Luk 2

Nɔ́hɨ i Yésu bha nɛ́

(Mat. 1.18-25)

1 Ɔ́dhyɔ́ si drɨ́ nɛ́, átɛɨzɛ nɛ́, bhe Kaisára Ogusɛ́to bh'eídía nɔ́ʉbwɔ bhó kɛ́hya ómbi ndúbhu si kódría átɔ́ɔ́samá i ápɛ́gɔ si nɛ́Rɔ́ma andrɛ nɛ́. 2 Nɛ́hyɛ́hya ámɛ́káná nɛ́ ɛsɨ́bwʉ ndrɛ átadhɨnga i Kurinío abwʉ ɨ nɛ́guvɛrɛnɛ́rɛ i nɛ́bhágɔ́ i néSiría andrɛ nɛ́. 3 Ómbi ndúbhu kábɔɔ bhó ku kɔ́hɛ ányɛrʉ átébúku i nɛ́hyɛ́hya andrɛ, nómbí nɛ́ sɨ́ átɛ́gbɔ́tɔ́ i kɔ́hɨbwʉ to nɛ nɛ́. 4 Bhe Yɔsɛ́fa bh'ɛngábwʉ nɔgɔ bhu nɛ átɛ́zarɛ́tɛ, nɛ́gbɔ́tɔ́ kana i nɛ́Galiláya andrɛ, bh'ɔá ú átɛBɛtɛlɛ́mɛ, nɛ́gbɔ́tɔ́ kana i néYudáya andrɛ, nɛ́gbɔ́tɔ́ i kɔ́hɨbwʉ to Davídi nɛ́, sɨ́ ɨ́n'abwʉ nɛ́mava Davídi. 5 Kɔ́ɔ́bwʉ bhó ku kɛ́hya hɛ ɨ́hɛ bhu Marɨ́a, nándrɔ i abwʉ ú abɔdhyɔ bhó ndrɔgɨ nɛ nɛ́. Ka nɛ́ ka kɔ́ɔ́sɛ nyɛ bha nɛ nɛ́, Marɨ́a abwʉ bhó áneiho ro. 6 Hee bhe átadhɨnga i kábwʉ ɨ égye átɛ́gbɔ́tɔ́ i nɛ́Bɛtɛlɛ́mɛ andrɛ nɛ́, bhe nɛ́tɨánɛ i bhó Marɨ́a nɔ́hɨ́ to nɛ́ bh'atá. 7 Bh'ɔhɨ́a nɛ́ngwángwɛ masí, ándrɛngwá ámɛ́káná^a tɔhɨ, bh'aɔ́ká nɛ ánogí, bh'eídhá nɛ átɛgato^b i éri kábaányɔ to nɛ́, sɨ́ kabwʉ ɨ bhó kála mápue ú átɛ́kámbi i ómbi amɛ́ku kábedho to nɛ́.

Áángelú bhu árɨarɨí

8 Sɨ́ átápɛ́gɔ́ ɔʉzɨ́ nɛ́, árɨarɨí si ɛ́kandóló anyɛ kábwʉ nányɛ ú átɛ́ngɔ́ngɔ ká hɛ́ kárɨ́a nɛ́kandóló ɛɛpɛ i bhányɛ nɛ́ átekini nɛ́. 9 Bhe náángelú i nɛ́Ɨ́nyɨ́ Angéle bha nɛ́ asá kɔ́tɔ épipi ! Bhe Angéle ándrekémbó bh'ɔʉ́pɨ́a hɛ. Bhe ɛ́gbɔgbɔ́ kódía hɛ. 10 Bhe náángelú ɔdhyá kála bhó « Mɨɨ́ngɛɛ́rʉ́ bhelé ! Outo nɛ́, sɨ́ má ú mékua ndó ku móúti nyala nɛ́tʉ́ balí i ɛɨgába ómbi ndúbhu nɛ́ɨgyagya ootu nɛ́. 11 Átekini i, átɛ́gbɔ́tɔ́ i Davídi bha nɛ́, nɛ́Ɨ́rɛ́ɨ́rómbíé aángɔhɨ ndrɛ nyala. Ɨ́nɛ, ɨ́n'a Krísito, nɛ́Ɨ́nyɨ́ Angéle i Angéle ɔrwabwʉ bhó ndrɛdhaba nɛ́. 12 Bhó amúgwó ká nándálá i nya ú nyɛɨ́tɨa to nɛ nɛ́ : nyaámbwua nɛ́ngwákʉrɛ kana ká hɛ́ káɔ́ká nɛ ánogí, ká hɛ́ kéídhá nɛ átɛgato nɛ́. » 13 Ka nɔ́dá bha mɔ́da nɛ́, bhe kpukpurukpu i áángelú si nɔ́rɔ anɛ bhe kɔ́ɔ́sá nyɛ ánɛnɛ́ ro, bhe kérímá ká hɛ́ kɔ́ʉ́bwá Angéle, ká hɛ́ kɔ́dhya bhó

14 « Nɔ́ʉ́bwɔ́ʉ́bwɔ́ Angéle ko ú átɔrɔ ú bhó pima,

bhe ɨ́n'aángaáo nɔ́dhyɔ kpílíbhíndí átapɛ i ómbi si ɔɔ́múa hɛ nɛ́ kála. »

Bhe árɨarɨí si ɛ́kandóló anyɛ kɔ́á ú átɛBɛtɛlɛ́mɛ

15 Átadhɨnga i áángelú kábhá ɨ hɛ bhe káátúa nyɛ bha ú átɔrɔ nɛ́, bhe árɨarɨí káádhyá tányɛrɨ́ bhó « Anyéi amáɔ tó bha ú átɛBɛtɛlɛ́mɛ, ku amágwó asɔdhyɔ gyó i aángoópú égye nɛ́, néi nɛ́Ɨ́nyɨ́ Angéle aángoúti mala nɛ́ ! » 16 Bhe kɛ́ɛ́ká nyɛ ú átɛBɛtɛlɛ́mɛ, bhe káámbwúa Marɨ́ahɛ bhu Yɔsɛ́fa, bhu nɛ́ngwákʉrɛ ká hɛ́ kéídhá nɛ átɛgato nɛ́. 17 Átadhɨnga i kógwá ɨ nɛ nɛ́, bhe kódrwá ɔ́dhyɔ́ ndúbhu si náángelú oútibwʉ kála átɛ́ngwángwɛ nɛ́ ándrɔdhyɔ nɛ́. 18 Bhe ómbi pɨ́tɛ́ si kɔ́gabwʉ ɔ́dhyɔ́ ndúbhu si árɨarɨí kódrwebwʉ nɛ́, bhe kámbángábwʉ átɛtʉ ndúbhu si kɔ́dhyɔ́bwʉ nɛ́. 19 Ɨ́nɛ Marɨ́a, a n'oógyá nándrɛ ɔ́dhyɔ́ hɛ́ ndúbhu tándreísú mɔmbɛ́, a nɛ́ aámbá to nzúdhá-nzúdhá nɛ́. 20 Átámɛ́zaa, bhe árɨarɨí káátubwʉ nyɛ, ká hɛ́ kɔ́ʉ́lyá Angéle ándrekémbó, ká hɛ́ kɔ́ʉ́bwá nɛ átɔ́dhyɔ́ ndúbhu si kɔ́gabwʉ bhe kógwóbwʉ nɛ́, outo nɛ́, sɨ́ ɨ́n'abwʉ sɨ́ɨ́sɨ́ náángelú oútibwʉ kála.

Bhe kóngá nɛ́ngwángwɛ ánɛrʉ

21 Átekini ámɛ́bhɔ́gɨ́ná átɛzaa i kɔ́hɨ́a ɨ to nɛ́ngwángwɛ nɛ́, bhe nádhɨnga i bhó kófo to nɛ nɛ́ bh'atá. Bhe kóngá nɔ́ɔ ɛ́rʉ bhó Yésu, ɛ́rʉ si náángelú aabhúbwʉ ɨ́sɛ́ɛ́lɛ́ i bhó yánɛ́ nɔ́gɨ néiho nɛ́.

Bhe kɛ́mbá Yésu ú átáángélégyó kpɔkpɔ

22 Hee bhe nádhɨnga i bhó Marɨ́ahɛ bhu Yɔsɛ́fa bhó nyɛsɨ́ nɔ́ʉ́bá sɨ́ɨ́sɔ́ nƆ́ʉbwɔ i Mʉ́sɛ bha nɛ́ aádhá nɛ́ bh'atá. Bhe kɛ́mbá nɛ́ngwángwɛ ú áteYerusalɛ́mɛ bhó ku kéíhwe nɛ nɛ́Ɨ́nyɨ́ Angéle ko. 23 Outo nɛ́, sɨ́ a ú ɔhá ndrɛ átƆʉbwɔ i nɛ́Ɨ́nyɨ́ bha nɛ́ bhó « Nɛ́masí ámɛ́káná átɔhɨ, ka nɛ́ ka ɨ to nébíábhende nɛ́, bhó képyoba nɛ mépyo sɨ́ze nɛ́Ɨ́nyɨ́ Angéle ko. » 24 Bhó bhe nyaáa to nɛ́bandʉlɛ i nɛ́mɔ́bɔma andrɛ, sɨ́ɨ́sɔ́ nƆ́ʉbwɔ nɛ́ kana nɛ́ nɛ́ a ú onía ámbúrúkúkú sóórúé, bisa épizó sásá sóórúé. 25 Hee náasí oúgé kana abwʉ égye áteYerusalɛ́mɛ ánɛrʉ bhó Simɛɔ́na. Ɨ́n'abwʉ nómbí amɛ́yɔ, a n'ɛɛ́rʉ́a Angéle nɛ́. Bh'abwʉ a n'onvá nádhɨnga i bhó nɛ́Ɨ́nyɨ́ Angéle nɛ́dha to Masɨ́ya bhó bh'ɛɨ́ra to ɛ́gyándrɛ́ si néÍsraɛ́lɛ anɛ nɛ́. Bhe nÓudhuudhu Sáátu abwʉ nɔ́rɔ. 26 NÓudhuudhu aabhúbwʉ nɔ́ɔ átɛ́ɛ́dhá bhó ɨ́n'onzíba ka kpendí ka nɛ́ ka ká ɨ nógwó Masɨ́ya i nɛ́Ɨ́nyɨ́ Angéle bha nɛ́ i a ú ɛdhaba nɛ́. 27 NÓudhudhu a n'ɛɨ́pwʉ́a nɛ nɛ́, bhe Simɛɔ́na ɔá ú átɛ́bálá i náágélégyó kpɔkpɔ andrɛ. Átadhɨnga i Yɔsɛ́fahɛ bhu Marɨ́a kékúbwʉ ánɛngwángwɛ ro bhó ku nyɛsɨ́ sɨ́ nƆ́ʉbwɔ i Mʉ́sɛ bha nɛ́ onía nɔ́tɔ nɛ́, 28 bhe Simɛɔ́na ɔbwá nɛ tánɛtɛ́, bh'ɔʉbwá Angéle, ɔdhya bhó 29 « Gaa ɨ́ drɨ́ Páápa nɛ́Ɨ́nyɨ́ Angéle, mɨ́ɨ́ngɛsɨ́ sɨ́ɨ́sɔ́ mʉ́dhyɔ́bwʉ. Bɛsɨ́ngɨ nyábha bhó nyáá némogya i bhándrúé nɛ́ ánɛŋɔ kɔ́kʉ́ átɔdhyɔ kpílíbhíndí ándrɛhɔ. 30 Outo nɛ́, sɨ́ máángogwo ánɔ́ɔŋɔ kɔ́rɔ gbagba nómbí i mɨ́ɨ́ngɛdhá bhó ku nɛ́ɨ́ra aama nɛ́. 31 Néi nyɛ́ɨ́mbɛ́mbá nɛ áteetu i ómbi ndúbhu si nápɛ i anɛ nɛ́. 32 Nɛ́ngwángwɛ i ɨ́n'a néíkó i ɛɨ́pwʉba bhó éingiligyo si nápɛ i anɛ kɛ́ɨ́tɨ mɨ nɛ́, bhe nɛ́báságyó i bhándrúé nɛ́ néÍsraɛ́lɛ ánɛrʉ kókuba. » 33 Nɛ́ngwángwɛ apanɛ́ bhu yánɛ́ kábwʉ ká hɛ́ kámbanga mámbanga átɔ́dhyɔ́ si Simɛɔ́na abwʉ ú abɔdhyɔ átɛ́ngwángwɛ nɛ́ ándrɔdhyɔ nɛ́. 34 Bhe Simɛɔ́na oúfúa hɛ, ɔdhya yánɛ́ Marɨ́a ko bhó « Angéle aábɔrwa nɛ́ngwángwɛ i átɛmbanda i bhó ndreídhe to bhó bhe ndreindría to ómbi ootu átéÍsraɛ́lɛ nɛ́. Ɨ́n'obhuba nándálá i Angéle bha nɛ́^c i ómbi kétíba nɛ́, 35 bh'eídiba áámbáámbá si ómbi ootu ká ú kóógyá tányeisu nɛ́ ngbádhá átéíkó. Obhúa ɨ́mɨ́ nɛ́ Marɨ́a, nɔ́dɔ ɔʉtʉ́ba andrúéísú únga ká sɨ́ nɛ́sápé ɔʉ́tʉ́a. »

Bhe Ána ɔʉbwʉ́a Angéle Yésu tándrɔdhyɔ

36 Nénébi andrɔ kana abwʉ ká bhu nɛ, ánɛrʉ bhó Ána. Ɨ́n'abwʉ Pɛnʉɛ́lɛ ándrɛngwá, átɛ́báságyó i Asɛ́rɛ bha nɛ́. Abwʉ bhó námbwúádrɛ. Kédhóbwʉ nyáá ápye ɛ́kárángá tónórue bhu nɛ́masí i ɔgɨ́bwʉ ándrɔ́tɔngadɔngádɔ́ nɛ́, 37 bh'eekébwʉ néigwa t'angatɛ ɛ́kárángá ɛ́tɛɛvhɛ bɔgɨna égí sɔ́sʉa. Abɛzá ka bhó ú átáángélégyó kpɔkpɔ. Abɛsɨ́ bhó nyáá ápye Angéle ko némolo átɛtɨánɛ bhu átekini, a n'embwua némo, a n'asɛmya nɛ́. 38 Bh'ɔʉ́sɨ́a ndrɛ sɨ́ átadhɨnga nɛ́ kana nɛ́ nɛ́, bh'erímá a n'ɔʉ́bwá Angéle, a n'ɔdhya ɔ́dhyɔ́ ómbi ndúbhu si kábwʉ ú kónvá bhó Angéle nɛ́ɨ́ra néYerusalɛ́mɛ nɛ́ kála átɛ́ngwángwɛ nɛ́ ándrɔdhyɔ nɛ́.

Bhe Yésu apanɛ́ bhu yánɛ́ káátúa nyɛ bha ú átɛ́Náázarɛ́tɛ

39 Átadhɨnga i Yɔsɛ́fahɛ bhu Marɨ́a kéíbíbwʉ ɨ ɔ́dhyɔ́ ndúbhu sɨ́ɨ́sɔ́ nƆ́ʉbwɔ i nɛ́Ɨ́nyɨ́ Angéle bha nɛ́ onía nɛ́, bhe kɔ́kʉbwʉ bha ú átɛGaliláya, ú átɛ́gbɔ́tɔ́ i bhányɛ nɛ́ i nɛ́Náázarɛ́tɛ andrɛ. 40 Bhe nɛ́ngwángwɛ erímá a n'ɛkpɔkpa, a n'ogá nɛ́, a n'ɛɨ́nʉa ánakɨra i nómbiombí andrɛ ro nɛ́. Bhe nɔ́ɔmʉ i Angéle bha nɛ́ ɨ́n'abwʉ nɔ́tɔ.

Yésu ánɛkárángá tɛ́ɛ́vhɛ́ égí sóórúé, ú átáángélégyó kpɔkpɔ

41 Yésu apanɛ́hɛ bhu yánɛ́ kábɔɔ ɛ́kárángá kpɛ́ ú áteYerusalɛ́mɛ átaadhu i nɛ́Pásɨka andrɛ. 42 Átadhɨnga i Yésu atá ɨ ɛ́kárángá tɛ́ɛ́vhɛ́ égí sóórúé nɛ́, bhe kéíkébwʉ nɔ́rɔ ú átaadhu sɨ́ɨ́sɨ́ nóhíámɛ́ i éMoyúda anyɛ onía. 43 A drʉ ékíní si náadhu anɛ kéebía nɛ́, bhe Yɔsɛ́fahɛ bhu Marɨ́a káátubwʉ nyɛ, bhe nɛ́ngwángwɛ Yésu eeká ányɔɨ ɛ́pɛ́lɛ́ ú áteYerusalɛ́mɛ. 44 Ká hɛ́ kónga nyɛ bhó Yésu ɨ́n'a kɔ́rɔ ányɔ́tambaza i néhíɛ andrɛ nɛ́, bhe kɛ́sɨ́bwʉ nɛ́tɨánɛ kana ndúbhu ká hɛ́ kóólia nɛ́. Ú zaá nɛ́, bhe kɔ́tʉ́a nɛ nɔ́nda átéígo i maánándrɛhɛ kála nɛ́, bhu átéígo i ándragɔ́nɛ́hɛ kála nɛ́. 45 Drʉ kabwʉ kógwó nɛ nɛ́, bhe káátubwʉ nyɛ tɔkana ú áteYerusalɛ́mɛ ká hɛ́ kɔ́nda nɛ nɛ́. 46 Átekini ámɛ́sɔ́tá, bhe káámbwúa nɛ ú átɛ́bálá i náángélégyó kpɔkpɔ andrɛ, a n'odría átɔ́ɔ́rɨandrɛ i áadhaadhɔí anyɛ, a n'ɔgá hɛ, a n'ɔʉ́ɨa hɛ nɛ́. 47 Ómbi ndúbhu si kábwʉ ú kábɔga nɛ nɛ́, bhe kámbángábwʉ mámbamga gbagba tándrakɨra i abwʉ ú abakɛlya nɔ́ nɛ́. 48 Átadhɨnga i kógwá ɨ nɛ nɛ́, bhe kámbángá mámbanga. Yánɛ́ ɔɨa nɛ bhó « Kábhá andrángwá ! Oudhu gyó i nyɛ́sɨ́a to aama sɔ́ nɛ́ ? Kugwó ká, aama bhu apándru mabá ú mabɔ́nda mɨ áneísú amápa ! » 49 Bh'aátúa kála bhó « Oudhu gyó i mɨbɔ́nda to ma nɛ́ ? Kabá ka nyɛɨ́tɨ bhó aátá ndrɛ bhó mábhú ɨ́ zá átégyó i Páápa bha nɛ́ ? » 50 Bhe ɨ́hɛ kabwʉ kɔ́gá nɔ́dhyɔ i ɔdhyɔ́bwʉ kála nɛ́ ándredru. 51 Bhe Yésu adɛbwʉ kɔ́rɔ ú átɛ́Náázarɛ́tɛ. Abwʉ a n'ɛɛ́rʉ́a hɛ ɛɛ́rʉ nɛ́. Yánɛ́ a n'oógyá ɔ́dhyɔ́ hɛ́ ndúbhu tándreísú nɛ́. 52 Bhe Yésu erímá a n'ɛkpɔkpa tándrakɨra i nómbiombí andrɛ bhu tándreépí nɛ́, ándrɔdhyɔ a n'ɔmba Angéle ko bhu ómbi kála nɛ́.