19
Wahy Poong Yi Dhaahr Maalo
1 Batien gihn nu, e duol alihnga lihngo ke yoohn Maalo wa doohn nyoge me thoohdh e wahy poong akiid gene kob gene,
<<Poongo Juog,
boadh wahy,
maa moar wihj
kedea tee ge naa bang Juog gihro.
2 Lubo maa athiir angol Juoge ke piny
ne kew naa akihme diih ajaba gihn
anaa alyaahb upiny ke giih bal.
Rem jo ayiiho naa awoj piny
ke nying ajaba gihn ni kar ge acoal Juoge.>>
3 Keehdo, e jo ni ge abar maalo ke wahy poong kob gene,
<<Poongo Juog,
yihdo gihr maay awaang geew uke duung ne naang e ngo be gug!>>
4 Yi kwaad gihn nu, e jo doonge giih adhaano aduuno wonge angween kedea giih kuow angween ge apahdh wudh cong gen ne rub ne wuor Juog e wiih koom ni kob gene,
<<Poongo Juog.
E noono.>>
5 Batiene e duol abeehn oogo ke yoohn ukoom ruohdh kobe,
<<Wuoru Juog gihro,
wu yaa tiihy yihre kedea wu yaa tud ree.
Wuoru ngo ke karu cang
keehd me nahg dhaane ngaa me ngihde.>>
6 Batiene e duol alihnga keehdo me wa doohn akuud nyoge me thoohdh, e wa duon athewo yi naam kedea ree ayuge wa duon maahy kodh e ukoohbo,
<<Poongo Juog!
Juog Aciehg Ruohdho dhaahre athubo.
7 Wuoro Juog ke mihn cwihny,
kedea moaro wiihe bang gihn
cahng nyuohm Roomo gihr Juog awahnho
kedea ciihe ree agwiire ne ci paare.
8 Dhaago me nyaahn agwiir ungaabe ke waare maa awuob.>>
Waay ni awuob beehda giih beeye atiihy yaa Juoge.
9 Kaano, e wuohnjuog arubo yihra kea, <<Gweed lum roba piny bang gihn Juog en naa arob lubo maa athiir kejea, <Yaa acuohn yi kaahny gihr Roomo mihn cwihny beehda gihr gen.> >> 10 Noono e cunga arunga piny thaahdh tiene ne wuor ngo, maa ajaahye an kobe, <<Kea them piny wa maano, a beehda ngad gwiihro keehd yihn, kedea keehd waahdu mooge yaa adoohng ne cuude giih Jeacuu. Nahge ke Juog Aciehg keede en ne wuori. Athiir gihn anyoadh Jeacuue en ne weehg agamloohngjuog tiihj.>>
Liny Gug Wudh Nyepinye
11 Yi dhoar maan ni e Dhaahr Maalo aniida e ree ayabe ne wahng utuohl cieny me tare oogo yi ngo. Ngaan ayedh wiih cieny ni nyinge Yiiho kedea Adiehr. Ukihm maa athiir en ne yuge, maa ngo ci yi liny kaa gihn maa athiir. 12 Tong nyinge ge adoohng wa leeb maaj kedea wiihe naa amahr atahnye giih ruohdh. Yihre anaa nying maa agweed yi kuohme me ngaa me ngahy ngo tooro nea padh en, e keede. 13 Ngaan ni anaa angahbo ke waaro maa aruodh ke remo kedea nyinge Lum Juog. 14 Ngaa ni thiow batiene abuodh yaa deaye giih dhaahr maalo. Yaa deaj ge anaa wudh ciehnye me tar kedea ge angahbo ke waare maa awuob maa ge tar ne weej. 15 Ngaa me pala me baahr me dhee bedh e ne beehn oogo yi dhee. Dhaahre giih kage ke gen ge utaaye kaa palo gihn nu kedea ge ukaahne ke cing me teeg wa ngiihnyo. Kedea ge ukedhe yi gihn me nyiidhe gen yea wa nyiidh akanyo. Gihn nu nyoadh rahny cwihny Juog Aciehg. 16 Gihn ni anaa agweed rih waahre kedea yi aahme, <<Ruohdh ruohdhe Cang wiih piny.>>
17 Batiene e wuohnjuog aniida e acuung wiih cahng maa akwaage e duone atihnge maalo e rubo yihr winy ke bang yi yamo cang kobe, <<Congu rogu, beehnu ke karu cang yi yaan duohng gihr Juog. 18 Beehnu beere wu ucwihdo ke rihng koohm ruohdhe, gihr yaa deaye giih doonge, gihr jo doong paajo, gihr ciehnye kedea yaa yedh wudh gen, kedea rihng koohm lwaag ne dug, ngaa me wiihe athaar wale baahng kedea ngaa maa adooro wale ngaa me teeg.>>
19 Yi gihn nu, e laahn ni angeeny aniida, ge ke ruohdh upiny maa yaa deaye giih gen, e wudh gen acong gene ne ciej liny rih ngaan ne wiih cieny maa deaye giihe. 20 Yi gihn nu, e laahn angeeny abeehn ne kwahny piny, en maa ngaa cahb nyoge ne yiih giih laahn ngeeny. Ngad ucahb gihn tiihy giih me gaahy nyoge ke nying laahn angeeny. Ke nying giih ni atiihy ngad ucahbe, en naa gihn adwaahnge yaa rog gen anaa alaamo gihr laahn angeeny beere ngo wuor gene wuoro. Laahn angeeny kedea ngad ucahb ge abeehn ne thoohr yi baaw gihr maay leelo me liehdh e ge kuow. 21 Goan yaa adoohng ataay ke pahl baahr ge bedh gihn abeehn oogo yi dhe ngaa wiih cieny. Noono, maa acong winye rog gen ne cwed koohm yaa ni.