Sariya min be konbira kunma
12
Alatala mɛn kumata Musa ye,
a ko:
2 «A fɔ Isirayila kaanu ye,
ka musu do tagata bue jigan a nata den kayireŋɛ sɔtɔ,
a si ma saniyanbale la tele wɔrɔwila kɔtɔ.
A si ma saniyanbale la iko a be a la kari wale mala tɛmuɛ min tɔ.
3 Tele sagin luŋɛ deŋɛ ni sunna.
4 Wo tele wɔrɔwila tanbi kɔma,
konbira si to saniyanbaliya tɔ tele bi saba nun saba kɔtɔ a base la ko la min bɔɔta a ma a den sɔtɔ tɛmuɛ.
Han a la saniyan lɔgɛ kɔnte ni kamali,
a ma bɛn a ni don dula saniyandeŋɛ tatta butɔ,
a mɛn ma bɛn a ni maga Alatala la fondo saniyandeŋɛ la.
5 Ka a ka den musereŋɛ le sɔtɔ,
a si to saniyanbaliya tɔ lɔgɔkun fila,
a si to iko a be a la kari wale tɔ tɛmuɛ min tɔ nun.
Wo kɔma a ni saniyan lɔgɛ lamɛ han tele bi wɔɔrɔ nun wɔɔrɔ,
a base la ko la min bɔɔta a ma a den sɔtɔ tɛmuɛ.
6 A saniyan luŋɛ tini kamali den kayireŋɛ,
ka wo ma den musereŋɛ la ko tɔ,
a ni saaka san dɔndɔ doni sarika lakelá dula hɔrɔma dingira dondula tɔ,
min si naa bɔɔ sarika bintannɛŋɛ la.
Sa wo kunma,
a ni legetere doni,
ka wo ma gabue,
min si naa bɔɔ junubu kafari sarika la.
7 Sarika lakelá ni wo sarikanu bɔɔ nde Alatala ye,
a ni ma wo muse la kunsara la.
Wo tɛmuɛ a si saniyan de a la wo den sɔtɔ base la ko la.
Sariya le wo la muse ye min ka den kayireŋɛ sɔtɔ,
ka wo ma den musereŋɛ.
8 Ka fɛrɛ bele a bolo saaka sɔtɔ koe la,
a si nɔ gabu fila donila,
ka wo ma legetere fila.
Dɔndɛ ni bɔɔ sarika bintannɛŋɛ la,
doe ni bɔɔ junubu kafari sarika la.
Sarika lakelá ni wo bɔɔ,
a ni ma kunsara la muse ye,
a ni saniyan.»