Ikatelu a Sulat'i Yuhan
Su Salam enggu su Pangeni-ngeni
1
Su nia a sulat na ganat sa laki a isa kanu kalukesan nu lumpukan nu 'bpamaginugut. Na san i nia pakatumpa sa leka Gayus a sangat a ipegkalimu ku sia luyud kanu bantang. 2 Manga dua na suled, ibpangeni-ngeni ku i mapia su 'gkambebetad'engka enggu su kanggulawas'engka, a mana bun su 'gkambebetad'u salig'engka. 3 Na sangat a magalaw aku kanu kinauma sia nu ped a manga suled ta a pedsaksi pantag kanu kabpaginugut'engka kanu bantang. Ka katawan ku i 'bpaguyag-uyag ka sia luyud kanu bantang. 4 Na da den man makalawan kanu kapegkagalaw ku sa kanu kinakineg ku kanu manga dua na wata ku a 'bpaguyag-uyag silan sia luyud kanu bantang.Su Kapedtabang kanu 'Bpamaginugut
5 Manga dua na suled, na su kapedtabang'engka kanu manga suled ta sa paginugut sa apia di nengka silan katawan na amadan i entu sa kasaligan ka. 6 Namedsaksi silan sia kanu lumpukan nu 'bpamaginugut kanu kapegkalimu nengka kanilan. 'Bpangenin ku sa leka i tabangi ka pamun su silan a entu a manga 'bpelalakaw sa kanu ngin i nasisita nilan ka entu ba i makasuat kanu Kadenan, 7 kagina su kabpelalakaw nilan na sabap kanu ingala nu Isa al-Masih enggu di silan pedtalima sa apia ngin a tabanga ebpun kanu manga taw a dikena 'bpamaginugut. 8 Na kagina ka maitu na dait a edsakaw-sakawn tanu silan ka enggu tanu makaamung bun kanu kapebpayapat'ilan kanu bantang.
9 Na sinulatan ku bun man san su lumpukan nu 'bpamaginugut ugaid'a su isa a pegkiug gaid 'bpangunanan a si Diutripis na dala kami nin ipamamantag. 10 Kagina ka maitu na u makasan aku na edtalun ku sa lekanu su manga galebek a pinggula nin enggu su mawag a kangadtalu nin pantag sa lekami a dikena benal. Na da pamun sekanin masukul kanu entu ka dikena bu da nin edsakaw-sakawa su manga suled sa paginugut a pamakauma ka nia pan mula na su pegkiug pedsakaw-sakaw kanilan na pedsapalan nin pan taman sa ibpagawa nin silan kanu lumpukan.
11 Manga dua na suled, na di ka 'bpagilingi su mawag a galebek ka nia ka ilingi na su mapia. Kagina su penggalebek sa mapia na nalusud kanu Kadenan enggu su penggalebek menem sa mawag na di nin katawan su Kadenan.
12 Na ilay ka si Dimitriu ka mapia i labitan nu langun nu taw sa lekanin enggu 'gkailay bun i entu sia kanu kabpaguyag-uyag'in a luyud kanu bantang. Na maitu kami bun ba, mapia bun i labitan nami sa lekanin enggu katawan nengka man i benal su ipedsaksi nami.
Su Mauli a Salam
13 Madakel pan i pegkiugan ku pedtalu sa leka ugaid'a da ku den idalem sia 14 kagina 'gkapangingalap ku i mangagan ta bun makapagilaya ka enggu ta makambitiala. 15 Na san sa lekanu su kalilintad.
Pedsalamen ka bun nu manga suled ta sia sa paginugut. Na isalam aku nu bu kanu uman i isa kanu manga suled tanu san.
Wassalam