Ɲabɔnɛ ɲa laka koe
9
Isa be tanbila wagate min tɔ,
a ka kaye do yen min be sɔtɔren ɲabɔnɔya tɔ.
2 Isa la talibenu ka a maɲininka,
anu ko:
«Karamɔgɔ,
ɲɔmɔ le ka junubu koe ma han kɛ kaye ni sɔtɔ ɲabɔnɔya tɔ,
ale ba,
ka a sɔtɔlanu?»
3 Isa ka anu jaabi,
a ko:
«Kɛ kaye la junubu koe le ma de,
a sɔtɔlanu tugun na junubu koe le ma de!
A be sɔtɔren de ɲabɔnɔya tɔ alako Ala la walenu ni yita le a la ko tɔ.
4 Fanni ɲɔ be kɛnɛren,
a fɛrɛ bele fɔ n ni n Kiilá tɛn wale ma.
Sue tini don,
mɔgɔ yo te nɔ walila wo tɛmuɛ.
5 Fanni n be dunuya,
n mu dunuya kɛnɛ la.»
6 A to banta wo fɔla,
a ka daje tutɛ duge tɔ,
a ka bɔra sogin a daje la,
a ka a madon ɲabɔnɛ ɲanu ma.
7 A ka a fɔ a ye:
«Taga i ɲanu ko Silɔmu ji madɛndula tɔ.»
A fɔla Silɔmu,
wo be fɔren de «Kiilá».
Wo butɔ,
ɲabɔnɛ tagata,
a ka a ɲanu ko.
A saagi tɛmuɛ,
a be ɲɔ tayenna.
8 A sigiɲɔgɛnu nun minnu be kɛnɛ a yenna tarile ma tɔ,
wonu be a fɔla:
«Min be sigiren nun tarili mala,
wolo ma kɛ la ba?»
9 Donu ko:
«Ale le mu.»
Donu tugun ko:
«Ale ma,
anu mulunta le.»
Kɔnɔ a yɛtɛ ko:
«Nde le yati mu.»
10 Wo butɔ,
anu ka a maɲininka:
«I ɲanu lakata kama le?»
11 A ka anu jaabi,
a ko:
«Anu be kaye min ma Isa,
wolo ka bɔra sogin,
a ka a madon n ɲanu ma,
a ka a fɔ aa n ni taga n ɲanu ko Silɔmu ji madɛndula tɔ.
N tagata n ɲanu ko ɲɔ le,
n naata ɲɔ tayen.»
12 Anu ka a maɲininka:
«Ale kaye be mina le?»
A ko:
«N ma a lɔn.»
13 Kɛ kaye min mu ɲabɔnɛ la nun,
mɔgɛnu ka a doni Farisinu dula.
14 Wo ka a taran,
wo luŋɛ Isa ka bɔra sogin lun min na,
a ka kaye ɲanu laka,
wo mata sulen lɔ́gɛ́ le la.
15 Awa,
Farisinu tugun fɔlɔta a maɲininkala,
a ɲa lakata ki min na.
A ka a fɔ anu ye:
«Ale kaye ka bɔra madon n ɲanu ma,
n ka anu ko,
kɔtɛ n be ɲɔ tayenna.»
16 Farisi donu ka a fɔ:
«Kɛ kaye bele fatanden Ala la,
bayi a bele sulen lɔ́gɛ́ makantaren.»
Kɔnɔ donu ko:
«Junubutɔɛ si nɔ kɛ kabanakoenu mɔɔle mala ba?»
Wo butɔ,
Isa la ko ka anu tafatan fila la.
17 Anu mɛn ka a fɔ ɲabɔnɛ ye,
min ɲanu lakata,
anu ko:
«A to bata i ɲanu laka,
i be fen de fɔla a la ko tɔ?»
A ko:
«A mu nabiyonmɛ do le la.»
18 Wo bɛ,
Yahude kuntigenu bele laaren a la,
ka a mu ɲabɔnɛ le la nun,
a ɲanu naata laka.
Wolo mu,
anu ka kiilá sɔ a sɔtɔlanu ma,
wonu ni na.
19 Anu la kereŋɛ ɲɔ,
Farisinu ka anu maɲininka,
anu ko:
«Wo la den kayireŋɛ ma kɛ la ba?
Wo be a fɔla,
a sɔtɔta le a ɲa bele?
Ka a ɲɔgɔnna le,
a ka ɲɔ tayen kama le?»
20 A sɔtɔlanu ka anu jaabi,
anu ko:
«Mɔ ka a lɔn mɔ la den kayireŋɛ le mu kɛ la,
mɔ mɛn ka a lɔn a sɔtɔta le a ɲa bele.
21 Kɔnɔ a ka ɲɔ tayen ki min na,
mɔle ma wo lɔn.
Min ka a ɲanu laka,
mɔ ma wo tugun lɔn.
Wo ale maɲininka bayi denden ma a la bitugun.
A ka a kunma koe bɛ lɔn.»
22 A sɔtɔlanu ka wo fɔ le,
anu to be kilanden Yahude kuntigenu la,
bayi wonu dun bata bɛn a ma,
ka a fɔla,
min yo ka a fɔ Isa mu Ala la mɔgɔ masubɛreŋɛ le la,
anu ni wo tigi latɔn a kana don kawandi ma boŋɛ butɔ.
23 Wolo ka a ma,
a sɔtɔlanu ka a fɔ aa denden ma a la bitugun,
anu ni ale maɲininka.
24 Awa,
kaye min mu ɲabɔnɛ la nun,
anu ka wo kele mɛn tugun,
anu ka a fɔ a ye:
«Tɔɲa fɔ i nun Ala tɛma.
Mɔle ka a lɔn ale kaye mu junubutɔɛ le la.»
25 A ka anu jaabi:
«Ka junubutɔɛ le mu a la,
nde ma a lɔn.
N ka ko dɔndɔ kan lɔn:
n mu ɲabɔnɛ le la nun,
kɔnɔ kɔtɛ n ɲanu bata laka.»
26 Anu mɛn ka a fɔ a ye:
«A ka fen ma i la?
A ka i ɲanu laka kama le?»
27 A ka anu jaabi,
a ko:
«N ɲan bata wo fɔ wo ye nun,
kɔnɔ wo ma a bita.
Fen de wo mɛn be diren a mɔɛla tugun?
A sɔgɔ be wo la le ba wo ni ma a la talibenu la?»
28 Wo butɔ,
anu ka a nani,
anu ka a fɔ a ye:
«Ile le mu kɛ kaye la talibe la.
Mɔle kan mu Musa le la talibenu la.
29 Bayi mɔle ka a lɔn,
Ala kumata le Musa la,
kɔnɔ mɔ ɲan ma kɛ kaye kan bɔɔdula lɔn feu.»
30 Kaye ka anu jaabi,
a ko:
«Ee,
awa kabanako banba le mu kɛ la,
a fɔla wo ma a bɔɔdula lɔn,
adun bata n ɲanu laka.
31 Mɔ ka a lɔn Ala te junubutɔɛ kulɛ lamɔɛ.
Kɔnɔ ka mɔgɔ min mu Ala batulá la,
ka i ka a sagoe ma,
Ala si i tigi kulɛ lamɔɛ le.
32 Bɔɔla dunuya data,
a bele mɔɛren mɔgɔ do ka ɲabɔnɛ ɲanu laka,
min sɔtɔta ɲabɔnɔya tɔ.
33 Ka kɛ kaye bele fatanden Ala le la nun,
a te nɔ fenfen mala nun.»
34 Anu ka a jaabi:
«Ile sɔtɔta junube le yati tɔ.
Ile nɔn be diren mala mɔ karamɔgɔ le la ba?»
Anu ka tɔŋɛ sigi a la,
a kana don bitugun kawandi ma boŋɛ butɔ.
Ɲabɔnɔya yati
35 Isa ka a mɔɛ ka a fɔla ɲabɔnɛ min ɲanu lakata,
anu bata a latɔn a kana don kawandi ma boŋɛ butɔ bitugun,
wo butɔ Isa tagata a ɲini.
A ka a yen wagate min tɔ,
a ka a fɔ a ye,
a ko:
«I be dɛnkɛnɛyaren Adamadeŋɛ ma ba?»
36 A ka a jaabi,
a ko:
«N Marige,
ɲɔmɔ le mu wo la?
Alako n ni dɛnkɛnɛya a ma.»
37 Isa ka a fɔ a ye:
«I ɲan be a yenden.
I nun nde min be kumala ka,
wolo mu.»
38 A ko:
«N Marige,
n bata dɛnkɛnɛya i ma.»
A naata sujudu a ye.
39 Isa ko:
«Nde be naren de kɛ dunuya n ni mɔgɛnu makiiti mɔɔle do la:
wolo si a ma minnu mu ɲabɔnɛ la,
wonu ɲanu si laka,
minnu tugun be ɲɔ tayenna,
wonu si ma ɲabɔnɛ la.»