Mɔgɔ koroŋɛ ni a sɔŋɛ sɔtɔ
35
Dauda la beete do le ka.
Ee Alatala,
i ni n na tirinnanu latirin.
Minnu be n kɛlɛla,
i ni wonu kɛlɛ.
2 I ni kɛlɛmafeŋɛ jigan n kanta koe la,
a banba nun a lanma,
i ni wuli n dɛman koe la.
3 I ni tanba nun ndaka jigan n jaguenu ye,
i ni a fɔ n ɲɛ,
ile le mu nakisilá la.
4 N jaguenu ni malu,
anu ni mafu,
n faga sɔgɛ be minnu la.
Minnu be nátá jiganna anu ni ko koroŋɛ ma n na,
wonu ni saagi n kɔma anu ni kɔntɔfili.
5 Anu ni to iko dele,
fɔɲɛ bata min malansan.
Alatala la maleka ni anu bee.
6 Alatala la maleka ni anu labɛnbɛn anu ni taga pon,
anu la kila ni dibi,
a mɛn ni namaya.
7 Anu bata jala lafonti dinka kunma n ɲatɔ,
anu bata dinka soe n be boela min butɔ alako n ni faga,
adun n bele ko tiɲaren anu ma.
8 Awa,
halagi banba ni anu latɛrɛnna,
anu ni bita anu la jala sareŋɛ la,
anu ni boe anu la dinka butɔ.
9 Wo tɛmuɛ n si sɛɛwa le Alatala la,
n ni ɲagalin a la kise la ko la.
10 N be kɛ-lɛ fɔla n juse tɔ,
n ko:
Alatala,
ile nun ɲɔmɔ le si kan?
I nɔta tɔɔrɔbaganu lakisila sɛnbɛ tigenu kunma.
I nɔta tɔɔrɔbaganu nun fondobɔnɛnu lakisila anu la boenmalanu ma.
11 N ma koe min lɔn,
seede koroŋɛnu bata wuli,
anu be n maɲininkala wolo la.
12 Anu be n na ko ɲinma sɔŋɛ lasagila n ma ko koroŋɛ la.
N bata to n dɔrɔn.
13 Kɔnɔ nde kan,
anu be bandiren tɛmuɛ min tɔ,
n ka kinikini kuta sa n ma,
n ka n majigi n sunta.
N tota mamataraŋɛ mala anu ye tɛmuɛ bɛ.
14 N bata a ma ɲɔgɔnna iko n kafuɲɔgɛ,
iko n nɛɛnɛdɔndɛ le mu.
N na dire bata n kun majigi iko min be suunuren a nɛɛnɛ faga koe la.
15 Kɔnɔ nde be boe koe tɔ wagate min tɔ,
anu sɛɛwata,
anu nata ɲɔgɔn yen;
minnu be diren n botegela,
anu bɛnta n kunma,
kɔnɔ n ma a lɔn.
Anu bele diren fenfen ye fɔ n ni halagi le tun.
16 Kɛ jama ɲalakilan bale filankafuenu,
anu be wuruntunna n ɲɛ fɔ anu be anu ɲiŋɛ takinna.
17 N Marige,
i be wo lasagala han tɛmu miniman?
I ni n natanga anu la tiɲare ma,
i ni n nɛ lakisi kɛ jatanu bolo.
18 Wo butɔ,
n si i tantu le mamadɛn banba tɔ,
n ni i matɔgɔ jama siyama tɛma.
19 Minnu be n jaguyaren kila bele a ma,
wonu kana sɛɛwa n kunma.
Minnu bata n kɔn kila bele a ma,
wonu kana anu ɲamakati n ma.
20 Ee,
kɔnɔ kɛnu te jususa kuma fɔ!
Anu be tola kɔnkɔnna le tun janfa kuma fɔ koe la kɛ jamanɛ mɔgɔ sabarireŋɛnu ma.
21 Anu bata anu da laka n ma sɛnbɛ la.
Anu ko:
«Iyɔɔ,
mɔ be diren koe min ni a masɔtɔ,
mɔ ɲan bata a yen mɔ ɲa la.»
22 Ee Alatala ile bata a yen,
i kana i mɔdɛ;
n Marige,
i kana yanfaya n na.
23 N na Ala,
n Marige,
i yɛtɛ lamaga i ni kunɛn,
i ni tɔɲa dii n ma,
i ni n na ko fɔ.
24 Ee Alatala,
n na Ala,
ile min telenta i ni n na kiite sa,
alako kɛ mɔgɛnu kana sɛɛwa n kunma.
25 Anu kana a fɔ anu juse tɔ:
«Ee,
mɔ be diren min ye,
wolo mu kɛ la:
mɔ bata a la ko tiɲa feu.»
26 Minnu be sɛɛwala n na tɔɔrɛ la,
wonu bɛ ni malu anu ni kɔntɔfili.
Minnu be anu yɛtɛ tajiganna n kunma,
maluya nun fɛɛyaa ni dusu anu kunma.
27 Minnu be sɛɛwala n na tɔɲa sɔtɔ koe la,
wonu ni anu kulɛ labɔɔ anu ni sɛɛwa ka ɲagalin,
anu ni to a fɔla tɛmuɛ bɛ tɔ,
ko:
«Alatala kolo,
min be sɛɛwala a la jondeŋɛ la hɛra sɔtɔ koe la.»
28 Awa,
n nɛŋɛ si i la teleŋɛ la ko fɔ le tele muru,
n ni i tantu lun go lun.