Luntan mɔgɔ saba
18
Wo tanbireŋɛ kɔma, Alatala ka a yɛtɛ labɔɔ Iburahima ma, Mamire la lɔgɔ kutu banbanu kɔtɔ. Iburahima be sigiren a la tanta dondula tɔ tele bande la.
2 A ka a ɲa sɔ, a ka kayi saba sɔreŋɛ yen kisanna, anu bele yanfayaren a la. A bɔɔta tanta dondula tɔ, a teriyata tagala anu labɛndula, a kimisirinta duge tɔ.
3 A ka a fɔ, a ko: «N marige, n bata i mataran wo ni dugundi wo la jondeŋɛ ye.
4 Alako n ni je donden nati wo ye, wo ni wo kɛŋɛnu lako. Wo mɛn ni wo sulen kɛ lɔgɔ banba kɔtɔ.
5 Wo te tanbi wo la jondeŋɛ bata ɲɔgɔnna tun. Wo ni a to n ni taga dɛgɛ donden nati wo ye, alako wo ni sɛnbɛ sɔtɔ. Wo kɔma wo si taga wo la tagamaŋɛ la.» Anu ka Iburahima jaabi, anu ko: «Awa, a ma iko i ka a fɔ ki min na.»
6 Iburahima tagata teriya la, a donta a la tanta kɔtɔ, a ka a fɔ Sara ye, a ko: «Teriya i ni sumarifeŋɛ ɲa saba jigan farin ɲinma la i ni a lamulan, i ni a ɲiɲa dɛgɛnu la.»
7 Wo kɔma a tagata wɔɔrɛ tɔ teriya la, a ka ningi den ɲinma do bita min sube dɔmɔ di, a ka a don a la joŋɛ bolo. Joŋɛ tugun ka a jigan a tagata a tabɛn teriya la.
8 Iburahima mɛn ka nɔɔnɔ kutaŋɛ nun nɔɔnɔ kireŋɛ jigan, a ka ningi deŋɛ sube tabareŋɛ sa wonu kunma, a ka a nati, a ka wo bɛ sigi luntan saba kɛn kɔtɔ. Anu to be dɔmɔre tɔ, Iburahima be sɔren anu kɛnna lɔgɛ kɔtɔ.
9 Anu ka Iburahima maɲininka, anu ko: «I la musu Sara bele yan?» A ko: «A be yan, a be tanta kɔtɔ.»
10 Dɔndɔ ko anu tɔ: «Sikkɛ bele a tɔ, n si naa bɔɔ i ma yaari kɛ tɛmuɛ. Wo si a taran i la musu Sara bata den kayireŋɛ sɔtɔ.» Sara be sigiren tanta dondula tɔ, min be wo luntan kaye kɔma, a be a tolomasɔren a la.
11 Wo ka a taran Iburahima nun Sara bata kɔtɔya koola. Den sɔtɔ wagate bata tanbi Sara kunma.
12 Sara to ka wo kuma mɔɛ, a jeleta a juse tɔ, a ka a fɔ a ko: «Nde bata kori, n si nɔ wo sɛɛwa koe sɔtɔla ba? Han n ni sa kaye kɔma. Adun n na kaye tugun bata kikalakɔtɔya koola.»
13 Alatala ka a fɔ Iburahima ye, a ko: «Sara be jelela fenna, a bele laaren de ka a fɔla a si deŋɛ sɔtɔ a la mamakɔtɔya butɔ ba?
14 Fondo be ba, Alatala te nɔ min na? A bele. Yaari kɛ tɛmuɛ n si naa na i ma yan. Wo si a taran, Sara bata den kayireŋɛ sɔtɔ.»
15 Sara kilanta, a ka a sɔsɔ, a ko: «Nde ma jele.» Kɔnɔ Alatala ko: «Ade, i jeleta le yati.»
Iburahima la mamajɛjɛ
16 Wo kɔma, kɛ kayi saba wulita ɲɔ anu tagata, Iburahima tagata anu masɔdula. Anu sɔta anu ka anu ɲa sɔ Sodɔmu saa la.
17 Alatala ka a fɔ, a ko: «N be min mala n si nɔ wo dogonna Iburahima la ba?
18 Bayi ale le si naa ma jama banba tige la, sɛnbɛ be min na. Ale la ko sabu si a ma le dunuya bɔnsɛ bɛ ni hɛra sɔtɔ.
19 N bata Iburahima masubɛ alako ka a si a la deŋɛnu karan anun a bɔnsɛnu bɛ, ka anu si Alatala la yamɔre makanta anu ni tagaman teleŋɛ butɔ. Ka wo bata ma, n si n na lahire lakamali le n ka min jigan a ye.»
20 Alatala ka a fɔ Iburahima ye, a ko: «Kiite min be Sodɔmu kaanu nun Gomori kaanu kunma, ko makilandeŋɛ le mu a la, anu junube bata siya koola.
21 N si taga le anu tefidula. Ka n si a lɔn ka anu bata ko koroŋɛ ma iko a be fɔren n ɲɛ ki min na, ka a be ɲɔgɔnna le.»
22 Kayi fila bɔɔta Iburahima kunma anu ka kila bita tagala Sodɔmu. Kɔnɔ Iburahima tota sɔren Alatala ɲakɔtɔ.
23 Iburahima ka a madon Marige la, a ka a maɲininka, a ko: «N Marige, i si mɔgɔ telendeŋɛnu nun mɔgɔ koroŋɛnu bɛ halagi le ɲɔgɔn fɛ ba?
24 Ka i ka mɔgɔ telendeŋɛ bi loolu taran saa butɔ ɲɔ, i si saa mɔgɛnu bɛ halagi le ba? I te diɲa saa mɔgɛnu ma wo mɔgɔ telenden bi loole la ko la ba?
25 N Marige, i kana sɔn mɔgɔ telendeŋɛ ni faga mɔgɔ koroŋɛ fɛ. I ni mɔgɔ telendeŋɛ kafu mɔgɔ koroŋɛ fɛ i ni anu bɛ halagi dɔndɔ la, n ka a lɔn, i te nɔ wo koe mɔɔle mala feu. Ile le mu dunuya bɛ Kiiti salá la. I te ko koroŋɛ nun ko ɲinma fatanfasi ba?»
26 Alatala ka Iburahima jaabi, a ko: «Ka n ka mɔgɔ telendeŋɛ bi loolu taran Sodɔmu saa butɔ, n si diɲa a mɔgɛnu bɛ ma wo mɔgɔ ɲinma bi loole la ko la.»
27 Iburahima mɛn ka a fɔ tugun, a ko: «N Marige, n bata i táran i ni diɲa n ɲɛ, n ni nɔ kɛ kuma fɔla i ye, fenfen ma nde la fɔ bangue nun buguta.
28 Ka i ka a taran mɔgɔ telendeŋɛ ma bi loolu bɔɔ saa butɔ, mɔgɔ loolu be bɔɔren a la, wo mɔgɔ loole la ko si a ma i ni saa bɛ halagi ba?» Alatala ko: «Ka n ka mɔgɔ telendeŋɛ bi naani nun loolu taran saa butɔ, n te saa halagi.»
29 Iburahima mɛn takumata Alatala ye, a ko: «Tumado i si mɔgɔ telendeŋɛ bi naani taran de ɲɔ.» Alatala ka a fɔ, a ko: «N te naa ɲɔ halagi wo mɔgɔ bi naanɛ la ko la.»
30 Iburahima ka a fɔ a ko: «N Marige, i kana dumɛn n ma. I ni a to n mɛn ni kuma i ye. Ka i ka mɔgɔ telendeŋɛ bi saba le taran saa butɔ go?» Alatala ko: «Ka n ka mɔgɔ telendeŋɛ bi saba le taran ɲɔ, n te saa halagi.»
31 Iburahima ko: «N Marige, n bata limaniya, n mɛn ni i tataran tugun. Ka i ka mɔgɔ mugan de taran minnu be telenden go?» Alatala ko: «N te saa halagi wo mɔgɔ mugaŋɛ la ko la.»
32 Iburahima ko: «N Marige, i kana dumɛn n ma. N na kuma tɔɛ le ka: ka i ka mɔgɔ tan taran go minnu be telenden?» Alatala ko: «N te saa halagi wo mɔgɔ taŋɛ la ko la.»
33 Alatala to ka kuma ban fɔla Iburahima ye, a tagata. Iburahima tugun saagita a bata.