Etsera tsɛ Ɔnang ttamma kwa Asɔza
7
1 Ibe rɛ Jisɔs ukkum ɔtɔnga kwɛ no otega anang, ɔtɔnwa ga Kapanum. 2 Mumma wɔ kwɛ otserɔtɔm kwɔ ɔnang ttamma kwa asɔza, kwu unɨng-ɛ ke etem kidam, ɔmmɛ, urɨg kɛm oppe. 3 Ɔnang ttamma kwa asɔza ɔkwɔ ɔwanga idɨg rɛ Jisɔs nussi, ɔkwɔ ɔtɔm atsonang pa Aju ka Jisɔs aba ajer-ɛ ukwu, okwo ogweng otserɔtɔm kwɛ. 4 Ibe rɛ aba kwa awem ka Jisɔs, aba tsɨn-ɛ, “Ɔdwunɨng nwa ɔbanma kwɔ ɔma akkan-ɛ. 5 Ukwurabɛ ofon kwa amana ɔdag-ɛ kidam, ɛma wɔ umun ɔdappa ɔnang mana”. 6 Mawɔ Jisɔs ubuw bɛ innam.Urɨg kɛm owem kɔ ɔtsɔm, ɔnang ttamma kwa asɔza ɔtɔm ayogdikow aba akew-ɛ abɛ, “Ɔvaar, oma oyen udɨg ka ayag, amma wɛrɛ nɨ nbana kwɔ ɔma ma kwu ka kam kɔ ɔtsɔm. 7 Akwɛma gwɔ ɔnanɔ ɔbanna kwa amma oyen nkwu, tɔng ɔtɔnga, otserɔtɔm nwa kwam no ogwengogweng. 8 Amma nde ɔnang kwu ubuw ɔnang kwu utɨm ɛffa, ɔttara ayog pa abuw-m innam. Nkema nteg ɔnang wan abɛ, ‘Sɔng’ ɛma opfona, nteg oyog ɔdwag ‘Kwu’ ɛma ukwu, nteg otserɔtɔm kwam ‘Si nva’ ɛma ussi.”
9 Ibe rɛ Jisɔs ɔwang ɔtɔnga ngwo, akwu okkonɛ, ɔwag okker anang pa asawɔsaw pa na abuw-ɛ innam, oteg bɛ abɛ, “Ɛtsera nza ntɨg nssa ki iseg ri Izɨrɛl.” 10 Masa anang pɔ ɔtɔm ammang innam kɔ ɔtsɔm, aba ase otserɔtɔm ko ogwenga.
Jisɔs ɔshɔw unwa kwo oppokwa
11 Masi ibe ndo iseng, Jisɔs uyɨn ko ofon kwo okpen Nen, abuwinnam pa Jisɔs ɔttara anang pa asawɔsaw abuw-ɛ innam. 12 So ofor ki ikasema ro ofon, ose upfuranang kwa aba atɔg, unwa dwunɨng nwo kwo oppe. Ɛma mɨntsen wɔ kwo opokwa ɔmaan. Anang pa asawɔsaw po ofon ngwo aba abuw ɔkka innam. 13 Ibe rɛ Ɔvaar Jɨsɔs usse-ɛ, usse-ɛ okwo, oben-ɛ abɛ, “Dag kagama.”
14 Muma wɔ kwo onem ɔtɔ ɔdan ikpang ru upfura, anang pa atɔg ikpang ndo aba abe. Jisɔs oben abɛ, “Unwa dwunɨng, nɨn nben abɛ, bɨna be.” 15 Upfuranang nwo ubɨna unɨnga ɛyɛr, utitso otɔnga ɔtɔnga, Jisɔs ɔtag-ɛ ɔnang ɔkka.
16 Anang akwɛ ozor bɛ, aba kponga ma atsona Ubɨnɔkpaabyi, aba aben abɛ, “Otegɛkkawa kwu Ubɨnɔkpaabyi kwi ididen kukwa otor mana, Ubɨnɔkpaabyi kukwa abɛ ɔkwɔ ɔkkan anang pɛ.” 17 Idɨg zuwa nda rɛ Jisɔs ussi aba awanga ka Judiya ɔttara ki ifon ri ibang muma.
Atɔmɔtɔm pɛ Jɔn Opyenga assi
18 Abuwinnam pɛ Jɔn aba ateg-ɛ idig rɛ Jisɔs nussi ibɨng, Jɔn ojer abuwinnam pɛ affa. 19 Ɔtɔm bɛ ga kɔ Ɔvaar Jisɔs aba ta abɔw-ɛ abɛ, “Ɔma wɔ kwa amana natɨg kwɛ mu ukwu, sa amana na atɨg ɔnang ɔdwag?”
20 Sa aba akwa awem kɔ ɔwang kwɛ Jisɔs unɨng, aba ateg-ɛ abɛ, “Jɔn opyenga assi otɔm mana kakɔ abɛ amana abɔw-ɔ abɛ. ‘Ɔma wɔ makwu sa amana antɨg ɔnang ɔdwag?’ ”
21 Ki ibe ndoma, Jisɔs ogweng anang pɛ ɛkpakpa ɛnabɛ nizuwa ɔttara kɨ mmada, ɔmanga ussi akpakpa pyuwa apyɛ iyɨn irɨg bɛ, ussi anang pa kpatsen aba ase iyan. 22 Muma wɔ kwɔ ɔmang ɛkkawa ɔnang atɔmɔtɔm pɛ Jɔn. “Sɔng abanga ateg Jɔn idɨg ra abanga ase attara awanga; ayog pa kpatsen ase iyan, akwukwu aba abɨn asenga, ayog pa atto akpokora aba agweng, ayog pa akpa atɔng aba awanga, ayog pa appope aba shɔwa, akpukpora awanga ɔtɔnga zuwa. 23 Ɛllɛ ede sɔ ɔnang nwo kwɔ ɔnɛ kɛnɔ ɔdwaga amma bɛ.”
24 Masa atɔmɔtɔm pa Jɔn abɨn, Jisɔs otitso ɔtɔnga anang pa asawɔsaw abubɛ ɔbanga Jɔn, “Abanga ayɨn ki imun tsa anang ana arɨg ata ase mbang? Abanga ata ase otse kwɛ ibum niguma ager? 25 Ɔna otse ngwo nuda, abanga ayɨn kiyan ata ase mbang? Ata ase ɔnang kwɔ ɔdaw ɛnya sa? Mma, ayog pa ake anɔma pɛ ɛkpɔgɛ ɛsha, abɛ na atsi akpen abɛ anɨnga ka avaar ter. 26 Ɔma ammanga ayɨn ki iyan ata ase mbang? Ata ase otegɛkkawa kwu Ubɨnɔkpaabyi sa? Nteg-ɔ Jɔn ɔyɔnga otegɛkkawa kwu Ubɨnɔkpaabyi. 27 Jɔn wɔ kwɛ wɛrɛ aba akker abɛ:
“ ‘Amma ntɔm ɔtɔmɔtɔm kwam ukwu pɛrɛ ɔma,
kwɛ mo oddo eden tsa abanga otsog banga.’
28 Nteg banga, ɔnang ko ode kwu ukwanɨng ɔman-ɛ kwɔ ɔyɔnga Jɔn; ɔnang kwɔ ɔkar ki idam kɛ Ɛvaar tsu Ubɨnɔkpaabyi ɔbar ɔyɔnga Jɔn.”
29 Anang nbo ibɨng kidam kidam abɔwatasi, ibe ra aba wang ɔtɔnga kwɛ Jɨsɔs aba atsera abɛ eden tsu Ubɨnɔkpaabyi zɔ ede ɔkkatsɛ, ukwurabɛ Jɔn wɔ opyeng bɛ assi. 30 Afarisi ɔttara akpewinyɨna inyɨna tsɛ Mosis aba afum nttɔna ru Ubɨnɔkpaabyi ɔbanga abubɛ, ukwurabɛ aba afum abɛ Jɔn ɔnang bɛ assi opyeng.
31 Jisɔs okwo oben abɛ, “Ntag banga nyoma banga anang ma ki ibe nda? Abanga ade masa abanga nang? 32 Abanga ade masa uvava pa anɨng ɛyɛr kɛ ɛsha, abɛ na ajer ayog:
“‘Abba na kɨrr nbɨn anang banga,
abanga afum ituwa;
ankɔna ebo-mang anang abanga,
abanga afum ɛgama.’
33 Jɔn opyenga assi ibe ru ukwu utsapfɛ nutsa, atwug nugwa, abanga aben abɛ, ‘Ɔkam ɔkpakpa pyuwa.’ 34 Unwa kwu Udwunɨng ukwu, utsi utsapfɛ, ugwa atwug, abanga aben-ɛ abɛ, ‘Ode ɔgwɔra ɔttara ubuma atwug, oyogdikow kwa abɔwatasi attara kwa aluloma.’ 35 Esonga nɛkɔga ɔkkatsɛ otse kwa anang aba rig.”
Ululoma Kwanɨng ɔfɔn Jisɔs Ana pa Alew Irɨg
36 Ibe ra Farisi wan ojer Jisɔs abɛ ukwu ka kɛ kɔ ɔtsɔm ukwu utsi utsapfɛ ɛmabɛ, Jisɔs otsera uyɨn ga Farisi kɔ otsɔm, ɔraga eyɛr unɨnga abɛ utsi utsapfɛ. 37 Ibe rɛ ululoma kwanɨng kwu rɨg ma ofon ngwo ɔwang abɛ Jisɔs nutsi utsapfɛ ga Farisi kɔ ɔtsɔm, ukwanɨng nwo utɨm ana pa alew irig ke ekpomma tsi zuwuzuw uyɨn muma. 38 Obe Jisɔs ki innam kɨnfokpatwak pɛrɛ nɔgama, asen pɛ aba na afon-ɛ ma kɨnfokpatwak. Ɛma utɨm asisar rɛ re etso ɔfɔn--ɛ, utɨma ɛdag ɔdan-ɛ ma kɨ nfokpatwak, opyeng-ɛ ana nbo pa alew irɨg kɨ nfokpatwak.
39 Ibe rɛ Farisi kwo ojer-ɛ ose idɨg ndo, oben ɛma oyen abɛ, “Odesɛ udwunɨng nwa ode otegɛkkawa kwu Ubɨnɔkpaabyi wɛrɛ no songosong ɔnang tse kwɛ nɔdɛn-ɛ mase ukwanɨng nwo ode ululoma.”
40 Jisɔs ɔpɔn-ɛ abɛ, “Saimɔn, nkam udɨg kwɛ mɨnteg-ɔ.”
Saimɔn otsera abɛ, “Okpew nnwer nnang kɨ nkɔm itɔng.”
41 Anang affa aba atsi ofor ko oforakpog, ɔnang wan utsɨ-ɛ ofor aadinari ɛnɔna ukkuma araw asen, ɔnang ɔdwag utsi-ɛ ofor adinari arraw affa ukkuma zow. 42 Abɛma anang affa ɔnang kwɔ akam akpog pɛ mɔ ɔmanga ɔnang kode, ɛma uffura ifor ndo iffa, anɛwɔ mɔ ɔdag-ɛ kidam?
43 Saimɔn ɔpɔn-ɛ abɛ, “Ntan bɛ nwo wan kwa aba affɨr ofor kwi ititam, ɛma wɔ kwɛ mɔ ɔdag-ɛ kidam.”
Jisɔs oteg-ɛ abɛ, “Ɔma ku udig ɔkka atɔnga.”
44 Jisɔs ɔwag okker ukwanɨng nwo, ɔtɔnga Saimɔn abɛ, “Ku ukwanɨng nwa asa, nkwu ka kɔ ɔtsɔm, ɔma assi kana ananga abɛ nkpow nfokpatwak, ukwanɨng nwa utɨm isen okpow-m nfokpatwak, utɨm asisar re etso ɔfɔn nfokpatwak ram. 45 Ɔma kana lowa ɔttara kɛ ɛdag taga, ukwanɨng nwa so otitso ɔnwa ma kɔ ɔtsɔm kwɔ, utumɔ ɔttag nfokpatwak ram ɔttag. 46 Ɔma ana kana pyenga ke etso, ukwanɨng nwa opyeng-m ana pa alew irɨg kɨ nfokpatwak ram, 47 Nɨnbenbɛ nteg-ɔ abɛ, npyuwa rɛ kusa kɨnbɨna nnang-ɛ, ukwurabɛ ɔkam ididaga ri ititam. Ɛma kwa aba bɨn anang-ɛ ki ilom ri ikikar ɔkɔga ididaga nwa.”
48 Jisɔs oben ukwanɨng nwo abɛ, “Npyuwa rɔ kɨ nbɨna nnang-ɔ.”
49 Ayog pa aba na atsi utsapfɛ abubɛ aba awag akker ayog, aba atɔnga abɛ, “Bɔgɔ ɔnang wɔ ma kwɔ nubɨna ɔnang anang kɨ npyuwa?”
50 Jisɔs oben ukwanɨng nwo abɛ, “Etsera tsɔ kɔma issa annanga, sɔng otemdɨr awuwɛ.”