Isiyaka la duba Yaguba ye
27
Isiyaka bata ban kɔtɔyala,
a bata ma ɲabɔnɛ la,
a te nɔ fenfen yenna bitugun.
Lun do,
a ka a la den kayiren fɔlɛ Esayu kele,
a ko:
«N na deŋɛ!»
A ka a jaabi: «Naamu!»
2 Isiyaka ko:
«I ka a yen n bata kɔtɔya,
n faga wagate bata sutuya.
3 Kɔtɛ,
i ni i la donso miraŋɛnu jigan,
i la ndakanu anun kala,
i ni taga sube ɲini n ɲɛ wula butɔ,
i ni a nati.
4 I ni n diyana sube taba n ɲɛ,
iko a be diyaren n ɲɛ ki min na,
i ni a nati n ɲɛ.
Wo butɔ,
yannun n ni faga,
n si duba i ye.»
5 Isiyaka ka min fɔ a la den kayiren Esayu ye,
Rebeka be a tolomasɔren a bɛ la.
Esayu bɔɔta tɛmuɛ min tɔ a tagata subu ɲinidula wula butɔ,
6 Rebeka ka a fɔ a la den kayireŋɛ Yaguba ye,
a ko:
«N bata a mɔɛ i baaba be a fɔla i kɔtɔ Esayu ye,
a ko:
7 aa a ni a diyana sube nati a ye,
a ni a ɲiɲa a ye a ni a dɔmɔ.
Aa a si duba a ye Alatala ɲala yannun a ni faga.»
8 Rebeka ko:
«Kɔtɛ,
n na den kayireŋɛ,
n be min fɔla i ye i tolomasɔ a la koola,
i ni n na kuma bita.
9 Taga baa deŋɛ ɲinma fila bita n ɲɛ kula tɔ,
i ni anu nati.
N ni i baaba diyana sube taba iko a be diyaren a ye ki min na.
10 I ni a doni i baaba ye,
a ni a dɔmɔ alako a ni duba i ye yannun a be fagala.»
11 Yaguba ka a nɛɛnɛ Rebeka jaabi,
a ko:
«Iyon,
kɔnɔ n kɔtɔ kayima Esayu mu ti tige le la,
nde dun ti tigi ma n na.
12 Ka n baaba ka n mamɔɔmɔ,
a si a lɔn de Esayu ma nde la,
n be mala a ye janfante le la,
n te a la duba sɔtɔ n be a la danka le sɔtɔla.»
13 A nɛɛnɛ ko:
«Wo danka be sagila nde le ma,
n na den.
I tolomasɔ n na kuma la tun,
i ni taga wo baa den fila nati n ɲɛ.»
14 Yaguba tagata baa den fila bita a ka anu nati a nɛɛnɛ ye.
A nɛɛnɛ ka a baaba diyana sube taba a ye,
iko a be diyaren a ye ki min na.
15 Esayu la kuta ɲinma min be a nɛɛnɛ bolo nun boŋɛ tɔ,
Rebeka ka wo jigan,
a ka a lajigi a la den kayiren dɔgɔmaŋɛ Yaguba ma.
16 A ka baa deŋɛnu bole jigan a ka Yaguba bole nun a kaŋɛ makiti a la,
ti bele ka min na.
17 A ka wo dɔmɔ diyama anun dɛgɛ min bɛ ɲiɲa,
a ka wo don a la den Yaguba bolo.
18 Yaguba tagata a baaba taran,
a ko a ma:
«N baaba!»
Isiyaka ko:
«Naamu,
ile ɲɔmɔ le, n na den kayireŋɛ?»
19 Yaguba ka a baaba jaabi,
a ko:
«I la den kayiren fɔlɛ Esayu le mu n na.
I ka min fɔ n ɲɛ n bata wo ma.
N bata i táran,
wuli,
i ni sigi.
I ni n na sube dɔmɔ alako i ni duba n ɲɛ.»
20 Isiyaka ka a fɔ a la den kayireŋɛ ye:
«N na den,
i ka kɛ sube sɔtɔ kama le teriya la?»
Yaguba ka a jaabi,
a ko: «I Marigi Ala le ka a dii n ma kila kunma.»
21 Isiyaka ka a fɔ Yaguba ye:
«N na den,
i madon n na,
n ni i mamɔɔmɔ alako n ni laa a la,
n na den Esayu yati le mu i la.»
22 Yaguba ka a madon a baaba la.
A baaba ka a mamɔɔmɔ,
a ka a fɔ:
«A kulɛ mulunta Yaguba kulɛ la,
kɔnɔ a bolenu kan be toren iko Esayu bolenu.»
23 Isiyaka mafilita Yaguba ma,
bayi te be a bolenu ma iko a la den kayiren Esayu bolenu be ki min na.
A to dita dubala a ye,
24 a mɛn ka a maɲininka,
a ko:
«Kɔnɔ,
tɔɲa le ile le mu n na den kayiren Esayu la?»
Yaguba ko: «Nde len.»
25 Isiyaka ko:
«N na deŋɛ,
sube don n bolo,
n ni a dɔmɔ alako n ni duba i ye.»
Yaguba ka dɔmɛ sigi a kɛn kɔtɔ,
a ka dɔmɔre ma.
Yaguba ka beere tugun dii a ma,
a ka a min.
26 Isiyaka to ka dɔmɔre ban,
a ka a fɔ a ye:
«N na den,
i madon n na i ni n sunbu.»
27 Yaguba ka a madon a la,
a ka a sunbu.
Isiyaka ka a la kutanu kuɲɛ mɔɛ,
a dubata a ye,
a ko:
«Tɔɲa le,
n na den kayireŋɛ kuɲɛ be toren iko sɛnɛ kuɲɛ diyama,
Alatala bata barikɛ sa sɛnɛ min tɔ.
28 Ala mu kunda diila i ma min be bɔɔla kantɔ.
Ala mu duge nafa diila i ma.
Ala mu tɔnɔ banba tola i la sɛnɛ tɔ.
Ala mu beere siyama diila i ma,
min bele mɛren.
29 Ala mu bɔnsɛnu bɛ tola i la nɔɛ kɔtɔ.
Ala mu a mala see bɛ ni a majigi i ye,
i ni ma i baaba dɔndɛnu kuŋɛ la,
anu ni anu majigi i ye.
Mɔgɔ yo ka i danka,
dankare ni saagi a ma,
mɔgɔ yo dubata i ye wo tigi tugun ni duba sɔtɔ.»
30 Isiyaka to banta dubala Yaguba ye,
Yaguba bɔɔta a baaba Isiyaka kunma.
A ma mɛ a kɔtɔ Esayu nata bɔɔla wula butɔ sube bundula.
31 Ale tugun ka wo sube taba a tagata a sigi a baaba kɛn kɔtɔ.
A ka a fɔ a baaba ye:
«N baaba,
wuli i ni i la den kayireŋɛ la sube dɔmɔ min di i ye,
alako i ni duba n ɲɛ.»
32 A baaba ko:
«Ile ɲɔmɔ le?»
A ka a jaabi,
a ko:
«Nde le mu Esayu, i la den kayiren fɔlɛ.»
33 Wo ka Isiyaka mafu,
a bale sɛrɛnta a ma sɛnbɛ la.
A ka ɲininkare ma,
a ko:
«Ɲɔmɔ le tagata sube faga a nata a sigi n kɛn kɔtɔ?
Yannun i ni na,
n ka wo dɔmɛ dɔmɔ n dubata a tigi ye. Ale le be wo duba sɔtɔla.»
34 Esayu to ka a baaba la wo kumanu mɔɛ,
a juse bɔɔta,
a ka a tɔɔrɔ.
A belebeleta sɛnbɛ la,
a ka a fɔ a ye:
«N baaba,
duba nde tugun ye,
yandi!»
35 Isiyaka ko:
«N te nɔ,
bayi i dɔgɛ bata na janfa la,
a ka i la duba doni.»
36 Esayu ko:
«A tɔgɛ le yati be a kunma:
Yaguba,
mɔgɔ janfala.
A bata janfa ma n na kunɲama fila.
A ka n na kayibaya sɔdula bita n bolo a ka wo ma a tɛŋɛ la.
A mɛn bata n na duba tugun kanka kɔtɛ.»
Esayu ka a fɔ a baaba ye,
a ko:
«I ma duba fondo to nde ye i ni duba n ɲɛ?»
37 Isiyaka ka a jaabi,
a ko:
«I tolomasɔ,
n bata ale ma kuŋɛ la ile kunma.
N mɛn bata a nɛɛnɛdɔndɛnu bɛ ma a la joŋɛ la.
N bata tɔnɛ nun beere je siyama duba ma a ye.
N na den kayireŋɛ,
n be fen de duba mala i ye bitugun?»
38 Esayu ka a fɔ a baaba ye,
a ko:
«Baaba kɛ duba dɔndɛ dɔrɔn de be i bolo ba?
I ni duba nde tugun ye.» Esayu dita a kulɛ mayɛlɛreŋɛ la.
39 Isiyaka ka Esayu jaabi,
a ko:
«A fɛlɛ,
duge tɔnɛ be kan do kan,
i si yanfaya ɲɔ la
anun kunda min be bɔɔla kan tɔ.
40 I si i balue sɔtɔ i la faŋɛ la kɛlɛ tɔ.
I si to i dɔgɔ kayima la nɔɛ kɔtɔ.
Kɔnɔ ka a bɛlɛyata,
i si i kuŋɛ kata a la nɔɛ kɔtɔ.»
Yaguba la taga a kau Laban bata
41 Esayu ka Yaguba bɛsɛnkɔnnɛya a baaba la duba la ko la,
a baaba ka min ma a ye.
Esayu ka a mira a juse tɔ,
a ko:
«N baaba la faga bata sutuya.
A tini faga n si n dɔgɛ Yaguba faga le.»
42 Esayu la mira tagata min ma,
wo fɔta Rebeka ye.
Wo butɔ,
a ka a la den kayireŋɛ Yaguba kele,
a ka a fɔ a ye:
«I ɲa sɔ.
I kɔtɔ kayima ko a ni i faga,
a ni a la mɔnɛ bɔɔ i tɔ.
43 N na den,
i tolomasɔ n kulɛ la.
Bori teriya la,
i ni taga Haran saa tɔ,
n barenkaye Laban bata.
44 I ni wagati do ma a bata ɲɔ han i kɔtɔ juse ni majigi.
45 I kɔtɔ juse tini majigi tɛmuɛ min tɔ,
ka a ɲinata i ka min ma a la,
n si kiila kii i ma,
i ni na.
N bele diren fola wo fila bɛ la lun dɔndɔ.»
46 Rebeka ka a fɔ Isiyaka ye,
a ko:
«Esayu ka Hɛti den musereŋɛ minnu futu,
wonu bata n juse makasa han anu ka dunuya sɔgɔ bɔɔ n na.
Ka Yaguba tugun ka Hɛti den musereŋɛ jigan wo si a dan natanbi;
faga fisa wo ko.»