Isiyaka nun Rebeka
24
Iburahima bata kikalakɔtɔya koola.
Alatala ka barikɛ sa a la ko tɔ a mɔɔle bɛ la.
2 Lun do,
a ka a la jon kuntige kele min be a hakkile toren a bolofeŋɛ bɛ ma,
a ka a fɔ a ye,
a ko:
«I bole lasori n wote kɔtɔ.
3 I ni i kali n ɲɛ Alatala la,
Ala min mu saŋɛ nun duge tige la.
N be sigiren Kanana kaanu tɛma yan bi.
Kɔnɔ i kana anu la den museren yo futu n na den kayireŋɛ ye,
a ni ma a la muse la.
4 I ni taga n baaba bata saa tɔ,
i ni den musereŋɛ futu n na den kayireŋɛ Isiyaka ye n bareŋɛnu tɛma.»
5 Wo joŋɛ ko:
«Ka wo den musereŋɛ ma sɔn go n ni a nati kɛ duge tɔ yan? N ni i la den kayireŋɛ doni i baaba bata saa tɔ ba?»
6 Iburahima ko:
«Ade de,
i kana n na den kayireŋɛ doni ɲɔ feu.
7 Alatala min mu saŋɛ tige la,
wo ka n nabɔɔ n baaba bata fɔgɛ tɔ,
a ka n nabɔɔ n na jamanɛ tɔ.
A kumata n ɲɛ,
a ka lahire dii n ma a ka a kali,
a ko:
‹N si kɛ duge dii i bɔnsɛ ma.›
Awa,
ale Ala le si naa a la maleka lasanba i ma,
a ni sɔ i ɲatɔ,
wo butɔ,
i si muse sɔtɔ n na den kayireŋɛ ye ɲɔ le.
8 Ka muse ma sɔn i jokkila,
i si latanga wo kalire ma.
Kɔnɔ fenfen kana a ma i ni n na den kayireŋɛ doni ɲɔ la.»
9 Awa,
jon kaye ka a bole lasori a tige Iburahima wote kɔtɔ,
a ka a kali a ko aa a si wo koe bɛ ma.
10 Wo butɔ,
jon kaye ka ɲɔgɔmɛ tan jigan Iburahima la ɲɔgɔmɛnu tɛma,
anun a la fondo ɲinmanu mɔɔle donu,
a tagata.
A ka Arami jamanɛ kila bita ka min be kɔɔ fila tɛma,
a tagata Iburahima dɔgɛ Nakɔri la saa tɔ.
11 A keta ɲɔ wura tɛmuɛ la.
A ka kɔlɔŋɛ taran min be soeren saa kɔma.
A ka ɲɔgɔmɛnu lakimisirin ɲɔ.
Wo ka a taran,
wura yo wura musenu si na ji soridula wo kɔlɔŋɛ tɔ.
12 A ka Ala mataran,
a ko:
«Alatala,
n tige Iburahima la Ala,
n bata i táran,
n be kila min kunma bi,
i ni wo ladiya i ni hinnɛ n tige Iburahima la.
13 N bata sɔ kɔlɔŋɛ kɛnna yan,
saa butɔ den musereŋɛnu si na ji soridula.
14 N si naa a fɔ den museren dɔndɔ ye a ni a la dunbe lajigi a ni n kɔ je la,
n ni a min.
Ka a tagata taran,
wo ka n jaabi a ka a fɔ,
a ko:
‹A min,
n ni i la ɲɔgɔmɛnu tugun kɔ›,
wo den musereŋɛ le si naa ma i la jon kaye Isiyaka la muse la.
I ka mamasubɛ min ma,
n si a lɔn de wo tɔ ka a fɔla i bata hinnɛ n tige Iburahima la.»
15 Yannun a ni Ala mataraŋɛ ban,
Rebeka nata ji soridula,
a la dunbe be a gabakunkuŋɛ tɔ.
Rebeka mu Betuyɛli la den musereŋɛ le la.
Betuyɛli nɛɛnɛ le Milika la.
A baaba mu Nakɔri la.
Nakɔri nun Iburahima mu baaba dɔndɔma le la.
16 Wo den musereŋɛ bɛnta koola.
A ma kayi koe fɔlɛ ma betunna.
A jigita ji soridula kɔlɔŋɛ dala,
a ka dunbe lafa,
a mɛn yɛlɛta.
17 Iburahima la jon kaye borita,
a tagata a labɛn,
a ka a fɔ a ye,
a ko:
«Yandi,
n kɔ je donden na i la dunbe tɔ,
n ni a surupɛ.»
18 Den musereŋɛ ka a la dunbe lajigi kisanna,
a ka a hibbɛ a ma,
a ko:
«N baaba,
na a min.»
A ka kaye kɔ je la,
a ka a min.
19 A to ka ji miŋɛ ban,
den musereŋɛ ko:
«Sɔ n ni taga je sori i la ɲɔgɔmɛnu tugun ye,
n ni anu kɔ.
Anu bɛ ni a min han a ni kun anu ye.»
20 A ka a la dunbe yɛlɛman kolofeŋɛnu la ji minfeŋɛ tɔ teriya la,
a mɛn tagata borila kɔlɔŋɛ dala,
a ka je sori,
a naata a dii ɲɔgɔmɛnu bɛ ma.
21 Wo kaye ma fenfen fɔ,
a sɔta a be wo den musereŋɛ lasagala a wali ɲa ma.
A tota a tefila a ni a lɔn ka Alatala bata a la kila ladiya.
22 Ɲɔgɔmɛnu to ka ji miŋɛ ban,
kaye ka kurunda sanunɛŋɛ giramu wɔɔrɔ don a bolo.
A ka bolo kantɔ kurunda sanunɛŋɛ fila labɔɔ.
Wo fila dɔndɔ fisa giramu kɛmɛ ko.
23 A ka den musereŋɛ maɲininka,
a ko:
«Ɲɔmɔ le la den museren mu ile la?
Yandi a fɔ n ɲɛ ka yigiya dula do be i baaba la boŋɛ tɔ, alako n nun n kafuɲɔgɛnu ni ki ɲɔ bi sue?»
24 Rebeka ka a jaabi,
a ko:
«Nakɔri nun Milika la den Betuyɛli la den musereŋɛ le mu n na.»
25 A mɛn ka a fɔ,
a ko:
«Biŋɛ nun ɲagama siyama be mɔ bolo,
i la ɲɔgɔmɛnu si min dɔmɔ,
to dula tugun be wo si ki ka min na.»
26 Wo butɔ,
kaye kimisirinta,
a ka Alatala tantu,
27 a ko:
«Alatala,
tantue be i ye.
N tige Iburahima la Ala,
i ma kori hinnɛla n tige Iburahima la.
I ma lahire fulen n tige Iburahima ye lannanteya butɔ,
bayi n na tagamaŋɛ butɔ,
ile Alatala ka n kun sɔ kan do le la,
ka min mu n tige Iburahima dɔgɛ bata la.»
28 Wo kɔma,
den musereŋɛ borita a tagata wo bɛ fɔ a nɛɛnɛ ye.
29-30 Rebeka kɔtɔ kayima do be ɲɔ nun,
min tɔgɔ Laban.
A ka kurunda anun bolokantɔ kurunda yen a dɔgɔ musuma bole tɔ.
Rebeka ka dantɛgɛ min sa kaye kumata a ye ki min na,
Laban tolo be wo bɛ la.
A to ka wo mɔɛ,
a borita tagala kaye labɛndula kɔlɔn dala.
A to keta ɲɔ,
a ka kaye taran sɔren a la ɲɔgɔmɛnu fɛ.
31 Laban ka a fɔ a ye,
a ko:
«N baaba,
ile min mu Alatala la dubadeŋɛ la,
na yan.
I be sɔren saa kɔma fenna?
N bata yigiya tabɛn i ye, n bata a tabɛn i la ɲɔgɔmɛnu tugun ye.»
32 Wo butɔ,
kaye donta Laban bata.
Laban ka ɲɔgɔmɛnu la kote bɛ lajigi,
a ka biŋɛ nun ɲagama dii anu ma.
A ka je dii kaye ma,
anun a kafuɲɔgɛnu,
anu ka anu kɛŋɛnu lako.
33 A ka dɔmɛ sigi anu kɛn kɔtɔ,
kɔnɔ kaye ko:
«N te dɔmɔre ma betunna fɔ n ni dantɛgɛ fɔlɔ sa.»
Laban ko:
«Awa,
i dantɛgɛ betunna.»
34 Kaye ko:
«N mu Iburahima la joŋɛ do le la.
35 Alatala bata barikɛ sa n tige la ko tɔ koola han a ka a ma banná la.
A bata saakanu anun baanu anun ningenu dii a ma,
anun kaalise nun sanuɛ,
anun jon kayenu,
anun a musenu,
anun ɲɔgɔmɛnu,
anun sofalenu.
36 N tige Iburahima la musu Sara,
wo ka den kayireŋɛ sɔtɔ a ye a la mamakɔtɔya butɔ.
N tige bata a sɔtɔfeŋɛ bɛ dii wo den kayireŋɛ le ma.
37 Awa lun do,
a ka a fɔ n ɲɛ,
a ko:
‹Mɔ be sabatiren Kanana kaanu tɛma yan bi.
Kɔnɔ i ni i kali n ɲɛ,
i kana anu la den museren yo futu n na den kayireŋɛ ye,
a ni ma a la muse la.
38 Taga n baaba bata saa tɔ,
i ni den musereŋɛ futu n na den kayireŋɛ ye n bareŋɛnu tɛma.›
39 N ka a maɲininka:
‹Ka muse ma sɔn nala go?›
40 A ka n jaabi,
a ko:
‹N be Alatala min na kila kɔma,
wolo si naa a la maleka sɔ i ɲatɔ a si i la kila ladiya.
Wo butɔ,
i ni muse futu n na den kayireŋɛ ye n baaba dɔndɛnu tɛma,
n baaba bata saa tɔ.›
41 A ko:
‹Ka i tagata n baaba dɔndɛnu tɛma,
anu ma naa den musereŋɛ don i bolo,
i si latanga n na kalire ma.›
42 Wolo mu,
n to keta kɔlɔŋɛ dala bi,
n ka Ala mataran,
n ko:
‹Alatala,
n tige Iburahima la Ala,
yandi i ni n na kila ladiya.
43 N be sɔren kɔlɔŋɛ dala yan.
Ka den musereŋɛ min nata ji soridula yan,
ka n ka a fɔ a ye,
n ko:
‹Je min be i la dunbe tɔ,
n kɔ wo donden na n ni a min›,
44 ka a ka n jaabi,
a ka a fɔ:
‹Do min n ni taga do tugun nati n ni a dii i la ɲɔgɔmɛnu ma›,
n si a lɔn de wo tɛmuɛ Alatala be wo den musereŋɛ le nataren n tige Iburahima la den kayireŋɛ ye.›
45 Yannun n ni wo kuma ban fɔla n juse tɔ,
n ka Rebeka yen nala,
a la dunbe be a gabakunkuŋɛ tɔ.
A jigita kɔlɔŋɛ dala a ka je sori.
N ka a fɔ a ye:
‹Yandi,
n na,
n kɔ je la,
n ni a min.›
46 A ka a la dunbe bɔɔ a gabakunkuŋɛ kunma teriya la,
a ka a fɔ,
a ko:
‹A min,
n ni i la ɲɔgɔmɛnu tugun kɔ.›
N ka a min,
a ka ɲɔgɔmɛnu tugun kɔ je la.
47 N ka a maɲininka:
‹Ɲɔmɔ le la den mu ile la?›
A ko:
‹Nakɔri nun Milika la den kayiren Betuyɛli la den musereŋɛ le mu nde la.›
N ka kurunda don a suŋɛ tɔ, n mɛn ka bolo kantɔ kurundanu don a bolo kaŋɛnu tɔ.
48 N kimisirinta Alatala ye,
n ka n majigi.
N ka Alatala tantu,
n tige Iburahima la Ala,
bayi a bata n sɔ kila telendeŋɛ tɔ,
alako n ni n tige dɔgɛ la den musereŋɛ futu a la den kayireŋɛ ye.
49 Awa kɔtɛ,
ka wo sɔnta baaba dɔndɔya lakotila,
ko ɲinma nun ko telendeŋɛ ma koe la n tige ye,
wo ni a fɔ n ɲɛ.
Ka wo ma sɔn,
wo ni a fɔ n ɲɛ,
n ni taga kan do fɛlɛ.»
50 Laban nun Betuyɛli ka jaabire sa,
anu ko:
«Kɛ koe be fatanden Alatala le la,
mɔ te nɔ wo mamasɔ́sɛ́ mala.
51 Rebeka le ka:
a jigan,
i ni taga a dii,
a ni ma i tige la den kayireŋɛ la muse la,
iko Alatala ka a sa ki min na.»
52 Iburahima la jon kaye to ka wo kumanu mɔɛ a ka a majigi duge tɔ a ka Alatala tantu.
53 A ka kɔniŋɛ kaalisinɛŋɛ nun a sanunɛŋɛ labɔɔ a ka wonu dii Rebeka ma,
anun kutanu.
A ka fondo daulareŋɛnu dii a kɔtɔ kayima nun a nɛɛnɛ tugun ma.
54 Wo la bɔɔreŋɛ a la,
anun a kafuɲɔgɛnu ka dɔmɔre ma,
anu ka je min,
anu kita.
Anu to kunɛnta saguma,
jon kaye ka a fɔ Rebeka sɔtɔlanu ye,
a ko:
«Wo hakkɛ to n ɲɛ,
n ni tasaagi n tige Iburahima bata.»
55 Rebeka kɔtɔ kayima nun a nɛɛnɛ ko:
«Diɲa,
den musereŋɛ ni wagati do ma mɔ fɛ yan betunna,
han tele tan ɲɔgɔn.
Wo tini tanbi,
i si taga.»
56 Kaye ko:
«Alatala bata n na kila ladiya,
wo kana n makankan.
Wo diɲa,
n ni tasaagi n tige ma.»
57 Anu ko:
«Awa,
mɔ ni den musereŋɛ kele mɔ ni a faŋɛ maɲininka.»
58 Anu ka Rebeka kele anu ka a maɲininka,
anu ko:
«I si nɔ tagala le ba wo nun kɛ kaye?»
A ko: «N si taga le.»
59 Wo butɔ,
Rebeka la mɔgɛnu ka a boloka anun muse min ka Rebeka kolo.
A nun Iburahima la jon kaye nun a kafuɲɔgɛnu tagata.
60 Rebeka la mɔgɛnu dubata a ye,
anu ko:
«Mɔ barenmuse,
Ala mu a mala i bɔnsɛ ni siya
a ni ma mɔgɔ wulu siyama siyama la.
I bɔnsɛ ni nɔ sɔtɔ mɔgɛnu ma,
minnu be i kɔnna.»
61 Rebeka nun a la jon musenu yɛlɛta ɲɔgɔmɛnu kanna,
anu sɔta Iburahima la wo jon kaye kɔma.
A ka Rebeka jigan ɲɔgɔnna le anu tagata.
62 Wo ka a taran,
Isiyaka bata bɔɔ Lahayi-Royi kɔlɔŋɛ dula.
A tagata Negɛwu duge tɔ a sabatita ɲɔ.
63 Lun do,
Isiyaka bɔɔta a matagamandula wula butɔ wura la.
A ka a ɲa sɔ,
a ka ɲɔgɔmɛnu yen nala.
64 Rebeka ka a ɲa sɔ,
a ka Isiyaka yen,
a tunta ɲɔgɔmɛ kanna a sɔrɔnta duge tɔ.
65 A ka Iburahima la jon kaye maɲininka,
a ko:
«Kayi miniman de be tagamanna wula butɔ wo la min be nala mɔ labɛndula?»
Jon kaye ko:
«N tige Isiyaka le mu.»
Wo butɔ, Rebeka ka a kuŋɛ tijɛ a la tijaraŋɛ la.