Bandibaga la Ala matɔgɛ a la kendeya tanbi kɔma
30
Dauda la beete do le ka,
min bɔɔta hɔrɔma boŋɛ laka tɛmuɛ.
2 Ee Alatala n ni i matɔgɔ,
bayi i bata n nawuli.
I ma sɔn n jaguenu ni sɛɛwa n kunma.
3 Ee Alatala,
n na Ala,
n ka n kulɛ labɔɔ i ma;
i nata n nakendeya.
4 Ee Alatala,
i bata n bɔɔ saya da tɔ.
Donden n ni faga,
i ka n nɛɛ talasagi a la.
5 Wole Alatala la lannante mɔgɛnu,
wo ni tantu beete bɔɔ a ye,
wo ni a tɔgɔ saniyandeŋɛ matɔgɔ.
6 Bayi a la dumɛŋɛ te mɛ,
kɔnɔ a la hinnɛnteya be simaya bɛ butɔ;
dire si ma sue tɔ,
kɔnɔ ɲagaliŋɛ tugun si na saguma.
7 Nde kan,
lun do n to be jususa butɔ nun,
n ko
n te naa lamaga nun feu.
8 Alatala,
i la dɛmare la,
i be n sɛnbɛ toren iko kɔnkɛ.
Kɔnɔ i nata i ɲakɔtɔ dogon n na;
n mafuta kisanna.
9 Wo butɔ,
n ka n kulɛ labɔɔ ile Alatala le ma;
n ni i madiya,
n ni a fɔ:
10 «Ka n najigita gabure tɔ,
i si tɔnɔ miniman sɔtɔ n base bɔɔ kɔma?
Ká,
mɔgɛ min be duge kɔtɔ si nɔ i tantula ba?
A ni i la kuma dɔndɔ tigiya la ko fɔ ba?
11 Ee Alatala,
i ni i tolomasɔ n na,
i ni kinikini n ma.
I ni na n dɛman.»
12 I bata n na nimisa yɛlɛman ɲagaliŋɛ la.
I bata n na suunu kuta yɛlɛman ɲagalin kuta la.
13 N Marigi Alatala,
wolo mu n te n mɔdɛ.
N si tantu beete bɔɔ le i ye n juse bɛ la kudai.