa aba atɨm banga apfona kɔ ɔdappa, atɨm ɔwang ɔttara akpariponga, abanga nanga atan tsekwɛ abanga ma atɔnga ɔttara abanga akaam abangama oyen, 12 ɔkpakpa kwu Ubɨnɔkpaabyi wɔ mɔ ɔtɔn banga ma ki ibe ndo tsekwɛ abangama atɔnga.”
Otse kwɔ ɔnang kwɔ ɔkam akpog utwurutwur.
13 Udwunɨng wan kɔ ɔwang kwa aba agba, obena Jisɔs abɛ, “Okpew nnwɛr, teg unwɔkka kwam okew ekpo pya adere oppe urɨg mana.”
14 Jisɔs ɔpɔn-ɛ, “Udwunɨng, anɛwɔ oreng amma abɛ odesɛ nnɔ ɔkpariponga nɨnda nde okewekpo kwa abanga?” 15 Muma wɔ kwɔ ɔtɔnga abubɛ, “Do ɛkpakpa tsɔ pfaga ɔttara atɨg ɔma oyen otena ke eden tsi ikwɔra, akpen pɔ ɔnang nu urɨg funi ibɨna ke ekpo pyɔ ɔkam.”
16 Ma Jisɔs ukwu ɔtta bɛ otse ngwa, “Ɛdam tsɔ ɔnang kwɔ ɔkam akpog ɛnang-ɛ itɔga ri ititam. 17 Ɔtan ke ettem tsɛ abɛ, ‘Mɨn nssi yan? Ɔwang nɨkama kwɛ mɨn ntsok ekpo nbyama pyam.’
18 “Ɔmanga oben abɛ, ‘Nsong udig ma kwɛ mɨn nssi, nɨn nvɔg ɔwang kwɛ nɨn tsog ekpo pyam, mmɨn kwi ititam, fasɛ ntsog itɔga ram ɔttara ke ekpo ɔdwag. 19 Amma nɨn nteg amma oyen abɛ, “Ɔma akam utsapfɛ pfɛ ma atsi ki itso ri isawɔsaw, kwoga ɔwɔng, atsi, agwo, assi elowa.” ’
20 “Ubɨnɔkpaabyi oteg-ɛ abɛ, ‘Ɔma ukwungkpa nang, mama ki irɨng wɔ abɛma ataga akpen pɔ, nse ɔnang kwɔ mɔ ɔkama ekpo nbyo pyɛ na addo atsog ɔma oyen?’
21 “Otsengwo wɔ mo ode ɔnang ɔnang kwo oddo ekpo otsog ɛma oyen, ɛvaar nu ussa ki ititiga tsu Ubɨnɔkpaabyi.”
Nang abangama oyen udɨg ayag
22 Jisɔs oteg abuwinnam pɛ abɛ, “Nɨn nben bɛ nteg banga, nttem ra abanga ɛnang banga udɨg ɛyak ukwur akpen, ɔtɔg pfɛ ma atsi ottara kɛ ɛkpakpa tsɔ, ɔtɔg pfɛ ma ake. 23 Akpen aba ayɔng utsapfɛ, ɛkpakpa ɛyɔnga ɔvara. 24 Ker ɔnɔn pfɛ ekpa, abɛ ɛdam ka agba abɛ itɔga kassi, abɛ ɔwang kwɛ abɛ na atsog ekpo ka akam. Ubɨnɔkpaabyi wɔ nɔ ɔnang bɛ utsapfɛ, ɔma kasong abɛ ɔma abaar ayonga ɔnɔn vo! 25 Anewɔ kwɛ nɔ ɔyag ɛma oyen udig kwɛ moke ɔttara ibe ka akpen pɛ. 26 Masa ɔma ana idig nda ri ikikar nakassi, bugu udɨg gwɔ kwɛna ayag ɔma oyen udig, kidig ndoga?
27 “Ker tsekwɛ asisar pyɛ ɛkpa ene ekpom: apyɛ ɔtɔm kissi pɛrɛ ɛbɔra anɔma, nɨ mbenbɛ nteg-ɔ ɔkwɔnɔ ode Sɔlɔmɔn kɛ ɛvaar nzo tsɛ ibɨng, ɛnya nzo mokke ɔdaw. 28 Odesɛ Ubɨnɔkpaabyi ɔdaw asisar ɛnya pyɛ ɛkpa kwa tsema ɔttara kushɨn aba ataga ake ke ekpon, mu ussi yan kwu Ubɨnɔkpaabyi ɔnɔma ɛnya ntsa mɔ ɔdaw ɔyɔnga asisar, ɔma etsera tsɔ ɛkarɔkara. 29 Nang ettem tsɔ ake kɔ ɔtɔg pfɛ ma atsi ɔttara ma gwo, nang ettem tsɔ atag akema. 30 Assi ilom pɔ ɔyagbɨn abɛ na raw abuw-ɛ ekpo mbyo innam, adere Ubɨnɔkpaabyi osong ibɨng abɛ amana naror ekpo mbyo. 31 Ror ɛvaar tsu Ubɨnɔkpaabyi ekpo pyidede na akam-ɔkama.
32 “Ɔnang banga ozor avuva pam, adere Ubɨnɔkpaabyi ke olewa kwɛ mɔ ɔnang banga ɛvaar ter kwa abanga ma anɨnga ɛma bɛ. 33 Kpe akpowaga pyɔ ataga akpog mbo anang akpukpora, ror ɛkpa tsɛ ma ke akpog tsɛ ɛnamɛ ɛtam, tsog akpog ko ofon kwu Ubɨnɔkpaabyi kwa ana okpor matto, aruruwa abɛ kɔma afora, atitana meke ilɨg byɛ. 34 Zɨma abɛ ɔwang kwɛ ɛvaar tsɔ inɨng wɔ kwɛ ettem tsɔ inɨng.
Ekkera Ɔkkatsɛ
35 “Do ɛkpakpa kɔ ɔtɔm, tsog otewikang kwɔ nɔ ɔyɔma, 36 otsekwɛ otserɔtɔm nutɨgo ɔkam ɔtsɔm se mu ukwuna elowa tsɔ ɔbada, kwuna ibe rɛ mɔkwɔ akpɔg so ogwonga ɛkpaga ɛwɛrɛwɛrɛ ɔnang-ɛ. 37 Nuzuw ɔnang atserɔtɔm mbo pɛ ɔkam ɔtsom ukwuna okew bɛ sa abɛ natɨg. Nteg banga udɨg ɔkka, ɔkam ɔtsɔm nodo ɛma oyen ɛkpakpa dambɛ otserɔtɔm wɔ, ɔmanga otega atserɔtɔm pɛ abɛ utu unɨnga ɛyar ko okpokoro, ɛma mutɨma utsapfɛ otsen bɛ. 38 Nuzuw ɔnang atserɔtɔm mbo po okam ɔtsom okew bɛ sa aba addo ɛkpakpa atɨg-ɛ, wɛrɛ ɔkam ɔtsom momanga ukwu ku urɨng ttem, omanga ukwu si igwu ɛname etsowa okew bɛ sa aba addo ɛkpakpa atɨg-ɛ. 39 Udɨg ngwa akwɛ ɔttan banga ma, odesɔ ɔkam ɔtsɔm osong abɛ aruruwa aba akwuma, ɛma wɛrɛ ɔtsɔm kwɛ ɔbɔg motte aba avɔg. 40 Abanga adɛgɛ addo ɛkpakpa ukwurabɛ Unwa kwu Udwunɨng nukwun ki ibe rɛ ana itsen na tsoga.”
41 Pitɛ ɔbɔw-ɛ, “Ɔvaar, otse ngwa na tɔnga anang abba mɨntsen sa ɔttara ɔnang kwidede?”
42 Ɔvaar Jisɔs ɔpɔn-ɛ abɛ, “Ɔnang kwu ode otserɔtɔm kwɔ ɔkam esonga ɔttara kwu nussi ɔtɔm pfɔ ɔkam ɔtsɔm zuwa zuwa kwɔ ɔkam ɔtsɔm ɔtag ayog atserɔtɔm ukɛ kɔ ɔbɔg, nɔ ɔnang bɛ utsapfɛ pfa bɛ ki ibe. 43 Nuzuw ɔnang atserɔtɔm kwɔ ɔkam ɔtsɔm ukwun ukwu ose tse kwɛ nussi idɨg ndo. 44 Nɨnteg banga udɨg ɔkka, nɔ ɔtag ekpo pyɛ ibɨng ukɛ kɔ ɔbɔg onokker. 45 Odesɛ otserɔtɔm nɔ ɔtan ga kɛ ettem abɛ ɔkam ɔtsɔm ma ɛwɛrɛwɛrɛ mu kwuna, ɛma utitso ukpɨn ayog atserɔtɔm pa adwunɨng ottara pu upanɨng, ɔyaw utsi utsapfɛ, ogwo okponga ubuma, 46 ɔkam ɔtsɔm nwo kwɛ otserɔtɔm nu ukwu ki igwu tsɛ ɛma ɔnitsen notsoga ɔttara ki ibe rɛ ɛma ono song, nɔ kpar-ɛ kakuma kakuma ɔtag-ɛ oke kɔ ɔwang kwa anang pa ana etsera na kama.
47 “Otserɔtɔm nwo kwo osong ettem tsɔ ɔkam ɔtsɔm, ɛma ɛkpakpa nuda, ufum isada tsekwɛ ɔkam ɔtsɔm oben, abɛ na akpɨn-ɛ ntsiwang rɨn sawɔsaw. 48 Ɔnang kwu unudɨg no songa kwɔ ɔkam ɔtsɔm oror, ussi idig rɛ ɛban nkwur, abɛ nakpɨn-ɛ atsiva kɔgba, ɔnang kwa aba anang-ɛ pi ititam, pi ititam wɔ pya abɛ ma abɔw-ɛ, ɔnang kwa abɛ kɛ gbag abɛ otsog, gbag wɔ kwa abɛ ma abɔw-ɛ.
Kɛ Ɛmɛm sang Ɛwaanga zɔ
49 “Amma kɨnkwa mbɛ ntɨm ekpon ntsena ma kɔ ɔyagbɔin, nror mbɛ ekpon nza ititso ɛyɔma. 50 Amma nkam assi-pyenga ri irem ɔttara ko obo, ettem nɛ ayag mu udɨg tarr udɨg ngwa uyin. 51 Abanga na atan abɛ amma ntɨm ɛmɛm nkwu ma kɔ ɔyagbɨn? Mma, nɨteg banga abɛ ntɨm ɛwanga. 52 Otto mamazizan abɛ nade anang asen kɔ ɔtsɔm pa abɛ ma wang arɨg ayog, anang attan na kam abe arɨg anang affa ki ikwan, anang affa na kam abe arɨg anang attan ki ikwan. 53 Abɛ na awang otte ɔttara unwa dwunɨng ki ikwan, unwa dwunɨng ɔttara ko otte ki ikwan, ɔkka ɔttara ku unwa kwanɨng ki ikwan, unwa kwanɨng ɔttara kɔ ɔkka ki ikwan, ɔnyɛ kwɔ ɔkka ɔttara ka ɔnyɛ kwu unwa kwanɨng ki ikwan, ɔnyɛ kwu unwa kwanɨng ɔttara ka ɔnyɛ kwɔ ɔkka ki ikwan.”
Songa Ibe
54 Jisɔs oteg ayoganang pa aba atow abɛ, “Odesa ase akkpang si ibɨn ga ɔtsɔga dudon, songa abɛ ɛrang ɛnamɛ etew, atsɛ etew. 55 Ibe rɛ ibɨm ibɨn ikwu ki isegiseg, ɔwang no obor obor, akwu ode otse ngwo. 56 Akama ntitiga nffa! Abanga asong ma ntsimma rɔ ɔyagbɨn ɔttara ka akkpang otse kwa apyɛ ikwu iyɨn, odeyan kwa abanga ntsimma rɛ ibe nda na asonga?
57 “Bugudɨgwɔ abanga ana udɨg ɔkka nataga assa? 58 Masa abanga na pfona ma kɔ ɔtsɔm kwi iponga ɔttara ko oyogikwan, yɔr abanga agbɛmma keden pɛrɛ abanga awem, ɔnamanang nuda oyogikwan nɔ ɔtwar banga oke ɔkpara aponga ɔbɔg, ɔkpara aponga ɔtag banga oke akkɔtama, akkɔtama ɔtag banga ake kɨngbakkɔw ɔtsɔm. 59 Nteg banga udɨg ɔkka, akpog pɔ ɔkpariponga ɔkpar ɔnang banga, abanga na anang ibɨng pɛrɛ abanga ayɨn ki iyan.”