Jisɔs Otɔm Abuwinnam Pɛ Arraw Attan Ukkuma Zowaffa
10
1 Okpe ngwo oseng, Ɔvaar Jisɔs oreng abuw-ɛ inam araw attan ukkuma zowanffa adɛgɛ, ɔtɔm bɛ anang ka affa ka affa aba ta ki ifon ɔttara ki iwang rɛno oben abɛ uyɨn. 2 Jisɔs oteg bɛ abɛ, “Itɔga ibar-ɔbar, anang pi itɔga na sawa. Zɔm atɨm nang Ɔvaar kwi itɔga ɔtɔm atɔm-nang aba akwu kwa attara ki imɨn. 3 Asɔng, azɨma abɛ ntɔm banga otse kwa arɔman va ana ninga ko ottemkwɛ kwɨ nttɔ. 4 Nang ɛkpa nwa sa akpog atɨm, nang ɛkpa atɨm, nang ntwag atɨm. Ɔttara nang ɔnang asɨm ke eden.5 “Odesa abanga nwa kɔtsɔm, atɨmeden aben abɛ, ‘Udɨrada kwu Ubɨnɔkpaabyi unɨnga ɔttara kɔ ɔtsɔm ngwa abɛ.’ 6 Odesa ɔnang kwu udɨrada unɨng muma, udɨrada nu nɨnga abɛ, odesɛ ɔnang kwu udɨrada ɔnanu nɨnga, udɨrada no tor abangama oyen. 7 Anɨnga mma kɔ ɔtsɔm ngwo. Atsi attara agwo ɔttɔg fidede pfa aba atɨm akwu. Ukwurabɛ ɔtɔm-nang ɔbanma kwa aba nang-ɛ akpog pɛ. Ananga asenga akpanga ki itsɔm ki itsɔm.
8 “Odesa abanga nwa ko ofon abɛ alow banga atsi ɔtɔg fidede pfa aba aber banga. 9 Agweng anang pɔ ɔmma-bɛ-omma muma attara ateg bɛ abɛ, ‘Ɛvaar tsu Ubɨnɔkpaabyi ka abanga effora.’ 10 Odesa abanga nwa ko ofon, aba na abanga na taga, asɔng ga nden ro ofon ngwo, aben abɛ, 11 ‘Ububuma kwo ofon ngwa kwɔ ɔbɛr mana kɨ nfokpatwak ka anfɔna masi ikkamana abɛ Ubɨnokpaabyi nopong banga oponga, azɨma abɛ Ɛvaar tsu Ubɨnɔkpaabyi kefora.’ 12 Nteg banga udɨg ɔkka, nuzuw anang pɨ Sodom ɔyɔnga ofon ngwo ki igwu si iponga.
13 “Nupyuw ɔnang banga anang pa Korazin ottara anang pa Bɛtsaida, wɛrɛ udabɛ ikukona dɨg da ra aba asi anang banga, aba asi anang anang pa Tai ɔttara Sidon, apyuwa nang mbo, wɛrɛ aba kɨmpyuwaa ndo ɔbɔg atta kan aba nɨnga nyer aba ke ekpo tama aba afona atɨtɔng ke etso. 14 Nuzuw ɔnang Tai ɔttara Sidon ɔyɔnga abangama ki igwu si iponga. 15 Abangama Kapanum abanga na tan abɛ Ubɨnɔkpaabyi nɔ dɨr banga opfona kɛ ɛrang? Abanga na pfon ke ekpon.”
16 Jisɔs oben abuwinam abɛ, “Ɔnang kwɔ ɔkɔm itɔng kɔ ɔtonga kwa abanga, ɔtaga ɔtɔnga ngwo ka amma ɔtaga. Ɔnang kwu ufum banga ka amma ufuma. Odese aba afum amma aba afum Ubɨnɔkpaabyi kwɔ ɔtɔm-ɔ.”
17 Abuwinnam mbo araw-attan ukuma zowanffa masa aba akwun, aba akwun olew afufɛ, aba ben abɛ, “Ɔvaar Jisɔs akpakpa pyuwa atser ɛnang mana ke etse tsɔ.”
18 Jisɔs ɔpɔn bɛ abɛ, “Amma nse Sɛtan su ubɨn ke erang otto masa aman-man. 19 Amma ka abanga ɛffa nnanga tsa abanga ma atɨma abar ɔzɔw ɔttara ka anɨnang, ɔttara abanga akema nffa ibɨng ro oyogikwan, ɔttɔg fɛ mu si banga ko ode. 20 Ɔkwɔn ode abɛ ka abanga ɛffa nzo nnanga, ɔnang banga olew abɛ apyuwa-nang ka tsera anang banga, olew banga abɛ ntse ra abanga kɨnwa ku nnwer kwɛ ɛrang.”
21 Ibe ndo ɔkpakpa kwu Ubɨnɔkpaabyi ussi Jisɔs olew-ɛ, oben abɛ, “Amma ntsona Adere Ɔvaar kwɛ ɛrang ɔttara ki iseg. Ukwurabɛ ɔma aduw idɨg nda ka anang pa akam esonga ɔttara pa song nwer, ɔma akwa jag anang anang pa ade masu uvava. Ntsera nnang-ɔ, Adere ottem-dɨr kwɔwɔ ma.
22 “Adere wɔ ɔnang-m ekpo pyi dede ibɨng, ɔnang ko ode kwo osong Unwa ono Otte nuda ɔttara ɔnang ko ode kwosong Otte unu Unwa nuda ɔttara ka anang mbo pu Unwa ɔdagɛ abɛ ɔjag Otte ɔnang bɛ.”
23 Jisɔs ɔwag innam okker abuwinnam, ɔtɔnga abɛma abubɛ mɨtsen, oteg bɛ abɛ, “Uzuw tɔng ɔnang banga sa abanga se idɨg nda ra abanga ase. 24 Nteg banga abɛ ategnkkawa pu Ubɨnɔkpaabyi ɔttara ka avaar aba ror eden tsa abɛ ma se otse kwa abanga ase, abɛ na sa, ɔttara ki idɨg ra abanga awang abɛ na awanga.”
Otse Ɔnang kwu Sameriya Ussi Izuwa
25 Igwu zan ɔnang kwɔ ɔnɔ kpewa inyɨna tsi Mosisa ubɨna obe abɛ oyoma Jisɔs, ɔbɔw-ɛ abɛ, “Okpewnnwer, mɨ nssiyam pɛrɛ nkama akpen pa ana itɨma na akama?” 26 Jisɔs ɔpɔn-ɛ abɛ, “Inyɨna tsɛ Mosis eben aban? Ɔma ajer yan?” 27 Ema ɔpɔn-ɛ abɛ, “ ‘Ɔvaar Ubɨnɔkpaabyi ɔdag-ɔ ke ettem tsɔ ibɨng, kɨ ntana rɔw ibɨng, kɔ ɔkpakpa kwo ibɨng ɔttara kɛ ɛffa tsɔ ibɨng’; ɔttara ‘Oyog-rig-banga kwɔ ɔdag-ɔ masɔ ɔma oyen.’ ”b
28 Jisɔs oben-ɛ abɛ, “Ka pɔna obengana, sɔng ta assi otsɛ gwoma fasɛ arɨg akpen.”
29 Ɛma oben abɛ ɔkɔga abe ɛma ode ɔnang ɔkka, ɔbɔw Jisɔs abɛ, “Anɛwɔ ode oyog-rɨg-banga kwam?”
30 Jisɔs ɔpɔn-ɛ abɛ, “Udwunɨng wan ubɨn Jɛrusɛlɛm abɛ ɔta Jɛrikko. Utu pɨra ge eden, oto to kɨ mbog raruruwa. Aba tsar-ɛ ekpo urɨg irɨnkɨm. Aba kpɨn-ɛ tarr urɨg kɛm ope. 31 Masɛ uyum muma ɔffɔnɛzza kwu Ubɨnɔkpaabyi okwo oseng ke eden nzo, ukwu use udwunɨng nwo uyɨm muma, ɛma oseng ɔkan-ɔkan. 32 Ɔnang kwɛ no otor ɔfɔnɛzza ukwu seng ma ke eden nzo, ukwu ose udwunɨng nwo uyum muma, ɛma oseng ɔkan-ɔkan. 33 Oyog kwu Sameriya ukwu seng ke eden nzo ose udwunɨng nwo, usɛ okwo. 34 Ɔta to oker-ɛ, ɔdaw-ɛ awag byo, ɔtaga ana ɔttara ka atwug oke ma ka awak. Udɨra onang nwo ɔnana ke eten tsɛ tsɔnɔ ɔtɔga anang, ɔtɔg-ɛ opfona kɔ ɔtsɔm kwa akiken-nang na yam ayɨma. Okker-ɛ. 35 Si igwu etsow, ɔtaga adinari nffa ɔnang ɔnang nwo kwɔ no okker ɔtsɔm gwo. Oben-ɛ abɛ, ‘Ker-ɛ nang-m tarr mmanga inam, odesa akpog mbo anana gba nɨnɔngɔ akpog pa aba arɨg.’ ”
36 Jisɔs ɔbɔw-ɛ abɛ, “Ka anang bo attan, anɛwɔ ode oyog-urɨg-banga kwɔ ɔnang nwo kwo to kɨ mbɔk ra aruruwa?” 37 Ɔnang kwo osong inyɨna tsɨ Mosis kidan ɔpɔn-ɛ abɛ, “Ɔnang nwo kwɔ ɔkam ikwosisi ɔnag-ɛ.”
Jisɔs oben-ɛ abɛ, “Sɔng ta si otsɛ ngwo.”
Jisɔs uduw Matta ɔttara Meri
38 Si Jɨsɔs ɔttara abuwinnam abɛ na senga, aba ta wem ko ofon, ukwanɨng kwo okpen Matta, ogwong ɔtsɔm kwɛ ɔnang-ɛ. 39 Ɔkam unwɔkka kwo okpen Meri kwu unɨng ɛyɛr ɔbanga Ɔvaar ɔnɔ ɔkɔm-ɛ. 40 Matta ɔdwɔg-ɛ ki itɔm sawada rɛ unu si mɨtsen. Ubɨna ɔtɔ bɔw Jisɔs abɛ, “Ɔvaar, uzuw ma abɛ unwɔkka kwam ottem ɔbɔg nkpɨn mɨntsen? Ben-ɛ ukwu kwo otor-m!”