Adamadeŋɛ be toren de iko fɔɲɛ
39
Dauda la beete do le ka,
beeti bɔɔlanu la kuntige Yedutun ye.
2 N bata a fɔ nun n ko:
«N si n hakkile to n wali ɲa ma,
alako n kana junube sɔtɔ n na kuma tɔ.
N si n da bita
alako n kana wo kuma mɔɔle fɔ mɔgɔ koroŋɛnu ɲala.»
3 N ka n mɔdɛ jen,
n ma fenfen fɔ,
kɔnɔ wo bɛ butɔ n na tɔɔrɛ tota koloyala.
N na dumɛ naata dan natanbi.
4 N juse be n bintanna n butɔ,
n na tɔɔrɛ bata to iko ta tini bita.
Wo butɔ n nata kumare fɔlɔ,
n ko:
5 «Ee Alatala,
n na simaya daŋɛ fɔ n ɲɛ,
anun n na simaya kɔnte be tagala han ka min na,
alako n ni a lɔn n na dunuya takunte be teriyala banna muntuma.
6 I bata simaya min sa n ɲɛ,
a wutu iko bolo butɔ la yajɛ;
n na simaya,
ko fufafu le mu ile ɲala.
Adamadeŋɛ bɛ be toren de iko fɔɲɛ min be tanbila.»
I sulen.
7 Mɔgɛ be tagamanna iko niiniŋɛ,
a be a lamagala fu.
A be nafule madɛnna,
kɔnɔ min si naa a jigan a tanbi kɔma,
a ma wo lɔn.
8 Awa,
n Marige n si n hakkile to fen de ma kɔtɛ?
N be yigi saren ile le ma.
9 I ni n nakisi n na junubenu bɛ ma.
I kana sɔn hakkili bɔnɛnu ni n fɛɛya.
10 N ni boboya ma,
n te kuma bitugun;
bayi ile le ka a lagiri ɲɔgɔnna.
11 I ni i bole lafɛɛya n ma;
bayi i bole la botegere bata n halagi.
12 Ka i be mɔgɛ tɔɔrɔla,
i ni a ɲagankata a la junube la ko la,
wo butɔ i be a la nátá ɲinma le tiɲala,
iko kise be fondo sɔn bɛlɛŋɛ tiɲala ki min na.
Tɔɲa,
adamadeŋɛ bɛ be misaliren fɔɲɛ le la.
I sulen.
13 Ee Alatala,
n na mamataraŋɛ mɔɛ,
i ni i tolo sɔ n diri kulɛ la.
I kana ma tolobɔnɛ la n na dire kɔtɔ.
Bayi n mu luntaŋɛ le la i bata,
n tasaagila le iko n benbanu bɛ mata ki min na.
14 Ee,
diɲa n ma,
i ni i ɲa bɔɔ n na,
alako n mɛn ni nɔ sɛɛwala tugun,
yannun n ni bɔɔ yan n ni faga.