Manasi nun Efirayimu
48
Wo koenu tanbi kɔma,
anu ka a fɔ Yusufu ye,
anu ko:
«A fɛlɛ i baaba bele kendeyaren.»
Bɔɔla a ka a mɔɛ,
ale nun a la den kayiren fila tagata,
Manasi nun Efirayimu.
2 Anu ka a fɔ Yaguba ye:
«I la den Yusufu be naren i bata.»
A katata,
a wulita,
a sigita benbe tɔ.
3 Yaguba ka a fɔ Yusufu ye,
a ko:
«Ala sɛnbɛ tige bɔɔta le n ma Lusi,
Kanana duge tɔ.
A ka barikɛ sa n na ko tɔ.
4 A ka a fɔ n ɲɛ,
a ko:
‹Nde le mu ka,
n si i lajiidi,
n ni i lasiya,
n ni i ma jama banba tige la.
N si kɛ duge dii le i bɔnsɛ ma hali i tanbi kɔma,
a ni ma anu tɛŋɛ la kudai.›
5 Kɔtɛ i ka den kayiren filanu minnu sɔtɔ Misira yannun n ni na i dula Misira,
Efirayimu nun Manasi,
n bata anu ma n na deŋɛnu la,
iko Rubɛn nun Simeyɔn to mu n na deŋɛnu la.
6 Kɔnɔ ka i ka deŋɛnu minnu sɔtɔ kɛnu kɔma,
wonu si ma ile tɛŋɛ la.
Anu be naala tola anu kɔtɔnu le kɔma anu la kɛɛ la ko la.
7 N na bɔɔreŋɛ Padan,
yannun n ni ke Efarata,
Kanana duge tɔ,
i nɛɛnɛ Rakeli fagata n bolo kila la.
N ka a mandi Efarata kila la ɲɔ,
ka min tɔgɔ Betilɛmu.»
8 Yaguba ka Yusufu la deŋɛnu fɛlɛ,
a ka a fɔ a ko:
«Ɲɔmɔ le kɛnu la?»
9 Yusufu ka a baaba jaabi:
«N na den kayireŋɛnu le,
Ala ka minnu dii n ma yan.»
Yaguba ka a fɔ,
a ko:
«N bata i táran yandi,
anu madon n na alako n ni duba anu ye.»
10 Yaguba bata kɔtɔya,
a ɲanu bele feŋɛnu lasagala.
A te nɔ fondo yenna bitugun.
Yusufu ka a la deŋɛnu madon a la,
Yaguba ka anu masunbu a ka anu hibbɛ a ma.
11 Yaguba ka a fɔ Yusufu ye,
a ko:
«N bele a miraren nun ka a fɔla n mɛn si i tayen.
Kɔnɔ a fɛlɛ,
Ala bata a laɲini n ni i la deŋɛnu yati yen.»
12 Yusufu ka a la deŋɛnu jigan a baaba kɛn kunma.
A ka a majigi a butinta duge ma.
13 Wo kɔma,
Yusufu ka a la den fila bita a bole ma,
a ka Efirayimu bita a bolo ɲinma bole la,
Yaguba bolo mara sɔngɛ la.
A ka Manasi bita a bolo mara bole la,
Yaguba bolo ɲinma sɔngɛ la.
A ka anu madon a la.
14 Kɔnɔ Yaguba ka a bolo ɲinma bole latanbi a bolo mara sɔngɛ la,
a ka a sa Efirayimu kuŋɛ ma,
min mu dendeŋɛ la.
A ka a bolo mara bole latanbi a bolo ɲinma sɔngɛ la,
a ka a sa Manasi kuŋɛ ma,
hali a to mu den fɔlɛ la.
A dun ka a lɔn a be koe min mala a bolenu la.
15 A dubata Yusufu ye,
a ka a fɔ a ye,
a ko:
«N mankayi Iburahima nun n baaba Isiyaka be Ala min na kila kɔma,
ile Ala min mu n dankunna la kabɔɔ n sɔtɔ luŋɛ han bi,
16 Ile min mu maleka la,
i ka n bɔɔ ko bɛlɛŋɛ tɔ,
ile Ala ni hɔrɔma to kɛ deŋɛnu la ko tɔ.
Anu ni anu kele nde tɔgɛ la,
anun n mankayi Iburahima nun n baaba Isiyaka tɔgɛ la.
Anu ni jiidi jamanɛ butɔ koola.»
17 Kɔnɔ Yusufu to ka a yen a baaba bata a bolo ɲinma bole sa Efirayimu kuŋɛ ma,
wo koe ma diya a ye feu.
A ka a baaba bole bita alako a ni a bɔɔ Efirayimu kuŋɛ ma,
a ni a sa Manasi kuŋɛ ma.
18 Yusufu ka a fɔ a baaba ye:
«N baaba,
i bata tantan,
bayi Manasi le mu kina la.
I be i bolo ɲinma bole sala ale le kuŋɛ ma.»
19 A baaba ma sɔn,
a ka a fɔ:
«N ka a lɔn,
n na deŋɛ,
n ka a lɔn.
Ale tugun be naala mala bɔnsɔ siyama tige le la.
Ale tugun si siya le,
kɔnɔ a dɔgɛ le si naa fisaya siyala ale ko.
A dɔgɛ bɔnsɛ si naa ma le sii siyama tige la.»
20 A dubata anu ye wo lun,
a ka a fɔ:
«Bani Isirayila kaanu be naala duba mala wo tɔgɛnu le la.
Anu si naa a fɔ ‹Ala mu barikɛ sala i la ko tɔ iko Efirayimu nun Manasi.›»
A ka Efirayimu sɔ ɲatɔ Manasi ko,
ɲɔgɔnna le.
21 Yaguba ka a fɔ Yusufu ye:
«A fɛlɛ,
n be faga da le tɔ.
Kɔnɔ Ala si to le wo fɛ,
a mɛn ni wo talasaagi wo benbanu la duge tɔ.
22 N bata Sisɛmu saa dii i ma,
ka min fisa i kɔtɔnu tɛŋɛ ko,
n ka ka min nabita Amɔri kaanu bolo n na faŋɛ nun n na kala la.»