7
Aye kyechiljo kab'lajaj ch'uq kyyajil aj Israel
1 Tb'ajlinxi' ikyjo, xi nka'yi'n kyaje angel wa'lqetaq toj kyaje tumil tx'otx', a tzyu'ntaq kyaje kyq'iq' kyu'n,* tu'ntzintla mi xupin kyq'iq' tib'aj tx'otx', ex tib'aj ttxuyil a', mixpe tib'aj jun tze. 2 Ex nliy juntl angel, a tzajnin toj tjawitz q'ij, a q'i'ntaq tu'n, ajo jupb'ilte u'j tu'n Dios, a itz' te jun majx. 3 Atzin angel jaw ẍch'in tuk'a tq'ajq'ojil twi' kujxix wen. Xi tq'ma'n kye angel, aye' otaq xi q'o'n kyoklin tu'n tkub' kyb'inchin mib'in ti'j tx'otx' ex ti'j ttxuyil a'. Ex chi' kyjalu'n: Mi kub' kyb'inchi'n mib'in ti'j tx'otx', ex ti'j ttxuyil a', ex kyi'j tze, a na'mxtaq tok kyechiljo nimil qu'n ti'j kyplaj, aye' aq'nil te qDios, qa te teqe.*
4 Ex nb'iy kyajlaljo a otaq tz'ok kyechil: 144,000 kyxoljo kyyajil aj Israel.
5 Kyxoljo tyajil Judá, kab'lajaj mil; ex kyxoljo tyajil Rubén, kab'lajaj mil; ex kyxoljo tyajil Gad, kab'lajaj mil. 6 Ex kyxoljo tyajil Aser, kab'lajaj mil; ex kyxoljo tyajil Neftalí, kab'lajaj mil; ex kyxoljo tyajil Manasés, kab'lajaj mil. 7 Ex kyxoljo tyajil Simeón, kab'lajaj mil; ex kyxoljo tyajil Leví, kab'lajaj mil; ex kyxoljo tyajil Isacar, kab'lajaj mil. 8 Ex kyxoljo tyajil Zabulón, kab'lajaj mil; ex kyxoljo tyajil Jse, kab'lajaj mil; ex kyxoljo tyajil Benjamín, kab'lajaj mil.
Nimku xjal ok kyxb'alin sjanin
9 Tb'ajlinxi' ikyjo, xi nka'yi'n nimku xjal te tkyaqil twutz tx'otx', a'lchaqx kye kyxe'chiltz, kyyol ex kytanim. Ex wa'lqetaq twutzjo q'uqb'il ex twutzjo tal Tal rit. Ma nintz kyb'aj; mix a'l jun aku b'ant tajlankye. Toktaq kyxb'alin sjanin wen, ex q'i'n t-xaq palma toj kyq'ob'. 10 Ex kykyaqilxtaq nchi ẍch'in tuk'a tq'ajq'ojil kywi' kujxix wen:
Ajo kolb'il tzajnin te qMan Dios, a q'uqle tib'ajjo q'uqb'il tzalu'n toj kya'j, ex tejo tal Tal rit.
11 Ex kykyaqiljo angel wa'lqetaq ti'jile q'uqb'il, ex kyi'jile nejinel ex kyi'jile kyaje ajb'il, ex i kub' meje twutzjo q'uqb'il, ex kupin kyplaj twutz tx'otx'; i k'ulin te Dios, 12 ex kyq'ma:
¡Ikyxitjo! Qq'onx b'itz te nimsb'il tb'i Dios, ex jni' qnab'l, ex tkyaqil aq'b'il chjonte, junx tuk'a nim qoklin, qipin ex qkujil, ja'lin ex te jun majx. ¡Ikyxitjo!
13 Ex tzaj tqanin jun nejinel we'y: ¿Ankyeqe lu'n, a tok kyxb'alin sjanin, ex ja'tzin ẍi tzaje?
14 Ex xi ntzaq'wi'n: Ojtzqi'n te tu'n, tata, nchiji'y.
Ex tzaj tq'ma'n we'y:
Ayetzi'n, a o chi etz toj nim b'isb'ajil twutz tx'otx'.*
Noq tu'n tchky'eljo Jesús, ajo tal Tal rit, ma saqix kychwinqil,
ikyx tze'nku jun xb'alin sjaninxix, a ma tz'el txjet ti'j.
15 Tu'npetzi'n, loqe ite' twutz tq'uqb'il Dios q'ijl ex qniky'in.
Nchi ajb'in toj tja te k'ulb'il.
Ex atzin te a q'uqle toj q'uqb'il, ok kchi kletil tu'n,
qu'n ktenb'il kyuk'a te jun majx.
16 Ex nlay tziky'x wa'yaj kyu'n ex k'waj,
ex nlay chi tz'e'y tu'n tqan q'ij, ex nlay kyna'n kyaq.*
17 Qu'n a te' tal Tal rit, a q'uqle toj tk'u'j q'uqb'il,
kchi okil tkyik'le'n tze'nku rit.
Ex kchi xel ttxko'n tojjo xlok' a',
tu'n kyten kychwinqil te jun majx.
Ex aku Dios k-elil su'nte ta'l kywutz.*