Yaguba nun Esayu la bɛŋɛ
33
Yaguba ka a ɲa lawuli,
a ka Esayu yen nala anun kayi mɔgɔ kɛmɛ naani.
A ka deŋɛnu fatan Leya nun Rakeli anun jon musu fila ma.
2 A ka jon musu fila nun anu la deŋɛnu sɔ ɲatɔ.
A ka Leya nun a la deŋɛnu sɔ wonu kɔma.
Rakeli nun Yusufu sakkitɛta sɔla wonu tugun kɔma.
3 Ale yɛtɛ tanbita anu ɲatɔ.
Yannun a ni ke a kɔtɔ ma,
a tagata a majigila duge tɔ kunɲama wɔrɔwila.
4 Esayu borita a tagata Yaguba labɛn,
a milinta a ma,
a giripɛta a kaŋɛ ma a ka a masunbu.
Anu fila bɛ dita.
5 Esayu ka a ɲa lawuli,
a ka musenu nun deŋɛnu yen,
a ka ɲininkare ma,
a ko:
«Ɲɔmɔ le kɛnu la minnu be i kɔma ka?»
Yaguba ka a jaabi,
a ko: «Ala be deŋɛnu min diiren i dɔgɛ ma a la hinnɛnteya butɔ.»
6 Jon musenu nun anu la deŋɛnu ka anu madon,
anu ka anu majigi duge tɔ.
7 Leya tugun nun a la deŋɛnu ka anu madon,
anu ka anu majigi duge tɔ.
Wo kɔma Yusufu nun Rakeli tugun ka a ma ɲɔgɔnna.
8 Esayu ka a fɔ,
a ko:
«N nun kolofeŋɛnu min bɛ bɛnta ka,
i be anu lasanbaren fen na?»
Yaguba ka a jaabi,
a ko:
«N be diren de ile min mu n tige la, i ni n nadiya.»
9 Esayu ka a fɔ,
a ko:
«Ade n dɔgɛ,
harige siyama be nde tugun bolo.
I tɛŋɛ ka to i bolo.»
10 Yaguba ka a fɔ,
a ko:
«Yandi n bata i taran,
ka i bata n nadiya,
n be i sanbaren feŋɛ min bɛ la i ni anu labita.
N bata i ɲakɔtɔ yen iko n ka Ala ɲakɔtɔ yen ki min na,
bayi i bata n mabita a ɲinma la.
11 Yandi n be i sanbaren hɛra min na i ni anu bita.
N be diren min bɛ ye Ala bata a bɛ dii n ma.
N bɛnta feŋɛ min bɛ sɔtɔla,
a bɛ be n bolo.»
Yaguba ka kuma mabɛlɛya a ye han Esayu ka anu labita.
12 Esayu ka a fɔ,
a ko:
«Wo mɔ ma kila tɔ,
n ni taga wo masɔ.»
13 Yaguba ka a jaabi,
a ko:
«N tige,
i ka a lɔn deŋɛnu la ko bɛlɛ.
Saaka musenu anun ningi musenu tugun be n bolo minnu la deŋɛnu be singe minna.
Ka mɔ ka wonu lagbataa tagamaŋɛ la,
kolofeŋɛnu bɛ si faga lun dɔndɔ.
14 N tige,
ile ka sɔ ɲatɔ.
Nde ni sɔ n na kolofeŋɛnu kɔma.
N ni taga anu labɛnbɛnna anun n na deŋɛnu la dɔyi,
han n ni don n tige bata Seyiri jamanɛ tɔ.»
15 Esayu ka a fɔ,
a ko:
«N be diren de,
n ni n na mɔgɛnu yan kan donu to i bolo,
anu ni i kanta.»
Yaguba ka a jaabi,
a ko:
«I be wo mala fenna?
N tige, nde be diren de tun n na ko ni diya i ye.»
16 Wo lun yɛtɛ Esayu ka Seyiri kila bita saagi koe la.
17 Yaguba tugun tagata Sukoti,
a ka boŋɛ sɔ a fan ye,
anun kulanu,
a la kolofeŋɛnu si to minnu tɔ.
Wolo mu anu ka wo dula tɔgɔ fɔ Sukoti,
wo be a fɔren de «Kulanu».
18 Yaguba la bɔɔreŋɛ Padan Arami,
a tagata han a keta Sisɛmu saa tɔ,
Kanana duge tɔ,
a be kendeyaren.
A ka a la tanta lafonti saa tele yɛlɛ tɔ.
19 A la tanta be sɔren ka min na,
a ka duge san Hamori bɔnsɛ ma,
Sisɛmu benba.
A ka a san kaalisi kole kɛmɛ la.
20 A ka sarika bintandula ɲiɲa ɲɔ.
A ka ɲɔ tɔgɔ fɔ,
a ko:
«Isirayila Marige mu Ala le la.»