Yɔáni Mobátísí a ú agyá nɛ́tʉ́ i Angéle bha nɛ́ ómbi kála
(Mat. 3.1-12; Mákɔ 1.1-8; Yɔá. 1.19-28)
3
1 Abwʉ átɛkaránga ámɛ́tɛ́ɛ́vhɛ́ égí tɔ́zɛrɛna átɛɨnyɨngwa i Kaisára Tibɛ́rɛ bha nɛ́, Pósíó Piláto a nɛ́ néguvɛrɛnɛ́rɛ i nɛ́Yudáya andrɛ nɛ́, Ɛrɔ́dɛ a n'ɔnyá ú átɛGaliláya nɛ́, yánɛ́ngwɛ Filípo a n'ɔnyá áteteritwárɛ i néIturíya bhu nɛ́Turakoníte andrɛ nɛ́, Lizaníya a n'ɔnyá ú átÁbilɛ́nɛ nɛ́. 2 Ána bhu Kayáfa ká hɛ́ ɛ́kɔána kpɔ́kpɔ́ akpatʉ́ si Angéle bha nɛ́ nɛ́. Átadhɨnga nɛ́, Yɔáni, Zakarɨ́a ándrɛngwá, abwʉ ú átóúmá. Bh'Angéle aáá ándrɛtʉ́ Yɔáni ko. 3 Bha ɨ́ Yɔáni ɛngábwʉ ɨ́ bh'aágba a n'eémbá nɛ́dháobho i nɛ́Yɔrɔdɛ́nɛ andrɛ ánoóbhúrú pɨ́tɛ́ nɛ́. A n'oútia ómbi kála bhó kéevhíngílí ányeisu, bhó bhe kágba nɛ́batísimo, bhe Angéle eégia ɛ́masúmu si bhányɛ nɛ́. 4 Ɨ́n'ɛsɨ́bwʉ ndrɛ sɨ́ɨ́sɨ́ nénébi Isáya ɔhɛ́bwʉ átébúku i bhándrɛ nɛ́ bhó
Néi ɨ́n'a nómbí i a ú agyá ú átóúmá nɛ́ bhó
Anyɛ́ɨ́mbɛ nɛ́ndakɨ i nɛ́Ɨ́nyɨ́ bha nɛ́,
bhó bhe nyɛ́ya éhiɛ́ si bhándrɛ nɛ́ mɔmbɛ́.
5 Bhe nyɛ́ɨ́nʉnʉa ɛɨ́nʉnʉ ɛ́bɔndɔ́ pɨ́tɛ́,
bhe nyɛɨ́rya ɛɨ́rya óóhóló kpɔ́kpɔ́ ánamɛ́sásá pɨ́tɛ́,
bhe nyɛ́ya mɛ́yɔ éhiɛ́ amákɔkɔ,
bhe nyekpá mékpé éhiɛ́ kpéngelekpéngele mɔmbɛ́ ɛ́labhɨta.
6 Bhe ómbi ndúbhu kógwóba sɨ́ Angéle ɛɨ́ra.
7 Ómbi ootu kábeku ú Yɔáni a ɨ átɛmbanda i bhó náábatisa hɛ nɛ́. Abɔdhyɔ ombirongwɛhɛ si kábeku bhó ku nyɔdrwʉa nɛ́batísimo nɛ́ kala bhó « Akiɛmbwʉ́má gyándrɛ́a , adhíngwɛ i aádhá aamɨ bhó amʉ́rɔ náándáándó ambambó i Angéle bha nɛ́ i a ú ekua nɛ́ ? 8 Hee amʉ́hɨ́ ɨ táo ɛ́ɨbhʉɛɨbhʉkpɔ́ si káádhá bhó mɨɨ́beevhíngílí akíéisu nɛ́ ! Mɨɨ́ngobhu bhelé nya hɛ́ mʉdhya átákíeisu bhó Ábaráma ɨ́n'a nápá i bháɛ́ nɛ́ nɛ́. Outo nɛ́, má nɛ́ mádhyá nyala nɛ́, Angéle a ánaátáatɛ bhó ndreevhíngílí óopi si mugwa i nɛ́ bh'eídia to Ábaráma ko ɛ́gyándrɛ́. 9 Nóombi ɨ́n'a bhó kʉ́ndɨ́ bhó kɔ́gɔ nɔ́ ɛ́kɨ́rɛ́ tányɛɨvhʉ. Ɛ́kɨ́rɛ́ ndúbhu si kɔ́hɔ ka ɛ́ɨbhʉɛɨbhʉkpɔ́ bali nɛ́, bhe kɔ́ga hɛ bhe kókpua hɛ átaago. » 10 Ombirongwɛhɛ hɛ́ kábɔɨ nɛ bhó « Mɛsɨ́a bhó táo bhásí ? » 11 Abaátu kála bhó « Nómbí i obhúa ánesímísí sóórúé nɛ́, nóo nómbí i ka ɨ nɔ́rɔ nɛ́ ko kana, bhe nómbí i obhúa ánaányɔ́ nɛ́, nɛ́sɨ́ sɨ́ɨ́sɔ́. » 12 Ɛ́ndɔ́mbɛ si ɛ́páko anyɛ kékúbwʉ bhu hɛ bhó ku náábatisa hɛ. Bhe kɔ́ɨ́a nɛ bhó « Náadhaadhombíé, bhó mɛsɨ́a bhásí ? » 13 Ɔdhya kála bhó « Mɨɨ́ngeíké bhelé nɛ́páko ándrɛbhangwɛ t'angafo néi nɔ́ʉbwɔ a ú onía nɛ́. » 14 Bhe ɛ́sʉdhá kɔ́ɨ́a nɔgɔ bhu hɛ nɛ bhó « Ɨtá táo aama, mɛsɨ́a bhásí ? » Ɔdhya kála bhó « Mɨɨ́ngɔvhɛ bhelé ɛ́faránga si nómbí anɛ kpakpara kpákpárá, mɨɨ́ngoúwo bhelé nómbí átɛɨtɔ. Anyárɨ́ sɨ́ ɛ́faránga si káfuta nɔ́ aamɨ nɛ́. » 15 Ómbi kábwʉ ká hɛ́ kónvá mónvo nɛ́, ká hɛ́ kɔ́ɨa nyɛ bhó « Yɔáni ka bha nɛ Masíya sɔ́pɛɨ́ ! » 16 Bhe Yɔáni akɛ́lyá ómbi hɛ́ ndúbhu kála bhó « Ɨ́má, má ú máábatisa aamɨ ánegwo, nɔ́dhyɔkana, nómbí akʉ́nɛ́, ɨ́n'a ú ekua, ɛpá nɛ ma átɛkpakpárá, ka máátɛtɛ ndra bhó máávhab ɛ́kátárá nzíéepye si bhándrɛ nɛ́. Ɨ́nɛ, a nɛ nɛ i aábatisaba aamɨ ánOudhuudhu Sáátu bhu ánaagoc ro nɛ́. 17 Ɨ́n'a ú agbá nɛ́kyangyá átánɛtɛ́ bhó ndrabwu to ɛ́ɨbhʉɛɨbhʉkpɔ́, bhó bhe ndraanʉ́a to émbóló bha átébóngíró i bhándrɛ nɛ́. Bhe ámépúpúud , bh'ɔsʉba hɛ átaago i onzí ka nɛ́. » 18 Hee bhe Yɔáni aáá táo ɔ́ʉ́bwɔ́ akʉ́ɛ́ móotu, bh'erímá tɔkana a n'agyá ómbi kála nɛ́tʉ́ balí i Angéle bha nɛ́ nɛ́. 19 Bhe Yɔáni abákpábwʉ nɛ́Ɨ́nyɨ́ Ɛrɔ́dɛ, outo nɛ́, sɨ́ abwʉ aángɔgɨ́ yánɛ́ngwɛ ándrandrɔ Ɛrɔdiádɛe bhu táo sɨ́ abwʉ aángɛsɨ́ ká bhu ɔ́dhyɔ́ biti akʉ́ɛ́ móotu. 20 Bhe Ɛrɔ́dɛ akpúa ká tɔkana nɔ́dhyɔ biti akʉ́nɛ́ bha átákʉ́ɛ́, bh'eitá Yɔáni átɔ́gbʉ́gyó.
Nɛ́batísimo i Yésu bha nɛ́
(Mat. 3.13-17; Mákɔ 1.9-11)
21 Ɨ́sɛ́ɛ́lɛ́ i bhó káágbʉ́ Yɔáni átɔ́gbʉ́gyó nɛ́, átadhɨnga i abaábatisa ɨ ómbi ndúbhu nɛ́, bh'aábátísá bhu Yésu. Átadhɨnga i Yésu a ú asɛmya ɨ nɛ́, bhe nɔ́rɔ aándía ndrɛ. 22 Bhe nÓudhuudhu Sáátu esyá nɔ́tɔ a n'eégwá sɨ́ nákúrúbhú nɛ́. Bhe nɛ́tʉ́ i Angéle bha nɛ́ ɛngá ú átɔrɔ ɔdhya bhó « Ɨ́mɨ́, nyá nɛ́Ngwángwɛ i nándrá i mɔ́ɔ́mʉ́a mɨ pima nɛ́f , nɛ́ɨgyagya i bhándrá nɛ́ ndúbhu ɨ́n'a mɨ́to. »
Yésu kɔ́kɔnɛ́hɛ
(Mat. 1.1-17)
23 Átadhɨnga i Yésu atʉ́ngá i némolo nɛ́, abwʉ bhó ánɛkárángá únga ká ɛ́tɛɛvhɛ sɔ́ta. Ómbi kábaambá nyɛ bhó ɨ́n'a Yɔsɛ́fa ándrɛngwá, Yɔsɛ́fa i abwʉ Éli ándrɛngwá nɛ́, 24 Matátɛ ándrɛngwá, Lévi ándrɛngwá, Melekia ándrɛngwá, Yanáa ándrɛngwá, Yɔsɛ́fa ándrɛngwá, 25 Matatɨ́a ándrɛngwá, Amɔ́sa ándrɛngwá, Naúma ándrɛngwá, Éséli ándrɛngwá, Nagái ándrɛngwá, 26 Maáta ándrɛngwá, Matatɨ́a ándrɛngwá, Semeínɛ ándrɛngwá, Yɔsɛ́kɛ ándrɛngwá, Yɔ́da ándrɛngwá, 27 Yɔána ándrɛngwá, Rɛ́sa ándrɛngwá, Yerubabɛ́lɛ ándrɛngwá, Salatiɛ́lɛ ándrɛngwá, Néri ándrɛngwá, 28 Mɛlɛ́kɨ ándrɛngwá, Ádi ándrɛngwá, Kosáma ándrɛngwá, Élémadáma ándrɛngwá, Ɛ́rɛ ándrɛngwá, 29 Yésu ándrɛngwá, Elíɛzɛ́rɛ ándrɛngwá, Yoríma ándrɛngwá, Matátɛ ándrɛngwá, Lévi ándrɛngwá, 30 Simɛɔ́na ándrɛngwá, Yúda ándrɛngwá, Yɔsɛ́fa ándrɛngwá, Yɔnáma ándrɛngwá, Eliakíma ándrɛngwá, 31 Meléa ándrɛngwá, Mɛ́na ándrɛngwá, Matátɛ ándrɛngwá, Natána ándrɛngwá, Davídi ándrɛngwá, 32 Yɛ́sɛ ándrɛngwá, Ɔbɛ́dɛ ándrɛngwá, Bɔáza ándrɛngwá, Sála ándrɛngwá, Naasɔ́na ándrɛngwá, 33 Aminadába ándrɛngwá, Adimína ándrɛngwá, Arúni ándrɛngwá, Ɛzɛrɔ́ni ándrɛngwá, Pɛrɛ́za ándrɛngwá, Yúda ándrɛngwá, 34 Yakóbho ándrɛngwá, Isáka ándrɛngwá, Ábaráma ándrɛngwá, Tɛ́ra ándrɛngwá, Naɔ́ra ándrɛngwá, 35 Serúga ándrɛngwá, Ragáu ándrɛngwá, Pɛlɛ́gɛ ándrɛngwá, Ɛbɛ́rɛ ándrɛngwá, Sɛ́la ándrɛngwá, 36 Kɛnána ándrɛngwá, Arɛ́pakasáda ándrɛngwá, Sɛ́mɛ ándrɛngwá, Nʉ́a ándrɛngwá, Lamɛ́kɛ ándrɛngwá, 37 Metúsɛlá ándrɛngwá, Ɛnɔ́ka ándrɛngwá, Yarɛ́dɛ ándrɛngwá, Malalɛ́lɛ ándrɛngwá, Kɛnána ándrɛngwá, 38 Ɛnɔ́sa ándrɛngwá, Sɛ́tɛ ándrɛngwá, Adámʉ ándrɛngwá, Angéle ándrɛngwá.