Saaka samareŋɛ la ko taale
15
Duuti makelelanu nun junubutɔɛnu bɛ be anu madonna Isa la anu ni anu tolomasɔ a la.
2 Farisinu anun sariya karamɔgɛnu be Isa la ko fɔla anu da kɔtɔ:
«Kɛ kaye be junubutɔɛnu labɛnna a ɲinma la,
a mɛn be dɔmɛ dɔmɔla anu fɛ.»
3 Wo butɔ,
Isa ka kɛ taale fɔ anu ye,
a ko:
4 «Ka saaka kɛmɛ tota mɔgɔ dɔndɔ bolo wo tɔ yan,
dɔndɔ samata anu tɛma,
wo tigi te wo saaka bi kɔnɔntɔ nun kɔnɔntɛ to wɔɔrɛ tɔ ɲɔ,
a ni taga wo saaka dɔndɛ ɲinidula han a ni a yen?
5 A tini a yen,
a ni sɛɛwa.
A ni a jigan a ni a wakkɛ a ni a nati.
6 A la dondeŋɛ a bata,
a ni a kafuɲɔgɛnu nun a sigiɲɔgɛnu kele,
a ni a fɔ anu ye,
a ko:
‹Wo mɔ bɛ ka sɛɛwa.
N bata n na saaka yen min be samaren nun!›
7 Wo butɔ,
n ni a fɔ wo ye,
junubutɔɛ mɔgɔ dɔndɔ tini tuubɛ,
sɛɛwa be tola saŋɛ tɔ tugun ɲɔgɔnna le,
a si tanbi mɔgɔ telendeŋɛ bi kɔnɔntɔ nun kɔnɔntɔ la ko la minnu haju bele tuubɛ ko ma.»
Kaalise kolo samareŋɛ la ko taale
8 Isa mɛn ko:
«Ka kaalise kolo tan tota muse do bolo,
dɔndɔ samata,
a te lanpue labita le ba,
a ni boŋɛ butɔ mafitan a ni wo kaalise kole ɲini a ɲini ɲa yati ma,
han a ni a yen?
9 A tini a yen,
a ni a kafuɲɔgɛnu nun a sigiɲɔgɛnu kele,
a ni a fɔ anu ye:
‹Wo mɔ bɛ ka sɛɛwa.
N bata n na kaalise kole yen,
min be samaren n na nun.›
10 Wo butɔ,
n mɛn ni a fɔ wo ye,
junubutɔɛ mɔgɔ dɔndɔ tini tuubɛ,
sɛɛwa be tola Ala la malekanu tugun tɛma ɲɔgɔnna le.»
Den kayiren samareŋɛ la ko taale
11 Isa mɛn ka taale do tugun fɔ,
a ko:
«Den kayiren fila be kaye do bolo.
12 Lun do,
den dɔgɔmaŋɛ ko a baaba ma:
‹Baaba,
a bɛnta n ni min sɔtɔ i bolofeŋɛ tɔ,
n mafanna dii n ma.›
Wo butɔ,
a baaba ka a bolofeŋɛ fatan anu fila ma.
13 A ma mɛ,
den kayiren dɔgɔmaŋɛ ka a bolofeŋɛ min sɔtɔ,
a ka a mafalin nafule la,
a tagata jamanɛ yanfama tɔ,
a ka a bolofeŋɛ bɛ ban kunnatiɲala dunuyanteya la.
14 A to ka a bɛ ban dɔmɔla,
kɔnkɔ banba donta wo jamanɛ la,
wo kɔma a fɔlɔta fola balue la.
15 Wo butɔ,
a tagata a fan yita ɲɔ dugudeŋɛ do la wali koe la.
Wo ka a jigan a ka a lasanba a la wɔɔrɛ tɔ kɔ́sɛ́nu kantadula.
16 A la toreŋɛ ɲɔ,
a sɔgɔ tota a bitala a ni balu hali sɔsɔ foroŋɛnu la,
kɔ́sɛ́nu be min dɔmɔla,
kɔnɔ mɔgɔ yo ma a kɔ anu la.
17 Wo butɔ,
a ka a hakkile latagaman a fan na ko ma,
a ko a fan ma:
N baaba la walilanu bɛ be dɔmɛ dɔmɔla han anu ni a tɔɛ to,
nde nɔn be fagala yan kɔnkɛ la.
18 N si wuli le,
n ni tasaagi n baaba ma,
n mɛn si naa a fɔ a ye:
‹Baaba,
n bata junube sɔtɔ Ala la anun ile.
19 A ma dagɛ bitugun i ni n kele iko i la deŋɛ,
kɔtɛ i ni n ma iko i la walila do.›
20 Wo butɔ,
a wulita,
a tagata a baaba bata.
A to be yanfayaren,
a baaba ka a yen nala,
kinikinɛ ka a baaba bita,
a borita a tagata a labɛn,
a milinta a kaŋɛ la,
a ka a sunbu.
21 Deŋɛ ka a fɔ a ye,
a ko:
‹Baaba,
n bata junube sɔtɔ Ala la anun ile.
A ma dagɛ bitugun i ni n kele iko i la deŋɛ.›
22 Kɔnɔ a baaba ka a fɔ a la joŋɛnu ye,
a ko:
‹Wo teriya doroki banba ɲinma labɔɔla,
wo ni a lajigi n na deŋɛ ma.
Wo ni bolo solinta kurunda don a bolo soliŋɛ tɔ,
wo ni samata don a kɛŋɛ tɔ.
23 Wo ni tuura deŋɛ nati min be kɛnden,
wo ni a faga.
Wo mɔ ni dɔmɔre ma,
wo mɔ ni sɛɛwa,
24 bayi n na kɛ deŋɛ be faga le butɔ nun,
kɔnɔ a bata kisi.
A be samaren nun,
kɔnɔ a bata yen ma.›
Wo butɔ,
anu fɔlɔta sɛɛwala a ɲinma la.
25 Wo ka a taran,
kaye la den fɔlɛ be sɛnɛ tɔ.
A la saagireŋɛ,
a sutuya tɛmuɛ boŋɛ la,
a ka sigi sa kulɛ mɔɛ anun dɔŋɛ kulɛ.
26 A ka joŋɛ do kele a ka a maɲininka,
fen min be maren.
27 Wo ka a fɔ a ye,
a ko:
‹I dɔgɛ bata na.
I baaba ka tuura den kɛndeŋɛ faga a ye,
bayi a bata a la deŋɛ yen,
a be kendeyaren.›
28 Wo butɔ,
den fɔlɛ dumɛnta,
a bele sɔnden donna boŋɛ tɔ.
Wolo ka a ma,
a baaba bɔɔta boŋɛ tɔ,
a tota a madiyala a ni don.
29 Kɔnɔ a ka a baaba jaabi,
a ko:
‹I ka a lɔn,
a bata san siyama bɔɔ n be tɔɔrɔla i ye,
n bele balanna i la yamɔre hali dɔndɔ la feu.
Kɔnɔ hali baa deŋɛ yati i ma a dii n ma,
alako n ni murade sɔ n nun n kafuɲɔgɛnu ye.
30 Kɔnɔ i la kɛ deŋɛ to nata,
min ka i bolofeŋɛ bɛ kunnatiɲa feu anun musu jeenantenu,
i ka tuura den kɛndeŋɛ faga wo kan ye.›
31 A baaba ka a jaabi,
a ko:
‹N na deŋɛ,
ile nun nde le mu tɛmu bɛ,
n bolofeŋɛ bɛ ile le tan mu.
32 Kɔnɔ a bɛnta wo mɔ ni dɔmɔre ma,
mɔ ni ɲagalin a ɲinma la,
bayi i kɛ dɔgɔ kayima be faga le butɔ nun,
kɔnɔ a bata kisi.
A be samaren nun,
kɔnɔ a bata yen.›»